ຈຳປາສັກ ສ້າງຫໍປະດິດສະຖານພະພຸດທະຮູບອົງຕື້ຈຳລອງ

   ໃນວັນທີ 3 ກໍລະກົດຜ່ານມາອໍານາດການປົກຄອງແຂວງຈໍາປາສັກ ໄດ້ຈັດພິທີວາງສີລາລຶກການກໍ່ສ້າງຫໍປະດິດສະຖານພະພຸດທະຮູບອົງຕື້ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ແຂວງຈໍາປາສັກ, ໃຫ້ກຽດເຂົ້າຮ່ວມໂດຍທ່ານ ປອ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ, ທ່ານ ເມກສະຫວັນ ພົມພິທັກ ປະທານສະພາປະຊາ ຊົນແຂວງຈໍາປາສັກ, ທ່ານ ອຸດອນແກ້ວ ດວງດີ ປະທານບໍລິສັດດວງດີກໍ່ສ້າງຂົວທາງຄົບວົງຈອນ ຈໍາກັດ ໃນນາມເປັນຜູ້ລົງທຶນກໍ່ສ້າງພ້ອມດ້ວຍບັນດາທ່ານແຂກຜູ້ໃຫຍ່ທີ່ກ່ຽວຂ້ອງຈາກສູນກາງ ແລະແຂວງເຂົ້າຮ່ວມ.
 ທ່ານ ບຸນຍົງ ສູນທອນ ຫົວໜ້າຄະນະຄຸ້ມຄອງເຂດເສດຖະກິດພິເສດວັງເຕົ່າໄດ້ກ່າວວ່າ: ການກໍ່ສ້າງ ແລະປະດິດສະຖານພະອົງຕື້ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ແຂວງຈໍາປາສັກ ແມ່ນໜຶ່ງໃນອົງການພັດທະນາເຂດເສດຖະກິດຂອງແຂວງຈໍາປາສັກ,ກໍ່ສ້າງຂຶ້ນດ້ວຍຈິດໃຈສັດທາຂອງ ທ່ານ ອຸດອນ ແກ້ວດວງດີ ປະທານບໍລິສັດດວງດີກໍ່ສ້າງຂົວທາງຄົບວົງຈອນ ຈໍາກັດ ພ້ອມຄອບຄົວ ແລະຍາດພີ່ນ້ອງເພື່ອເປັນບ່ອນກາບໄຫວ້ສັກກະລະບູຊາຂອງປະຊາຊົນຊາວພຸດ,ໂດຍສະເພາະຊາວ ແຂວງຈໍາປາສັກ ກໍຄືຊາວລາວແຂວງພາກໃຕ້ ແລະປະເທດໃກ້ຄຽງອ້ອມຂ້າງນຳອີກ.


   ພະພຸດທະຮູບອົງຕື້ຈໍາລອງທີ່ຈະປະດິດສະຖານຢູ່ເຂດພິເສດວັງເຕົ່າ ເມືອງໂພນທອງ ປະຈຸບັນໄດ້ມີພິທີປັ້ນຫຼໍ່ນໍາໃຊ້ແຮ່ທາດ ແລະວັດຖຸມົງຄົນຫຼາຍຊະນິດ (ທອງສໍາເລັດ) ມີຂະໜາດຕັກກວ້າງ 2,5 ແມັດ, ມີຄວາມສູງ 3 ແມັດ, ສັດທາການກໍ່ສ້າງທັງໝົດ 250 ລ້ານກີບ, ໂດຍແມ່ນການລົງທຶນກໍ່ ສ້າງຂອງຄອບຄົວທ່ານ ອຸດອນ ແກ້ວ ດວງດີ ປະທານບໍລິສັດ ດວງດີກໍ່ສ້າງ ຂົວທາງຄົບວົງຈອນຈໍາກັດ, ຊຶ່ງໂຄງການກໍ່ສ້າງດັ່ງກ່າວແມ່ນຈະໃຊ້ເວລາກໍ່ສ້າງສໍາເລັດພາຍໃນປີ 2020 ນີ້ ແລະ ຄາດວ່າຖ້າຫາກສ້າງສໍາເລັດແມ່ນຈະເປັນອີກຈຸດໜຶ່ງທີ່ສາມາດສ້າງຄວາມສົນໃຈໃຫ້ກັບພໍ່ແມ່ປະຊາຊົນຊາວພຸດທັງພາຍໃນແຂວງ,ແຕ່ງແຂວງ ແລະປະເທດໃກ້ຄຽງເປັນຢ່າງດີ.

_____________

ຂ່າວ: ໂພທິຣາຊ, ໜັງສືພິມເສດຖະກິດ-ສັງຄົມ   

แชร์