ມອບ-ຮັບຫົວໜ້າຫ້ອງການສຶກສາເມືອງຫີນບູນ

 ເພື່ອເປັນການປະຕິບັດຕາມ ຂໍ້ຕົກລົງຂອງທ່ານເຈົ້າເມືອງໆຫີນບູນ ວ່າດ້ວຍການຍົກຍ້າຍ ແລະ ການແຕ່ງຕັ້ງຫົວໜ້າ-ຮອງຫົວໜ້າຫ້ອງການພາຍໃນເມືອງ, ດັ່ງນັ້ນ ເມື່ອບໍ່ດົນມານີ້ທີ່ສະໂມສອນຫ້ອງການສຶກສາທິການ ແລະກີລາເມືອງ ຫີນບູນ ໄດ້ຈັດພິທີມອບ-ຮັບໜ້າທີ່ ຫົວໜ້າຫ້ອງການລະຫວ່າງຜູ້ເກົ່າ ແລະຜູ້ໃໝ່, ເປັນກຽດເຂົ້າຮ່ວມຂອງທ່ານ ຄໍາສິງ ອໍລະວັນ ເຈົ້າ ເມືອງໆຫີນບູນ, ມີຫົວໜ້າ, ຮອງຫົວໜ້າຫ້ອງການພາຍໃນເມືອງ, ພະແນກການຂອງແຂວງ, ຄະນະຫ້ອງການສຶກສາທິການ ແລະກີລາເມືອງອ້ອມຂ້າງ, ມີອຳນວຍ ການໂຮງຮຽນຕະຫຼອດຮອດຄູ, ອາຈານເຂົ້າຮ່ວມ.

 ໃນພິທີແມ່ນໄດ້ຮັບຟັງການ ຜ່ານບົດບັນທຶກມອບ-ຮັບໜ້າທີ່ໃນນັ້ນໄດ້ສັງລວມການຈັດຕັ້ງປະຕິບັດໃນການຊີ້ນຳໆພາວຽກງານການສຶກສາໃນໄລຍະຜ່ານມາເຫັນວ່າມີຫຼາຍດ້ານທີ່ໄດ້ຮັບຜົນສຳເລັດ ແລະບາງດ້ານທີ່ຍັງຄົງຄ້າງເພື່ອມອບໝາຍໃຫ້ຫົວໜ້າຜູ້ໃໝ່ສືບຕໍ່ ຊີ້ນຳໆພາ.

  ຈາກນັ້ນທ່ານ ສະຫວັດ ໄພມະສານ ຫົວໜ້າຫ້ອງການສຶກສາທິການ ແລະກີລາເມືອງຫີນບູນຜູ້ເກົ່າ ແລະທ່ານ ຄຳຫຼາວ ໄຊໂກສີ ຫົວໜ້າຫ້ອງການສຶກສາທິການ ແລະກີລາເມືອງຫີນບູນ ຜູ້ໃໝ່ໄດ້ເຊັນບົດບັນທຶກດັ່ງກ່າວ ແລະຍັງໄດ້ຮັບຟັງ ການແຈ້ງລາຍຊື່ພະນັກງານຂຶ້ນໃໝ່, ຜ່ານຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະກີລາ ວ່າດ້ວຍການອະນຸມັດພະນັກງານເຂົ້າຮັບອຸດໜູນບຳນານ ຈຳນວນ 12 ທ່ານ.

 ໃນຕອນທ້າຍຂອງພິທີຍັງໄດ້ຮັບຟັງການໂອລົມຈາກທ່ານເຈົ້າ ເມືອງໆຫີນບູນ ຊຶ່ງທ່ານໄດ້ສະແດງ ຄວາມຍ້ອງຍໍຊົມເຊີຍມາຍັງຫົວໜ້າຫ້ອງການຜູ້ເກົ່າທີ່ຍາດມາໄດ້ ຜົນງານໃນໄລຍະຜ່ານມາ ແລະ ທ່ານຍັງໄດ້ຊີ້ທິດເຍືອງທາງອັນສຳຄັນຫຼາຍດ້ານໃນການຈັດຕັ້ງປະຕິບັດໜ້າທີ່ທີ່ໄດ້ມອບໝາຍໃຫ້ມີຜົນສຳເລັດເປັນກ້າວໆ.

-------

ໂດຍ: ລັດດາ

• 09/07/2020