ຫຼາຍສາເຫດເຮັດໃຫ້ເມືອງຈັນທະບູລີ ເກັບລາຍໄດ້ບໍ່ເຖີງແຜນ

  ເມືອງຈັນທະບູລີ ໃນປີ 2018  ໄດ້ຮັບຕົວເລກຈັດເກັບລາຍຮັບຈາກນະຄອນຫຼວງວຽງຈັນ ທັງໝົດ 73,27 ຕື້ກີບ, ຜ່ານການຈັດຕັ້ງປະຕິບັດຕົວຈິງໄດ້ພຽງ 71,28 ຕື້ກີບ ເທົ່າກັບ 97,29% ຂອງແຜນການທັງນີ້ກໍເນື່ອງມາຈາກຫຼາຍປັດໄຈໂດຍສະເພາະຕົວເລກຄາດໝາຍສູງຖ້າທຽບໃສ່ການເຕີບໂຕຂອງເສດຖະກິດ, ບາງຫົວໜ່ວຍທຸລະກິດມີການເຊື່ອງອໍາລາຍຮັບ, ການມອບອາກອນຊັກຊ້າ ແລະບັນຫາອື່ນໆອີກ.

  ອີງຕາມຂໍ້ມູນຈາກຫ້ອງການການເງິນ ເມືອງຈັນທະບູລີ ໃຫ້ຮູ້ວ່າ: ໃນປີ 2018 ເມືອງຈັນທະບູລີໄດ້ຮັບຕົວເລກຈັດເກັບລາຍຮັບທີ່ນະຄອນຫຼວງວຽງຈັນ ມອບໃຫ້ມີທັງໝົດ 73,27 ຕື້ກີບ, ຜ່ານການຈັດຕັ້ງປະຕິບັດຕົວຈິງໄດ້ບໍ່ເຖິງແຜນປະຕິບັດໄດ້ພຽງ 71,28 ຕື້ກີບ ເທົ່າກັບ 97,29% ທຽບໃສ່ປີ 2017 ເພີ່ມຂຶ້ນ 22,35% ໃນນີ້ຂະແໜງສ່ວຍສາອາກອນປະຕິບັດໄດ້ 70,64 ຕື້ກີບ ເທົ່າກັບ 97,16% ແລະຂະແໜງຄຸ້ມຄອງຊັບສິນຂອງລັດປະຕິບັດໄດ້ 643,96 ລ້ານກີບ ເທົ່າກັບ 112,98% ທັງນີ້ກໍຍ້ອນຕົວເລກຄາດໝາຍສູງຖ້າທຽບໃສ່ການເຕີບໂຕຂອງເສດຖະ ກິດ, ບາງຫົວໜ່ວຍທຸລະກິດທີ່ເມືອງ ຄຸ້ມຄອງໄປມອບອາກອນຢູ່ສູນກາງ ແລະມີບາງຫົວໜ່ວຍທຸລະກິດໂອນເງິນໃຫ້ເມືອງບໍ່ທັນເຮັດໃຫ້ເກີດມີໜີ້ຄ້າງມອບ, ການຕິດຕັ້ງເຄື່ອງມືທັນສະໄໝໃນການຈັດເກັບລາຍຮັບບໍ່ໄປຕາມແຜນຈາກແຜນຕິດຕັ້ງໃນປີ 2018 ມີທັງໝົດ 175 ເຄື່ອງສາມາດຕິດຕັ້ງຕົວຈິງໄດ້ພຽງ 163 ເຄື່ອງຍ້ອນບາງຫົວໜ່ວຍທຸລະກິດບໍ່ຈິງໃຈຕໍ່ການນໍາໃຊ້ເຄື່ອງດັ່ງກ່າວ ແລະຫົວໜ່ວຍທຸລະກິດຈໍານວນໜຶ່ງເຊື່ອງອໍາລາຍຮັບ.

  ແນວໃດກໍຕາມເຖິງເມືອງ ຈັນທະບູລີ ຈະເກັບລາຍຮັບບໍ່ໄດ້ຕາມແຜນແຕ່ກໍສາມາດເກັບໄດ້ຫຼາຍພໍສົມຄວນຖ້າທຽບໃສ່ປີຜ່ານມາຍ້ອນເມືອງຈັນທະບູລີ ໄດ້ຮັບເງິນ ໂອນຈາກການເກັບຄ່າທາງລະບົບທັນສະໄໝຈາກນະຄອນຫຼວງວຽງຈັນ, ສ່ວນແຜນລາຍຈ່າຍກໍຫຼຸດລົງຈາກແຜນລາຍຈ່າຍໃນປີ 2018 ມີທັງໝົດ 25,33 ຕື້ກີບ ປະຕິບັດຕົວຈິງ 23,85 ຕື້ກີບ ເທົ່າກັບ 94,18% ທຽບໃສ່ປີ 2017 ຫຼຸດລົງ 1,84%.

   ສໍາລັບປີ 2019 ນີ້ ເມືອງຈັນທະບູລີ ໄດ້ມີມາດຕະການການຈັດຕັ້ງປະຕິບບັດໂດຍສືບຕໍ່ຝຶກອົບຮົມການນໍາໃຊ້ເຄື່ອງທັນສະໄໝໃຫ້ພະນັກງານວິຊາການ, ໂດຍຂໍການຊ່ວຍເຫຼືອຈາກກົມສ່ວຍສາອາກອນ ແລະພະແນກການເງິນ ນະຄອນຫຼວງວຽງຈັນມາຝຶກອົບຮົມລະບົບໄອທີໃຫ້ມີຄວາມເຂັ້ມແຂງເພື່ອຝຶກຕໍ່ໃຫ້ການເງິນຂອງຫົວໜ່ວຍທຸລະກິດໃນການນໍາໃຊ້ເຊື່ອມຕໍ່ລະບົບ POS ແລະຕິດຕັ້ງລະບົບ CRM, ສືບຕໍ່ການເດີນສໍາຫຼວດຍົກຖານອາກອນແຕ່ຫົວປີສໍາລັບຜູ້ປະກອບການທີ່ຍັງມີໜີ້ຄ້າງ ແລະຜູ້ທີ່ບໍ່ປະຕິບັດການນໍາໃຊ້ລະບົບເຄື່ອງທັນສະໄໝຈະເຊີນມາສຶກສາອົບຮົມເພື່ອໃຫ້ເຂົາເຈົ້າເຂົ້າໃຈລະບຽບກົດໝາຍໃນກ ານດໍາເນີນທຸລະກິດ, ສືບຕໍ່ໃຫ້ຫົວໜ່ວຍທຸລະກິດທີ່ມີລາຍຮັບ 400 ລ້ານກີບ ຂຶ້ນໄປໃຫ້ຖືບັນຊີເພື່ອຫຼຸດຜ່ອນການມອບເໝົາໃຫ້ເສຍອາກອນຕາມລາຍຮັບຕົວຈິງຊຶ່ງເປັນມາດຕະການໜຶ່ງທີ່ເມືອງຈະຕ້ອງໄດ້ປະຕິບັດເພື່ອຄວາມຍຸຕິທໍາໃຫ້ສອງຝ່າຍ. ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດລາຍຮັບງົບປະມານໃນປີ 2019 ບັນລຸໄດ້ຕາມແຜນການ.

ໂດຍ: ກິ່ງລັດຕະນະ - ນສພ ເສດຖະກິດ-ສັງຄົມ

แชร์