ການຄ້າແຂວງຜົ້ງສາລີ ສະຫຼຸບວຽກງານ 6 ເດືອນຕົ້ນປີ

  ເມື່ອທ້າຍເດືອນມິຖຸນາຜ່ານມາພະແນກອຸດສາຫະກຳ ແລະການຄ້າແຂວງຜົ້ງສາລີ ໄດ້ເປີດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ວາງທິດທາງ 6 ເດືອນທ້າຍປີ 2020 ທີ່ພະແນກອຸດສາຫະກໍາ ແລະການຄ້າແຂວງຜົ້ງສາລີ ໂດຍການໃຫ້ກຽດເປັນປະທານກອງປະຊຸມຂອງທ່ານ ທະນູຄຳ ປິດຈະວົງ ຫົວໜ້າພະແນກ ອຸດ ສາຫະກຳ ແລະການຄ້າ,ມີທ່ານ ບຸນລົມ ຫົງຄຳ ຮອງຫົວໜ້າພະແນກ,ບັນດາຫົວໜ້າຫ້ອງການ, ຮອງຫົວໜ້າຫ້ອງການອຸດສາຫະກຳ ແລະການຄ້າເມືອງ, ຫົວໜ້າຂະແໜງ, ຮອງຫົວໜ້າຂະແໜງພາຍໃນພະແນກ ແລະພະນັກງານວິຊາການເຂົ້າຮ່ວມ.


ທ່ານ ບຸນລົມ ຫົງຄຳ ກໍໄດ້ລາຍງານໃຫ້ຊາບວ່າ: ກອງປະຊຸມໄດ້ສະຫຼຸບຕີລາຄາຜົນງານການເຄື່ອນໄຫວວຽກງານ 6 ເດືອນຕົ້ນປີຜ່ານມາທຽບໃສ່ແຜນປີ 2020 ເຫັນວ່າ: ຍອດມູນຄ່າການຜະລິດ ແລະການຈຳໜ່າຍອຸດສາຫະກຳປຸງແຕ່ງ ແລະ ຫັດຖະກຳທົ່ວແຂວງປະຕິບັດໄດ້ 182,34 ຕື້ກີບ ທຽບໃສ່ແຜນການປີແມ່ນປະຕິບັດໄດ້ 32,07%; ການຈໍລະຈອນສິນຄ້າພາຍໃນ (ການຄ້າຂາຍຍົກ-ຂາຍຍ່ອຍ ແລະເກັບຊື້ຜະລິດຕະພັນພາຍໃນ) ສາມາດບັນລຸໄດ້ 648,34 ຕື້ກີບ; ມູນຄ່າການນໍາເຂົ້າ ແລະສົ່ງອອກບັນລຸ 190,91 ຕື້ກີບ ຫຼຸດລົງ 3,2% ເມື່ອທຽບໃສ່ໄລຍະດຽວກັນຂອງປີຜ່ານມາ,ໃນນີ້ການສົ່ງອອກບັນລຸ 94,74 ຕື້ກີບ ເພີ່ມຂຶ້ນ 9,8% ແລະການນໍາເຂົ້າ 96,17 ຕື້ກີບ ຫຼຸດລົງ 14,3%; ການແຈ້ງຂຶ້ນທະບຽນ ແລະຄຸ້ມຄອງວິສາຫະກິດຂຶ້ນໃໝ່ ແລະດັດແກ້ 180 ຫົວໜ່ວຍມູນຄ່າທຶນຈົດທະບຽນ 314,32 ຕື້ກີບ ທຽບໃສ່ແຜນປີແມ່ນປະຕິບັດໄດ້ 51,43% ປັດຈຸບັນໃນທົ່ວແຂວງມີທັງໝົດ 2.068 ຫົວໜ່ວຍມີມູນຄ່າຈົດທະບຽນ 1.138 ຕື້ກີບ ໂດຍປະຕິບັດຕາມຂໍ້ຕົກ ລົງສະບັບເລກທີ 0023/ອຄ.ກທຄວ ເຮັດໃຫ້ການຂຶ້ນທະບຽນວິສາຫະກິດຊ້າສຸດເຫຼືອພຽງ 2 ວັນລັດຖະການ ແລະການພັດທະນາສິນຄ້າທ່າແຮງ ແລະສິນຄ້າໜຶ່ງເມືອງໜຶ່ງຜະລິດຕະພັນ “ODOP” ສາມາດພັດທະນາໄດ້ 3 ຫົວໜ່ວຍຄື: ໂຮງງານປຸງແຕ່ງຊາບູຮານແສງຄຳ ລາວລີ ບ້ານຈ່າພູ ເມືອງຜົ້ງສາລີ, ໂຮງຜະລິດເສັ້ນເຝີ ແລະເຂົ້າປຸ້ນສ່ວນບຸກຄົນ ບ້ານພຽງດອກຄຳ ເມືອງບຸນເໜືອ ແລະກຸ່ມແປຮູບຜະລິດຕະພັນໄຄແຜ່ນບ້ານສິນໄຊ ເມືອງຂວາ.
 ພ້ອມດຽວກັນນັ້ນ, ໄດ້ຕໍ່ສັນຍາການນຳໃຊ້ກາໝາຍໂອດັອບແຫ່ງຊາດຂອງແຂວງຜົ້ງສາລີຈຳນວນ 5 ຫົວໜ່ວຍ ຄື: 1) ກຸ່ມຜະລິດນໍ້າເຜິ້ງທຳມະຊາດບ້ານແສນລາດເມືອງຂວາ, 2) ກຸ່ມຜະລິດສິນຄ້າຫັດຖະກໍາແຜ່ນແພບ້ານລ້ອງນານເກົ່າເມືອງບຸນໃຕ້, 3) ຊາພຽງໂມຢາບ້ານບໍ່ກົ້ງເມືອງຜົ້ງສາລີ, 4) ຊາຂຽວຜົ້ງສາລີ, 5) ຊາບັ້ງ ບ້ານລຸ້ງຈີ້ງ ເມືອງຜົ້ງສາລີ.


