ຫຼວງພະບາງ ສະຫຼຸບໂຄງການຮັກສາສຸຂະພາບຂັ້ນຕົ້ນ

   ກອງປະຊຸມໂຄງການຮັກສາສຸຂະພາບຂັ້ນຕົ້ນໄຕມາດ 2 ປະຈໍາປີ 2020 ທົ່ວແຂວງຫຼວງພະບາງໄດ້ດໍາເນີນນັບແຕ່ວັນທີ 1-3 ກໍລະກົດ 2020 ຢູ່ຫ້ອງປະຊຸມຂະ ແໜງຄວບຄຸມພະຍາດຕິດຕໍ່ພະແນກສາທາລະນະສຸກແຂວງຫຼວງພະບາງໂດຍເປັນປະທານຂອງ ທ່ານ ນິພອນ ສິມພາລີ ຮອງຫົວໜ້າພະແນກສາທາລະນະສຸກແຂວງຫຼວງພະບາງ, ທ່ານ ນາງ ອຳມາລິນ ວົງສິດທິ ຜູ້ອຳນວຍການໂຄງການຮັກສາສຸຂະພາບຂັ້ນຕົ້ນອົງການຊ່ວຍເຫຼືອເດັກສາກົນປະຈຳ ແຂວງຫຼວງພະບາງ, ມີຜູ້ຕາງໜ້າຈາກຂະແໜງການພາຍໃນພະແນກສາທາລະນະສຸກແຂວງ, ຫ້ອງການສາທາລະນະສຸກ 8 ເມືອງເຂົ້າຮ່ວມ.

  ທ່ານ ນິພອນ ສິມພາລີ ຮອງຫົວໜ້າພະແນກສາທາລະນະສຸກ ແຂວງຫຼວງພະບາງກ່າວວ່າ: ກອງປະຊຸມຄັ້ງນີ້ບັນດາ 8 ເມືອງທີ່ເຂົ້າຮ່ວມຄືເມືອງນານ, ຊຽງເງິນ, ປາກອູ, ນໍ້າບາກ, ງອຍ, ວຽງຄຳ, ປາກແຊງ ແລະ ນະຄອນຫຼວງພະບາງຈະໄດ້ພ້ອມກັນທົບທວນ ແລະ ຕີລາຄາຄືນການຈັດຕັ້ງປະຕິບັດວຽກງານຮັກສາສຸຂະພາບຂັ້ນຕົ້ນຢູ່ແຂວງຫຼວງພະບາງໃນໄລຍະ 3 ເດືອນຜ່ານມາ ແລະ ວາງທິດທາງ 3 ເດືອນຕໍ່ໜ້າ, ໂດຍສະເພາະແມ່ນຄວາມຄືບໜ້າການຈັດຕັ້ງປະຕິບັດວຽກງານຮັກສາສຸຂະ ພາບຂັ້ນຕົ້ນ ແລະວຽກງານໂພສະນາການຢູ່ບັນດາເມືອງ ແລະນະຄອນເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະບົດຮຽນທີ່ຖອດຖອນໄດ້ເພື່ອວາງມາດຕະການສືບຕໍ່ແກ້ໄຂ້ຕໍ່ໜ້ານອກນີ້, ຈະໄດ້ພ້ອມກັນປຶກສາຫາລືແລກປ່ຽນບົດຮຽນຢູ່ແຕ່ລະຂັ້ນ ແລະແຕ່ລະຂະແໜງການແນໃສ່ເຮັດໃຫ້ການປະຕິບັດ 12 ແຜນງານໃຫຍ່ທີ່ໂຄງການຮັກສາສຸຂະພາບຂັ້ນຕົ້ນວາງອອກໃຫ້ມີຜົນສຳເລັດ ແລະບັນລຸຕາມຄາດໝາຍທີ່ວາງໄວ້.

   ພ້ອມນີ້ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານຄວາມຄືບໜ້າວຽກງານແຕ່ລະດ້ານຂອງຂະແໜງການພາຍໃນພະແນກສາທາລະນະສຸກແຂວງ, ລວມທັງຫ້ອງການສາທາລະນະສຸກເມືອງ ແລະ 1 ນະຄອນເປັນຕົ້ນການຄວບຄຸມ ແລະການລະບາດຂອງພະຍາດສາຍພັນໃໝ່ ຫຼືໂຄວິດ-19, ການປະຕິບັດວຽກງານຄວບຄຸມ ແລະປ້ອງກັນການຕິດເຊື້ອຢູ່ໂຮງໝໍແລະສຸກສາລາ, ວຽກງານການປິ່ນປົວເດັກໃນໂຮງໝໍ ແລະສຸກສາລາ, ວຽກງານຮັກສາສຸຂະພາບຂັ້ນຕົ້ນ, ວຽກງານໂພສະນາການ, ວຽກງານສ້າງຄວາມເຂັ້ມແຂງຂອງແມ່ຍິງ, ການຈັດຕັ້ງປະຕິບັດວຽກງານໂພສະນາການກັບກຸ່ມໄວໜຸ່ມຢູ່ໂຮງຮຽນມັດທະຍົມຕົ້ນ, ການປັບປຸງ, ສຳຫຼວດຂໍ້ມູນ, ການອອກແບບລະບົບກໍ່ສ້າງນໍ້າສະອາດ, ວຽກງານອະນາໄມ ແລະວຽກງານອື່ນໆປິ່ນອ້ອມ.

_____________

ຂ່າວ: ສີສຸວັນ,  ໜັງສືພິມເສດຖະກິດ-ສັງຄົມ

แชร์