ເປີດນຳໃຊ້ທາງຟ້າງຸ່ມ, ທາງໄກສອນ ພົມວິຫານ ແລະສະໜາມຂີ້ເຫຍື້ອບ້ານຊອກ

 ພິທີມອບ-ຮັບ ແລະເປີດນຳໃຊ້ຢ່າງເປັນທາງການໂຄງການກໍ່ສ້າງທາງໄກສອນ ພົມວິຫານ, ທາງຟ້າງຸ່ມ ແລະສະໜາມຂີ້ເຫຍື້ອບ້ານຊອກສຳລັບໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກ ອະນຸພາກພື້ນແມ່ນໍ້າຂອງໄດ້ຈັດຂຶ້ນໃນວັນທີ 1 ກໍລະກົດ 2020 ທີ່ສວນສາທາລະນະໄກສອນ ພົມວິຫານ ໂດຍການເປັນກຽດເຂົ້າຮ່ວມໃນພິທີຄັ້ງນີ້ຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ທ່ອນແກ້ວ ພຸດທະໄກຍາລາດຮອງເຈົ້າ ແຂວງສະຫວັນນະເຂດ ພ້ອມດ້ວຍຄະນະນຳຈາກສູນກາງ ແລະທ້ອງຖິ່ນ, ແຂກຖືກເຊີນຕະຫຼອດເຖິງຄະນະນຳ, ຊ່ຽວຊານ ແລະທີ່ປຶກສາໂຄງການ GMS ແລະບໍລິສັດຜູ້ຮັບເໝົາກໍ່ສ້າງໂຄງການເຂົ້າຮ່ວມ.

 ທ່ານ ໄຊຍະເສນ ແກ້ວວິໄລສັກ ຫົວໜ້າພະແນກໂຍທາທິການ ແລະຂົນສົ່ງແຂວງສະຫວັນນະເຂດໄດ້ລາຍງານໃຫ້ຮູ້ໂດຍຫຍໍ້ກ່ຽວກັບການຈັດຕັ້ງປະຕິບັດ 3 ໂຄງການກໍ່ສ້າງທີ່ຈະໄດ້ມອບ-ຮັບກັນໃນຄັ້ງນີ້ຊຶ່ງທັງ 3 ໂຄງການແມ່ນນອນໃນ 7 ໜ້າວຽກຫຼັກຂອງໂຄງການ GMS ຊຶ່ງເປັນໂຄງການເງິນກູ້ຢືມ ແລະຊ່ວຍເຫຼືອລ້າຈາກທະນາ ຄານພັດທະນາອາຊີ ແລະທຶນສົມທົບຂອງລັດຖະບານລາວລວມມີມູນຄ່າທັງໝົດ 47,74 ລ້ານໂດລາ ໃນນີ້ສຳລັບໂຄງການກໍ່ສ້າງທາງໄກສອນພົມວິຫານມີຄວາມຍາວ 6,18 ກິໂລແມັດ, ມູນຄ່າ 7,54 ລ້ານໂດລາ, ພື້ນໜ້າທາງປູດ້ວຍຢາງຂົ້ວຄວາມໜາ 7 ຊັງຕີແມັດ, ປະກອບມີ 4 ເລນ, ເບື້ອງລະ 2 ຊ່ອງການຈໍລະຈອນ, ມີທາງລົດຈັກ ແລະລົດຖີີບກວ້າງເບື້ອງລະ 1,5 ແມັດ, ລວມຄວາມກວ້າງ 2 ເບື້ອງ 24 ແມັດ, ກໍ່ດອນກາງກວ້າງ 2,4 ແມັດ, ມີໜານປູກດອກໄມ້ໃຫ້ຟຸ່ມ ແລະປູກ ຫຍ້າລວມທັງໝົດ432 ໜານ, ມີການຕິດຕັ້ງໄຟເຍືອງທາງທັງໝົດ 213 ຕົ້ນ ເປັນດອກຄູ່, ປູກໄມ້ແຄມທາງ 2 ເບື້ອງ, ມີທາງຍ່າງ 2 ເບື້ອງ, ມີວົງວຽນ 2 ຈຸດຄື: ວົງ ວຽນສັນຍາລັກອາຊຽນ ແລະວົງວຽນກະບອງພ້ອມນີ້ຍັງມີໜ້າວຽກເພີ່ມອີກຄືທາງເຂົ້າສະໜາມບິນຄວາມຍາວ 730 ແມັດ, ມູນຄ່າ  3,56 ແສນ ໂດລາ, ປູຢາງຂົ້ວໜາ 5 ຊັງຕີແມັດ, ປະກອບມີເສົາໄຟ 17 ຕົ້ນ ແລະປູກຕົ້ນຈຳປາ 2 ຂ້າງທາງໂດຍແມ່ນບໍລິສັດລັດວິສາຫະກິດກໍ່ສ້າງທາງເລກ 8; ສ່ວນໂຄງການກໍ່ສ້າງທາງຟ້າງຸ່ມມີ ຄວາມຍາວ 2,14 ກິໂລແມັດ, ໜ້າທາງປູຢາງຂົ້ວໜາ 5 ຊັງຕີແມັດ, ມູນຄ່າກໍ່ສ້າງ 2,28 ລ້ານໂລດາ, ຕິດຕັ້ງໄຟເຍືອງທາງແຂນດ່ຽວ 24 ຕົ້ນ, ບັບແຂນຄູ່ຢູ່ສວນ 46 ຕົ້ນ ປູກຕົ້ນໄມ້ພິກຸນສອງເບື້ອງ 240 ຕົ້ນ, ມີເນື້ອທີ່ສວນສາທາ 21,760 ຕາແມັດ, ມີຫ້ອງຂາຍເຄື່ອງທີ່ລະລຶກ ແລະ ເຄື່ອງດື່ມຂະໜາດ  7x12 ແມັດ, 1 ຫຼັງໃນສວນປະກອບມີຕົ້ນໄມ້ທັງໝົດ 345 ຕົ້ນ ພ້ອມນັ້ນກໍ່ມີລານອະເນກປະສົງ, ວົງວຽນກອງ, ຫໍໂມງ ແລະ ປ້າຍຊື່ສວນອີກດ້ວຍຊຶ່ງຮັບເໝົາການກໍ່ສ້າງໂດຍບໍລິສັດຈຳປາຄຳກໍ່ສ້າງສ້ອມແປງຂົວທາງ ແລະເຄຫາສະຖານຈຳກັດຜູ້ດຽວ.

