ຢຶດຢາບ້າ 4 ແສນກວ່າເມັດ ພ້ອມ 4 ຜູ້ຕ້ອງຫາ

  ໃນວັນທີ 27 ມິຖຸນາ 2020 ໜ່ວຍງານສະກັດກັ້ນຢາເສບຕິດ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ ສາມາດຢຶດຂອງກາງຢາເສບຕິດປະເພດຢາບ້າໄດ້ຈຳນວນ 4,15 ແສນເມັດ ພ້ອມກັກຕົວຜູ້ຮ່ວມຂະບວນການໄດ້ຈຳນວນ 4 ຄົນ, ຍິງ 2 ຄົນ, ຊຶ່ງນັບວ່າເປັນການມ້າງຄະດີລາຍໃຫຍ່ ແລະໄດ້ຂອງກາງເປັນຈຳນວນຫຼາຍ.
   ຊຶ່ງເຫດການຄັ້ງນີ້ເລີ່ມຕົ້ນປະຕິບັດການໃນເວລາ 16 ໂມງຂອງວັນທີ 27 ມິຖຸນາ 2020, ທາງເຈົ້າໜ້າທີ່ຕຳຫຼວດ ປກສ ນະຄອນໄກສອນ ພົມວິຫານ ຮ່ວມກັບ ປກສ ກຸ່ມ 7 (ຜັກຂະ-ສົ້ມປ່ອຍ) ໄດ້ເຂົ້າຈັບກຸມພ້ອມທັງກັກຕົວ 2 ຜົວເມຍ ຢູ່ທີ່ບ້ານຫ້ວຍໄຜ່ ນະຄອນໄກສອນ ພົມວິຫານ ຄື: ນາງ ຂັນທະລີ (ແອ໋ວ) ອາຍຸ 45 ປີ ແລະທ້າວ ວົງພະຈັນ (ຫຳ) ອາຍຸ 45 ປີ, ຢູ່ທີ່ເຮືອນຂອງພວກກ່ຽວເອງ, ໃນນັ້ນໄດ້ພົບຂອງກາງຢາເສບຕິດ (ຢາບ້າ) ຈຳນວນ 2 ມັດ, ເທົ່າກັບ 4 ພັນເມັດ, ຜ່ານການສອບສວນເບື້ອງຕົ້ນນາງ ຂັນທະລີ ໄດ້ຮັບສາລະພາບວ່າ:ຢາບ້າຈຳນວນດັ່ງກ່າວແມ່ນໄດ້ຮັບຊື້ມາຈາກທ້າວ ສຸລິກາ ອາຍຸ 57 ປີ, ປະຊາຊົນບ້ານໜອງບົວທ່າ ເມືອງສອງຄອນ ແຂວງສະຫວັນນະເຂດ, ຈາກ ນັ້ນທາງເຈົ້າໜ້າທີ່ຈຶ່ງໄດ້ຕິດຕາມພຶດຕິ ກຳຂອງທ້າວ ສຸລິກາ ຢ່າງໃກ້ຊິດ, ມື້ຕໍ່ມາ ຄືໃນວັນທີ 28 ມິຖຸນາ, ເວລາ 16 ໂມງ, ທາງເຈົ້າໜ້າທີ່ຈຶ່ງໄດ້ກັກຕົວທ້າວ ສຸລິກາ ໄດ້ຢູ່ທີ່ເຂດຕະຫຼາດສາມັກຄີໄຊນະຄອນໄກສອນ, ຜ່ານການກວດຄົ້ນຕົວຜູ້ກ່ຽວແມ່ນບໍ່ພົບເຫັນຂອງກາງຈາກນັ້ນຈຶ່ງໄດ້ນຳຕົວ ຜູ້ກ່ຽວໄປສອບສວນ ແລະກໍ່ໄດ້ຮັບສາລະພາບວ່າ: ແມ່ນໄດ້ຂາຍຢາບ້າໃຫ້ນາງຂັນທະລີ ແລະທ້າວ ວົງພະຈັນ ຕາມການຊັກທອດຂອງທັງສອງ, ຊຶ່ງຢາບ້າທີ່ນຳມາຈຳ ໜ່າຍ-ຂາຍ ແມ່ນໄດ້ຊື້ມາຈາກ ນາງ ບຸນເພັງ (ຫຼ້ານ້ອຍ) ອາຍຸປະມານ39 ປີ, ຢູ່ບ້ານຫົວເມືອງ ໃຕ້ນະຄອນໄກສອນ ພົມວິຫານ.
