ໄຊຍະສົ່ງອອກສິນຄ້າກະຊິກຳ 242,25 ຕື້ກີບ

  ໃນ 1 ປີຜ່ານມາພະແນກກະສິກໍາ ແລະປ່າໄມ້ແຂວງໄຊຍະບູລີໄດ້ເອົາໃຈໃສ່ຢ່າງຕັ້ງໜ້າໃນການຊຸກຍູ້ສົ່ງເສີມການຈັດຕັ້ງປະຕິບັດແຜນພັດທະນາວຽກງານກະສິກໍາ ແລະປ່າໄມ້ໄດ້ກໍານົດຕາມຍຸດທະສາດ 3 ເສົາຄໍ້າ 4 ແຜນງານ ແລະແຜນດໍາເນີນງານຕິດພັນກັບການຈັດຕັ້ງປະຕິບັດ 13 ນະໂຍບາຍສະໜັບສະ ໜູນໂຄງການຄໍ້າປະກັນສະບຽງອາຫານ ແລະ 8 ນະໂຍບາຍສະໜັບສະໜູນໂຄງການລ້ຽງສັດເປັນສິນຄ້າ.

      ທ່ານ ຄຳຫຼ້າ ຜິວວັນນາ ຫົວ ໜ້າພະແນກກະສິກຳ  ແລະປ່າໄມ້ ແຂວງໄຊຍະບູລີ ໄດ້ເປີດເຜີຍວ່າ: ຜ່ານການຈັດຕັ້ງປະຕິບັດການປູກ ພືດເປັນສິນຄ້າ ແລະການລ້ຽງສັດ ເປັນສິນຄ້າເຫັນວ່າທົ່ວ ແຂວງມີ ເນື້ອການຜະລິດກະສິກໍາ ແລະຟາມ ລ້ຽງສັດເພີ່ມຂຶ້ນເຊັ່ນ: ເນື້ອທີ່ການ ຜະລິດກະສິກໍາເປັນສິນຄ້າເນື້ອທີ່ແຜນການມີ 104 ແສນເຮັກຕາ, ປະຕິບັດໄດ້ 95,82% ຂອງແຜນ ການຜົນຜະລິດ 1,34 ລ້ານໂຕນ, ທຽບໃສ່ປີຜ່ານມາເນື້ອທີ່ຫຼຸດລົງ 3,4 ພັນເຮັກຕາ ຜົນຜະລິດເພີ່ມ ຂຶ້ນ 1,3 ແສນໂຕນ. ໃນນີ້ພືດເສດ ຖະກິດຫຼັກແມ່ນສາລີແຂງເນື້ອທີ່ 40,4 ພັນເຮັກຕາ ຜົນຜະລິດ 2,04 ແສນໂຕນ, ມັນຕົ້ນເນື້ອທີ່ 28,7 ພັນເຮັກຕາ, ຜົນຜະລິດ 1,03 ລ້ານໂຕນ.  ນອກນີ້ຍັງມີພືດພົ້ນ ເດັ່ນເຊັ່ນ: ຖົ່ວເຫຼືອງຟັກສົດເນື້ອທີ່ 184 ເຮັກຕາ, ຜົນຜະລິດ 1,6 ພັນໂຕນ, ສີໄຄເຄື່ອງເນື້ອທີ່ 193,5 ເຮັກຕາ, ຜົນຜະລິດ 387 ໂຕນ.