  ສຳລັບໂຄງການສະໜາມຂີ້ເຫຍື້ອບ້ານຊອກລວມມີເນື້ອທີ່ຂອງໂຄງການ 10 ເຮັກຕາ, ໂດຍສະໜາມຂີ້ເຫຍື້ອມີມູນຄ່າໃນການກໍ່ສ້າງທັງໝົດ 1,65 ລ້ານໂດລາ ປະ ກອບດ້ວຍສິ່ງປຸກສ້າງເພື່ອອໍານວຍຄວາມສະດວກດັ່ງນີ້: ລະບົບຊິງຊັ່ງ 1 ຈຸດ, ອາຄານຫ້ອງການບໍລິຫານ, ທາງເບຕົງຍາວ 561 ແມັດ, ມີຮ່ອງນໍ້າຂ້າງທາງ,ມີຫ້ອງນໍ້າ, ອາຄານຄັດແຍກຂີ້ເຫຍື້ອ,ອາຄານຜະລິດຝຸ່ນບົ່ມ,ອາຄານຕາກອາຈົມ,ຂຸມຖິ້ມຂີ້ເຫຍື້ອໃໝ່ເນື້ອທີ່ 3,08 ເຮັກຕາ, ໜອງບຳບັດນໍ້າເສຍລະບົບເຕີມອາກາດ, ໜອງບຳບັດນໍ້າເສຍຕົກຕະກອນ, ປ້ອມຍາວ, ຮົ້ວອ້ອມສະໜາມ, ໝໍ້ແປງໄຟຟ້ານອກນັ້ນຍັງມີການສະໜອງອຸປະກອນອື່ນໆເຂົ້າໃນການກຳຈັດ, ການເຮັດຝຸ່ນບົ່ມ ແລະການ

ນຳເອົາຂີ້ເຫຍື້ອມານຳໃຊ້ຄືນໃໝ່ຊຶ່ງປະກອບມີພາຫະນະດັ່ງນີ້: ລົດຈົກ 1 ຄັນ, ລົດດ້າມ 2 ຄັນ, ລົດເກັບຂີ້ເຫຍື້ອອັດແໜ້ນ 8 ແມັດກ້ອນ 2 ຄັນ, ລົດເກັບຂີ້ເຫຍື້ອ 6 ແມັດກ້ອນ 2 ຄັນ, ລົດລ້າງທາງ-ດູດນໍ້າເປື້ອນ1 ຄັນ, ລົດປັດຝຸ່ນ 1 ຄັນ ຖັງຂີ້ເຫຍື້ອບັນຈຸ 120 ລິດ 400 ຖັງ, ມູນຄ່າ 709.000 ໂດລາ ແລະ ຈະນຳເຂົ້າພາຫະນະຕື່ມອີກໃນທ່ີງວດ 2 ຄາດວ່າໃນເດືອນ 8 ປີ 2020 ນີ້ ຊຶ່ງປະກອບມີ: ລົດຕັກນ້ອຍຕີນຂີ້ເຂັບ 1 ຄັນ, ລົດດູດນໍ້າເປື້ອນ (ອາຈົມ) 2 ຄັນ, ລົດດູດສຳລັບສະໜາມຂີ້ເຫຍື້ອ 1 ຄັນ, ລົດຕັກຕີນຢາງພ້ອມມີບ່ວງເຂິງ 1 ຄັນ, ເຄື່ອງເຂິງຮ່ອນແບບໝູນ 1 ເຄື່ອງ ແລະ ເຄື່ອງຈັກໜີບ 1 ເຄື່ອງ ແລະ ເຄື່ອງຈັກບົດກະຕຸກຢາງ 1 ເຄື່ອງ,ລວມມູນຄ່າ 8,56 ແສນໂດລາ,ລວມມູນຄ່າອຸປະກອນທັງໝົດຈຳນວນ 1,56 ລ້ານໂດລາ ໂດຍແມ່ນບໍລິສັດວີເອັສ໌ພີກໍ່ສ້າງຈຳກັດຜູ້ດຽວເປັນຜູ້ຮັບເໝົາການກໍ່ສ້າງ.

แชร์