ຊຸມຊົນ 4 ເມືອງເປົ້າໝາຍສືບຕໍ່ອະນຸລັກຊີວະນາໆພັນໄລຍະ 2

ໃນວັນທີ 30 ມິຖຸນາ 2020 ທີ່ສະໂມສອນພະແນກກະສິກຳ ແລະປ່າໄມ້ແຂວງໄດ້ຈັດກອງປະຊຸມເລີ່ມຕົ້ນໂຄງການສືບຕໍ່ໄລຍະ 2 ຂອງໂຄງການອະນຸລັກຊີວະນາໆພັນທີ່ສຳຄັນໃນເຂດດິນບໍລິເວນນໍ້າແບບມີສ່ວນຮ່ວມຂອງຊຸມຊົນໃນ 4 ເມືອງ ເປົ້າໝາຍ,ຂອງແຂວງສະຫວັນນະເຂດ,ໂດຍການເຂົ້າຮ່ວມເປັນປະທານຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ມີທ່ານຮອງຫົວໜ້າພະແນກກະສິກຳ ແລະປ່າໄມ້ແຂວງ, ຊ່ຽວຊານປະຈຳໂຄງການ, ພະແນກການກ່ຽວຂ້ອງ, ມີທ່ານຮອງເຈົ້າເມືອງ ແລະຫ້ອງການກະສິກຳປ່າໄມ້ 4 ເມືອງເປົ້າໝາຍເຂົ້າຮ່ວມມີເມືອງຈຳພອນ, ເມືອງສອງຄອນ, ເມືອງຊົນນະບູລີ ແລະເມືອງໄຊບູລີ.

  ທ່ານ ອຸດົມໄຊ ທອງສະຫວັດ ປະສານງານໂຄງການໄດ້ສະຫຼຸບການເຄື່ອນໄຫວກິດຈະກຳໄລຍະທີ 1 ຊຶ່ງໄດ້ກຳນົດເຂດອະນຸລັກວັງສະຫງວນແຂ້ ແລະສັດນໍ້າອື່ນໆໄດ້ 11 ແຫ່ງ, ມີເນື້ອທີ່ 2.550 ເຮັກຕາ, ໃນ 9 ບ້ານ 4 ເມືອງເປົ້າໝາຍ, ມີການສ້າງກົດລະບຽບໃນການຄຸ້ມຄອງ, ສ້າງຕັ້ງຄະນະກຳມະການຄຸ້ມຄອງຄົບຊຸດ, ໄດ້ມີການພັດທະນາໜອງປາ ແລະຊົນລະປະທານ, ຍົກລະດັບຄັນຄູກັນນໍ້າໃຫ້ປະຊາຊົນໄດ້ນຳໃຊ້ນໍ້າເຂົ້າໃນການຜະລິດ, ຈາກ 25 ເຮັກຕາມາເປັນ 110 ເຮັກຕາ, ລົງສຳຫຼວດທີ່ຢູ່ອາໄສ ແລະສຳຫຼວດຮັງໄຂ່ແຂ້ 78 ຄັ້ງ, ພົບຮັງໄຂ່ແຂ້ 7 ຮັງ, ພົບໄຂ່ແຂ້ 112 ໜ່ວຍ ແລະມາຟັກທຽມໄດ້ 65 ໂຕ ແລະ ໄດ້ປ່ອຍຄືນສູ່ທຳມະຊາດແລ້ວ, ນອກນີ້ກໍ່ມີວຽກປິ່ນອ້ອມອື່ນໆໃນຂົງເຂດການສຶກສາ, ຂົງເຂດທ່ອງທ່ຽວລວມທັງການປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃນເຂດໂຄງການ,ສຳລັບໂຄງການໄລຍະ 2 ມີກຳນົດ 5 ປີເລີ່ມແຕ່ປີ 2020 ຮອດ 2025, ໂດຍມີງົບປະມານ 1.213.862 ໂດລາສະຫະລັດ, ປະຕິບັດໃນ 6 ບ້ານຂອງເມືອງຈຳພອນ, 3 ບ້ານຂອງເມືອງຊົນນະບູລີ, ເມືອງສອງຄອນ ແລະ 1 ບ້ານຂອງເມືອງໄຊບູລີ, ຈຸດປະສົງຂອງໂຄງການແມ່ນເພື່ອຄຸ້ມຄອງເຂດດິນບໍລິເວນນໍ້າໂດຍການມີສ່ວນຮ່ວມຂອງຊຸມຊົນ ແລະສະ ໜອງຜົນປະໂຫຍດໄລຍະຍາວໂດຍການເຊື່ອມໂຍງລະຫວ່າງການປັບປຸງຊີວິດການເປັນຢູ່ຂອງຊຸມຊົນໃນພື້ນທີ່ໂຄງການໃຫ້ດີຂຶ້ນ,ຊຶ່ງໄດ້ຈາກການປົກປັກຮັກສາຊີວະນາໆພັນ, ການຟື້ນຟູຊະນິດພັນສັດທີ່ໄກ້ຈະສູນພັນ, ການປັບປຸງການບໍລິການຂອງລະບົບນິເວດ ແລະການຫຼຸດຜ່ອນການທຳລາຍຖິ່ນທີ່ຢູ່ອາໄສຂອງສັດລວມທັງປ່າໄມ້ໃນເຂດດິນບໍລິເວນນໍ້າ.

 ໂອກາດກ່າວເປີດກອງປະຊຸມທ່ານຮອງເຈົ້າແຂວງສະຫວັນນະເຂດຍົກໃຫ້ເຫັນວ່າ: ທີ່ດິນບໍລິເວນນໍ້າແມ່ນເປັນປັດໄຈຕົ້ນຕໍທີ່ຄວບຄຸມສະພາບແວດລ້ອມ ແລະຊີວິດຂອງພືດ ແລະສັດ,ມີຄຸນຄ່າທາງດ້ານເສດຖະກິດຢ່າງຫຼວງຫຼາຍ, ມັນຊ່ວຍເກັບກັກນໍ້າ, ສະໜອງນໍ້າໃນການຜະລິດກຳສິກຳ, ສັດລ້ຽງ, ການປະມົງ, ເປັນທີ່ຢູ່ອາໄສຂອງສັດຫຼາຍຊະນິດ, ໂດຍສະເພາະແມ່ນແຂ້ນໍ້າຈືດພັນພື້ນເມືອງຂອງລາວ, ເຕົ່າ, ປາຝາ ແລະປານາໆຊະນິດ, ເມື່ອເຫັນຄວາມສຳຄັນແນວນັ້ນ ເພື່ອອະນຸລັກຮັກສາ ແລະນຳໃຊ້ໃຫ້ເກີດປະໂຫຍດສູງສຸດ ແລະຍືນຍົງໄດ້ຈຶ່ງຕ້ອງມີການວາງແຜນ ແລະການມີສ່ວນຮ່ວມຂອງຊຸມຊົນ, ຊຶ່ງມັນກໍ່ແມ່ນໂຄງການທີ່ມີສ່ວນຮັບຜິດຊອບຕໍ່ແນວທາງນະ ໂຍບາຍຂອງພັກ ແລະລັດຖະບານກ່ຽວກັບການປົກປັກຮັກສາ ແລະນຳໃຊ້ຊັບພະຍາກອນທຳມະຊາດຕາມທິດສີຂຽວ ແລະຍືນຍົງ.

แชร์