ນວ ມອບເງິນນະໂຍບາຍ ໃຫ້ຜູ້ມີຜົນງານຕໍ່ປະເທດຊາດ

ເມື່ອວັນທີ 8 ກຸມພາ 2019 ພະແນກແຮງງານ ແລະສະຫວັດດີການສັງຄົມ ນະຄອນຫຼວງວຽງຈັນ (ນວ) ໄດ້ຈັດພິທີມອບ-ຮັບ ເງິນນະໂຍບາຍໃຫ້ແກ່ຜູ້ທີ່ມີຜົນງານ ແລະຄຸນງາມຄວາມດີຕໍ່ປະເທດຊາດປະຈໍາປີ 2019 ຂຶ້ນໂດຍມີ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນຜູ້ຊີ້ນໍາຂົງເຂດວັດທະນະທໍາ-ສັງຄົມ, ທ່ານ ນາງ ລໍາພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມນະຄອນຫຼວງວຽງຈັນ, ມີຜູ້ຕາງໜ້າກົມນະໂຍບາຍ, ຮອງເຈົ້າເມືອງ, ຄະນະກໍາມະການຄົ້ນຄວ້ານະໂຍບາຍຫົວໜ້າຫ້ອງການແຮງງານ ເມືອງ ແລະພະນັກງານປະຕິວັດອາວຸໂສເຂົ້າຮ່ວມ.

  ສໍາລັບການປະຕິບັດນະໂຍບາຍຄັ້ງນີ້ແມ່ນນະໂຍບາຍອຸດໜູນເສຍສະຫຼະຊີວິດຍ້ອນການສູ້ຮົບ ແລະຮັບໃຊ້ສູ້ຮົບຊຶ່ງມີຈໍານວນ 27 ທ່ານ, ຍິງ 2 ທ່ານ ເປັນຈໍານວນເງິນທັງໝົດ 608,14 ລ້ານກີບ ແລະນະໂຍບາຍເງິນອຸດໜູນນັກຮົບແຂ່ງຂັນ 1 ທ່ານ ຈໍານວນ 10 ລ້ານກີບ.

  ຫົວໜ້າພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ກ່າວວ່າ: ເຖິງມູນຄ່າເງິນຈະໜ້ອຍບໍ່ສົມຄູ່ກັບຜົນງານແຕ່ຂໍໃຫ້ບັນດາທ່ານເຂົ້າໃຈວ່າອັນນີ້ແມ່ນນໍ້າຈິດ-ນໍ້າໃຈຂອງ ພັກ-ລັດ ເວົ້າສະເພາະຂອງຮຸ່ນນ້ອງຮຸ່ນລູກ-ຫຼານຜູ້ສືບທອດພາ ລະກິດຂອງບັນດາທ່ານທີ່ຍັງເປັນຫ່ວງເປັນໃຍຍັງຈົດຈໍາບຸນຄຸນຂອງບັນດາທ່ານໄວ້ບໍ່ມີວັນຈະຫຼົງລືມໄດ້.

ໂດຍ: ນໍ້າເໝີຍ 

• 12/02/2019