ພະພິຂຸສົງສຳມະເນນທົ່ວປະເທດປະຕິບັດທຳຈຳພັນສາ

  ບຸນເຂົ້າພັນສາປະວໍລະນາແມ່ນໜຶ່ງບຸນໃນຮີດ 12 ຄອງ 14,ເປັນວັນທີ່ມີຄວາມໝາຍຄວາມສໍາຄັນທາງດ້ານພຸດທະສາສະໜາປະຕິບັດສືບຕໍ່ກັນມາແຕ່ບູຮານນະການໂດຍໃນປີນີ້ກົງກັບວັນທີ 5 ກໍລະກົດ 2020, ມື້ຂຶ້ນ 15 ຄໍ່າເດືອນ 8 ລາວ ຊຶ່ງພຸດທະສາສະໜາກະນິກະຊົນໃນທົ່ວປະເທດໄດ້ພ້ອມກັນເອົາຜ້າຈໍາພັນສາ,ທຽນຈໍາພັນ ສາຖວາຍໃຫ້ແດ່ພະສົງສໍາມະເນນທີ່ຈໍາພັນສາໃນແຕ່ລະວັດ.

 ບຸນເຂົ້າພັນສາປະວໍລະນາເປັນຮີດຄອງປະເພນີ ຫຼື ວິໄນທີ່ພະພຸດທະເຈົ້າບັນຍັດວ່າ: ພະພິກຂຸສົງຕ້ອງຢູ່ປະຈຳໃນວັດໃດໜຶ່ງລະຫວ່າງ ລະດູຝົນ ໂດຍເຫດທີ່ພະພິກຂຸໃນສະໄໝພຸດທະການມີໜ້າທີ່ຈະຕ້ອງຈາລຶກໂຜດສັດ ແລະເຜີຍແຜ່ພະທຳຄໍາສັ່ງສອນແກ່ປະຊາຊົນໃນ ສະຖານທີ່ຕ່າງໆ ບໍ່ຈຳເປັນຕ້ອງມີບ່ອນຢູ່ປະຈຳເຖິງແມ່ນວ່າຈະເປັນລະດູຝົນຊາວບ້ານຈຶ່ງຕຳນິວ່າໄປ ຢຽມເຂົ້າກ້າ ແລະພືດພັນອື່ນໆຈົນ ເສຍຫາຍ, ດັ່ງນັ້ນພະພຸດທະເຈົ້າ ຈຶ່ງຊົງວາງລະບຽບການຈຳພັນ ສາໃຫ້ພະພິກຂຸສົງຢູ່ປະຈຳບ່ອນເກົ່າຕະຫຼອດ 3 ເດືອນ ໃນລະດູຝົນຄື: ເລີ່ມຕັ້ງແຕ່ມື້ແຮມ 1 ຄໍ່າ ເດືອນ 8 ຂອງທຸກປີເອີ້ນວ່າປຸຣິມະພັນສາ, ຖ້າປີໃດມີເດືອນ 8 ສອງຄັ້ງ (ສອງຫົນ) ກໍເລື່ອນມາເປັນມື້ແຮມ 1 ຄໍ່າ ເດືອນ 8 ຫຼັງ ແລະ ອອກພັນສາໃນມື້ຂຶ້ນ 15 ຄໍ່າ ເດືອນ 11 ເອີ້ນວ່າປັດສິມພັນສາ.

 ວັນເຂົ້າພັນສານັບເປັນເຫດໃຫ້ມີປະເພນີທຳບຸນເນື່ອງໃນວັນດັ່ງກ່າວສືບຕໍ່ກັນມາກາຍເປັນວັດທະນະທຳທາງສາສະໜາອັນລໍ້າຄ່າ,ສຳລັບອອກຕົນຍາດໂຍມກໍໄດ້ມີການຖວາຍສິ່ງຂອງຕ່າງໆໃຫ້ແດ່ພະສົງບໍ່ວ່າຈະເປັນເຂົ້າຫມົມ,ເຂົ້າ ຕົ້ມ,ເຄື່ອງສັງຂະທານທຽນພັນສາ ຜ້ານໍ້າຝົນ ແລະອື່ນໆ.

---------

ໜັງສືພິມເສດຖະກິດ-ສັງຄົມ

แชร์