ບຶງຊ້າງ ບຶງທີ່ງົດງາມ ແລະແປກຕາ

  ແນ່ນອນແຂວງສະຫວັນນະເຂດ ເປັນແຂວງທີ່ຂຶ້ນຊື່ດ້ານສະຖານທີ່ທ່ອງທ່ຽວໃນ ສປປ ລາວ ໂດຍສະເພາະສະຖານທີ່ທ່ອງທ່ຽວທາງປະຫວັດສາດ, ນອກຈາກນັ້ນ ຄຽງຄູ່ກັບສະຖານທີ່ທ່ອງທ່ຽວທີ່ຕິດພັນກັບປະຫວັດສາດແລ້ວກໍ່ຍັງມີສະຖານທີ່ທາງທໍາມະຊາດທີ່ຂຶ້ນຊື່ ແລະໄດ້ຮັບຄວາມນິຍົມຫຼາຍ ຊຶ່ງ  ຫຼາຍຄົນທີ່ໄດ້ໄປຕ້ອງຖາມຫາບຶງ ຊ້າງ” ດັ່ງທີ່ຄໍາເວົ້າທີ່ວ່າ: ບໍ່ໄດ້ໄປບຶງຊ້າງ” ຊໍ່າກັບບໍ່ໄດ້ໄປແຂວງ ສະຫວັນນະເຂດ.

 ກ່ອນທີ່ຈະໄປຮູ້ຈັກບຶງດັ່ງກ່າວອັນດັບທຳອິດທີ່ນັກທ່ອງທ່ຽວຕ້ອງຮູ້ໄວ້ວ່າ:ແຂວງສະຫວັນນະເຂດ ເປັນແຂວງໜຶ່ງທີ່ຖືກອ້ອມຮອບດ້ວຍພູຜາປ່າໄມ້ ຈຶ່ງບໍ່ແມ່ນເລື່ອງແປກທີ່ຈະມີສະຖານທີ່ທ່ອງທ່ຽວ ທໍາມະຊາດອັນສວຍງາມຫຼາຍແຫ່ງ, ແຕ່ອາດຍັງບໍ່ໄດ້ຮັບການພັດທະນາຈຶ່ງເຮັດໃຫ້ແຫຼ່ງທ່ອງທ່ຽວເຫຼົ່ານັ້ນຍັງຄົງຄວາມເປັນທໍາມະຊາດທີ່ອຸດົມສົມບູນ ແລະເປັນແຂວງທີ່ມີສະພາບແວດລ້ອມທາງທຳມະຊາດທີ່ສວຍສົດງົດງາມໄປດ້ວຍທິວທັດທຳມະຊາດເຊັ່ນ: ພູ, ແມ່ນໍ້າ, ນໍ້າ ຕົກ, ປ່າໄມ້, ຖໍ້າປະຫວັດສາດ, ຜາຫີນ ແລະອື່ນໆ.

“ບຶງຊ້າງ” ຕັ້ງຢູ່ບ້ານບຶງຊ້າງເມືອງຊົນນະບູລີ ແຂວງສະຫວັນ ນະເຂດ, ເປັນແຫຼ່ງທ່ອງທຽວໜຶ່ງ ທີ່ມີຄວາມສະຫງົບຢູ່ກາງທຳມະຊາດບ້ານນາ ຊຶ່ງປະຈຸບັນໄດ້ກາຍເປັນເຂດອະນຸລັກຂອງແຂວງສະຫວັນນະເຂດ, ທ່ານທີ່ມາທ່ຽວຊົມບຶງຊ້າງນີ້ ນອກຈາກຈະໄດ້ສຳຜັດກິ່ນອາຍຂອງທຳມະຊາດ ບ້ານນາ ແບບເຕັມໆແລ້ວ ຕົກຄໍ່າລົງແລງ ໃນໄລຍະເດືອນມີນາເຖິງເດືອນກັນຍາ ຂອງທຸກໆປີທ່ານກໍ່ຈະໄດ້ ເຫັນຝູງນົກກະຍາງຂາວເປັນພັນໂຕບິນມາຈັບຕົ້ນໄມ້ທີ່ບຶງຊ້າງແຫ່ງ ນີ້ອີກດ້ວຍ, ນອກຈາກທ່ານຈະໄດ້ເຫັນນົກກະຍາງຂາວນັບພັນ ໂຕແລ້ວທີ່ບຶງຊ້າງແຫ່ງນີ້ຍັງມີນົກສາຍພັນຫາຍາກທີ່ຂຶ້ນບັນຊີໃກ້ສູນພັນຈາກອາຊີ ແລະເປັນສັດຄຸ້ມຄອງຂອງອາຊີນັ້ນກໍ່ຄືນົກກະຊຸມຫົວລ້ານ (ນົກນໍ້າຂະໜາດໃຫຍ່ທີ່ ສຸດ) ຊຶ່ງນົກຊະນິດນີ້ເປັນນົກທີ່ພົບເຫັນໄດ້ຍາກ ແລະສາມາດພົບເຫັນໄດ້ພຽງໃນບຶງນໍ້າທຳມະຊາດບາງແຫ່ງໃນປະເທດລາວ.

-------

ໂດຍ: ວົງມະນີ

 

แชร์