  ພ້ອມນີ້ການລ້ຽງສັດເປັນສິນ ຄ້າກໍມີການຂະຫຍາຍຕົວຈາກ ການລ້ຽງສັດແບບທໍາມະຊາດໄປ ສູ່ການລ້ຽງສັດແບບເປັນຟາມ, ເປັນກຸ່ມທົ່ວແຂວງມີຟາມລ້ຽງສັດ ທັງໝົດ 100 ກວ່າຟາມ. ໃນນີ້ ຟາມຄວາຍ, ງົວມີ 49 ຟາມມີ  ງົວ, ຄວາຍ 3,03 ພັນໂຕ, ຟາມ ລ້ຽງໝູມີ 29 ຟາມ ມີໝູ 12,3 ພັນໂຕ, ຟາມລ້ຽງໄກ່ພັນໄຂ່ມີ 21 ຟາມ, ມີໄກ່ທັງໝົດ 38.450 ໂຕ ໄກ່ພັນນີ້ມີ 4 ຟາມ ມີໄກ່ທັງໝົດ 10,9 ພັນໂຕ ການລ້ຽງປາກໍມີການຂະຫຍາຍຕົວເຊັ່ນດຽວກັນ ທົ່ວແຂວງມີໜອງປາທັງໝົດ 10,7 ພັນໜອງມີເນື້ອທີ່ 1,06 ພັນ ເຮັກຕາ, ປ່ອຍປາທັງໝົດ 44 ລ້ານ ກວ່າໂຕ, ລ້ຽງປາກະຊັງມີ 100 ກວ່າກະຊັງ ມີປາທັງໝົດ 1,86 ແສນໂຕ. ສາມາດຜະລິດສັດເປັນສິນຄ້າສົ່ງອອກພາຍໃນໄດ້ທັງໝົດ 14,8 ພັນໂຕ ໃນນີ້ມີຄວາຍ 5,3 ພັນໂຕ, ມີງົວ 4,3 ພັນໂຕ, ມີໝູ 5,07 ພັນໂຕ.

   ທ່ານຍັງໃຫ້ຮູ້ຕື່ມວ່າໃນ 1 ປີ ຜ່ານມາ ການສົ່ງອອກຜະລິດຕະ ພັນກະສິກຳ ອອກຕ່າງປະເທດ ເຊັ່ນ: ປະເທດໄທ ແລະ ສປ ຈີນ ມີມູນຄ່າທັງໝົດ 28,5 ລ້ານໂດ ລາ ປະມານ 242,25 ຕື້ກີບ ຈຳ ນວນແສນໂຕນ ເປັນຕົ້ນແມ່ນສາ ລີ ແຂງຈຳນວນ 34,4 ພັນໂຕນ ມູນຄ່າ 2,8 ລ້ານໂດລາ, ມັນຕົ້ນ ແຫ້ງ 62,02 ພັນໂຕນ ມູນຄ່າ 6,3 ລ້ານໂດລາ, ໝາກເດືອຍບໍ່ສີ 23,02 ພັນໂຕນ ມູນຄ່າ 1 ລ້ານ ກວ່າໂດລາ ແລະກ້ວຍຫອມ 50 ພັນກວ່າໂຕນ ມູນຄ່າ 9,3 ລ້ານ ໂດລາ. ນອກຈາກສົ່ງຜະລິດຕະພັນ ສິນຄ້າກະສິກຳໄປຕ່າງປະເທດ ແລ້ວຍັງໄດ້ສົ່ງສິນຄ້າອອກຕ່າງ ແຂວງພາຍໃນປະເທດເຊັ່ນ: ແຂວງ ຫຼວງພະບາງ, ແຂວງວຽງຈັນ, ແຂວງຫຼວງນໍ້າທາ ແລະແຂວງຜົ້ງ ສາລີ. ຜະລິດຕະພັນສ່ວນໃຫຍ່ແມ່ນ ສາລີຈຳນວນ 4,5 ພັນໂຕນ ມູນຄ່າ 54 ພັນໂດລາ, ເຂົ້າ ສານ 107 ໂຕນມູນຄ່າ 75 ພັນໂດລາ, ເຂົ້າເປືອກ 185 ໂຕນ ມູນຄ່າ 65 ພັນໂດລາ.

ໂດຍ: ບຸນທີ - ນສພ ເສດຖະກິດ-ສັງຄົມ

แชร์