ກະຊວງກະສິກຳອອກ 8 ຂໍ້ຫ້າມການຄຸ້ມຄອງສັດນໍ້າສັດປ່າ

  ເພື່ອເປັນການສ້າງຂະບວນການປົກປັກຮັກສາ ແລະພັດທະນາສັດນໍ້າສັດປ່າເນື່ອງໃນໂອກາດວັນປ່ອຍປາ ແລະສັດນໍ້າສັດປ່າແຫ່ງຊາດວັນທີ 13 ກໍລະກົດກະຊວງກະສິ ກຳ ແລະປ່າໄມ້ໄດ້ອອກຄຳສັ່ງ 8 ຂໍ້ຫ້າມເພື່ອແກ້ໄຂປາກົດການຫຍໍ້ທໍ້ ແລະປູກຈິດສຳນຶກກ່ຽວກັບການອະນຸລັກປົກປັກຮັກສາພັດທະນາສັດນໍ້າ ແລະສັດປ່າ.

   ອີງຕາມຄຳສັ່ງເລກທີ 0682 ລົງວັນທີ 11 ມິຖຸນາ 2020 ໃຫ້ຮູ້ວ່າ: 1, ຫ້າມບຸກຄົນ, ຄອບຄົວມີການຊື້-ຂາຍສັດນໍ້າ ແລະສັດປ່າປະເພດຫວງຫ້າມ (ບັນຊີ1) ແລະປະເພດຄຸ້ມຄອງ (ບັນຊີ 2) ໃນທຸລະກິດຢ່າງເດັດຂາດ, 2, ຫ້າມນຳເອົາສັດນໍ້າ, ສັດປ່າປະເພດຫວງຫ້າມທີ່ຍັງມີຊີວິດ, ຊາກ, ຊີ້ນສ່ວນ ແລະອະໄວຍະວະຕ່າງໆຂອງສັດອອກຈາກຖິ່ນ ທີ່ຢູ່ອາໄສ ຫຼື ແຫຼ່ງກຳເນີດມາໄວ້ຄອງ ຄອງໂດຍບໍ່ໄດ້ຮັບອະນຸຍາດ, 3, ຫ້າມ ລ່າສັດປະເພດທົ່ວໄປ (ບັນຊີ3) ໃນສະ ຖານທີ່ຫວງຫ້າມເປັນຕົ້ນເຂດອະນຸລັກພັນສັດ, ເຂດວັງສະຫງວນໃນຊ່ວງລະດູປາວ່າງໄຂ່ ຫຼືເຂົ້າພັນສາ, 4, ຫ້າມບຸກລຸກທຳລາຍເຂດອະນຸລັກພັນສັດວັງສະຫງວນ, ຖິ່ນອາໄສ ແລະ ແຫຼ່ງອາ ຫານຂອງສັດນໍ້າ ແລະປ່າໄມ້ໂດຍທາງກົງ ແລະທາງອ້ອມເຊັ່ນ: ບຸກເບີກ, ຕັ້ງຖິ່ນຖານໃໝ່, ຖາກຖາງປ່າໄມ້, ຈູດປ່າ, ຕັດໄມ້ ແລະນຳໃຊ້ຢາຂ້າສັດຕູພືດຂ້າຫຍ້າເກີນກຳນົດທີ່ບໍ່ຖືກຕ້ອງຕາມກົດໝາຍ, 5, ຫ້າມຈັບຈອງ, ຍ້າຍປ່ຽນແປງທຳລາຍເຄື່ອງໝາຍເຂດແດນວັງສະຫງວນ, ເຂດອະນຸລັກພັນສັດ ແລະ ຖິ່ນຢູ່ອາໄສ, 6, ຫ້າມຫາປາໃນຊ່ວງລະດູວ່າງໄຂ່ ຫຼືຊ່ວງເຂົ້າພັນສາຢູ່ຕາມເຂດທີ່ປາຂຶ້ນວ່າງໄຂ່ເປັນຕົ້ນແມ່ນເຂດວັງສະຫງວນຕ່າງໆ, 7, ຫ້າມຕັນທາງເດີນຂອງປາຂຶ້ນວ່າງໄຂ່ຕາມຫ້ວຍ ແລະສາຍນໍ້າດ້ວຍວິທີການເຮັດຕ້ອນ, ເຮັດລີ່, ໃສ່ລອບ, ໃສ່ມອງຕາຖີ່ ແລະເຄື່ອງມືຫາປາລັກສະນະດັບສູນ ແລະ 8, ຫ້າມ ມີພຶດຕິກຳອື່ນທີ່ມີ ການລະເມີດລະບຽບກົດໝາຍກ່ຽວກັບສັດນໍ້າ ແລະສັດປ່າ ແລະກົດໝາຍວ່າດ້ວຍການປະມົງ.

____________

ຂຽນໂດຍ: ແພງຕາ, ໜັງສືພິມເສດຖະກິດ-ສັງຄົມ

แชร์