 ໃນຕອນທ້າຍຂອງກອງປະຊຸມທ່ານ ທະນູຄຳ ປິດຈະວົງ ຫົວໜ້າພະແນກອຸດສາຫະກຳ ແລະການຄ້າກໍໄດ້ສະແດງຄວາມຊົມເຊີຍຕໍ່ບັນດາຜົນງານທີ່ຂະແໜງຂະແໜງ ອຸດສາຫະກຳ ແລະການຄ້າຍາດມາໄດ້ໃນໄລຍະ 6 ຕົ້ນປີ2020 ພ້ອມນີ້ເພື່ອເປັນທິດຊີ້ນຳໃຫ້ແກ່ການເຄື່ອນໄຫວວຽກງານໃນຕໍ່ໜ້າທ່ານຍັງໄດ້ເນັ້ນໃຫ້ສືບຕໍ່ຫັນເອົາ ແຕ່ລະໜ້າທີ່ຫັນເປັນແຜນງານອັນລະອຽດແລ້ວມອບໃຫ້ອ້າຍນ້ອງພາຍໃນຂະແໜງ, ພາຍໃນຫ້ອງການສືບຕໍ່ເອົາໄປຈັດຕັ້ງປະຕິບັດພັດທະນາໜ້າວຽກຂອງຕົນເອງ, ເພີ່ມທະວີຊີ້ນຳ-ນຳພາຫົວໜ່ວຍທຸລະກິດພາຍໃນເມືອງຂອງຕົນໃຫ້ມີຄວາມເຂັ້ມແຂງ, ສ້າງປະຊາກອນຫົວໜ່ວຍທຸລະກິດໃຫ້ເຕີບໃຫຍ່ຂະຫຍາຍຕົວ, ສຸມໃສ່ຜັນຂະ ຫຍາຍແຜນພັດທະນາ 5 ປີ ຂອງພະແນກຂອງເມືອງໃຫ້ສັບຊ້ອນບັນດາວຽກເຂົ້າກັນແລ້ວນຳໄປຈັດຕັ້ງປະຕິບັດໃຫ້ໄດ້ຮັບຜົນດີ, ສືບຕໍ່ປະສານງານລະຫວ່າງສາຍຕັ້ງ-ສາຍຂວາງໂດຍກົນໄກທີ່ທັນສະໄໝ, ຮຽກຮ້ອງໃຫ້ຫົວໜ້າຫ້ອງການອຸດສາຫະກຳ ແລະການຄ້າເມືອງນຳເອົາວິໄສທັດຂອງພະແນກ ແລະທິດທາງແຜນການ 6 ເດືອນທ້າຍປີ 2020 ນຳໄປສະເໜີຕໍ່ການນຳຂອງເມືອງໄປຜັນຂະຫຍາຍໃນການຈັດຕັ້ງປະຕິບັດ.

แชร์