  ຈາກນັ້ນ ໃນເວລາ 17:30 ໂມງ ຂອງວັນດຽວກັນ, ເຈົ້າໜ້າທີ່ຈຶ່ງໄດ້ຂະຫຍາຍຜົນນຳເອົາກຳລັງໄປປິດລ້ອມເຮືອນນາງ ບຸນເພັງ, ຕາມການຊັກທອດຂອງທ້າວ ສຸລິກາ ພໍໄປຮອດເຮືອນ ນາງ ບຸນເພັງ ບໍ່ໄດ້ຢູ່ເຮືອນ, ມີແຕ່ລູກສາວຢູ່ເຮືອນຄື ນາງ ອຳໄພສິດ (ພອຍນ້ອຍ)ອາຍຸ 22 ປີ, ເປັນນັກສຶກສາຢູ່ສະຖາບັນແຫ່ງໜຶ່ງໃນແຂວງສະຫວັນນະເຂດ ຈາກການສອບສວນຂອງເຈົ້າໜ້າທີ່ນາງ ອຳໄພສິດ ກໍ່ໄດ້ຮັບສາລະພາບວ່າ: ຕົນກໍ່ໄດ້ເຄີຍສົ່ງຢາເສບຕິດໃຫ້ທ້າວ ສຸລິກາ ໃນເວລາແມ່ບໍ່ຢູ່ເຮືອນຈຳນວນ 4 ຄັ້ງ, ດັ່ງນັ້ນທາງເຈົ້າໜ້າທີ່ຈຶ່ງໄດ້ກັກຕົວ ນາງ ອຳໄພສິດ ໄວ້ພ້ອມກວດຄົ້ນເຄຫະສະຖານ (ເຮືອນ) ຂອງ ນາງ ບຸນເພັງ ກໍ່ໄດ້ພົບເຫັນຢາເສບຕິດທີ່ຊຸກເຊື່ອງໄວ້ຈຳ ນວນຫຼວງ ຫຼາຍທີ່ຊຸກເຊື່ອງໄວ້ຫຼາຍຈຸດຄື: ຢູ່ຫ້ອງນອນຊັ້ນເທິງ, ຫ້ອງນອນຊັ້ນລຸ່ມ, ເຮືອນຄົວ ແລະຄອກເປັດໄດ້ຢາບ້າຈຳນວນ 206 ມັດ ກັບ 15 ຖົງ, ເທົ່າກັບ 4,15 ແສນເມັດ.
  ນອກນັ້ນທາງເຈົ້າໜ້າທີ່ຍັງໄດ້ຢຶດພາຫະນະເປັນຕົ້ນ: ລົດກະບະວີໂກ້, ສີດຳ, ໝາຍ ເລກທະບຽນ: ສະຫວັນນະເຂດ ກຈ 1012, ລົດເກັງຮຸນໄດອີແລນຕ້າ, ສີຂາວໝາຍເລກທະບຽນ: ສະຫວັນນະເຂດ ກຈ 3912, ລົດຈັກຈຳນວນ 3 ຄັນ, ພ້ອມນັ້ນກໍ່ມີໃບຕາດິນ, ໃບມອບກຳມະສິດນຳໃຊ້ທີ່ດິນ, ໃບຢັ້ງຢືນການຊື້-ຂາຍ ທີ່ດິນອີກຈຳນວນ 5 ໃບ, ບັນຊີເງິນຝາກຈຳນວນ 3 ເຫຼັ້ມ, ສາຍຄໍ 1 ເສັ້ນ, ໂມງໃສ່ແຂນ 1 ໜ່ວຍ ເພື່ອມາເປັນຫຼັກຖານໃນການດຳເນີນຄະດີຕໍ່ໄປ.

แชร์