ເຂດ 3 ຕີລາຄາວຽກງານ 6 ເດືອນຕົ້ນປີ ພ້ອມວາງທິດທາງແຜນການທ້າຍປີ 2020

  ກອງປະຊຸມສະຫຼຸບວຽກງານປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນ ທ້າຍປີ 2020 ຂອງເຂດຈຸດສຸມພັດທະນາທີ 3 ຈັດຂຶ້ນໃນວັນທີ 23 ມິຖຸນາຜ່ານມາ ທີ່ຫ້ອງການບ້ານໃຫຍ່ກຳກອກ ເມືອງທ່າແຕງ ແຂວງເຊກອງ ໃຫ້ກຽດເປັນປະທານໂດຍ ທ່ານ ສີສົມພາ ໄຊແກ້ວຍະວົງ ກໍາມະການພັກເມືອງຫົວໜ້າເຂດຈຸດສຸມພັດທະນາທີ 3, ມີຄະນະພັກ, ອົງການປົກຄອງບ້ານພ້ອມດ້ວຍສອງກໍາລັງ ປກຊ , ປກສ 11 ໝູ່ບ້ານທີ່ຂຶ້ນກັບເຂດເຂົ້າຮ່ວມ.

   ທ່ານ ສີສົມພາ ໄຊແກ້ວຍະວົງ ກໍາມະການພັກເມືອງຫົວໜ້າເຂດຈຸດສຸມພັດທະນາທີ 3 ໄດ້ຕີລາຄາຄືນການຊີ້ນໍາໆພາວຽກງານຮອບດ້ານໃນໄລຍະ 6 ເດືອນຕົ້ນປີ 2020 ໂດຍຍົກໃຫ້ເຫັນທັງດ້ານດີ ແລະດ້ານອ່ອນໃນແຕ່ລະຂົງເຂດວຽກງານໂດຍສະເພາະວຽກງານການເມືອງນໍາພາແນວຄິດໄດ້ນໍາພາໜ່ວຍພັກ, ສະມາຊິກພັກ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນຕະຫຼອດຮອດປະຊາຊົນບັນດາເຜົ່າຈັດຕັ້ງເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງ ລັດຕາມ 4 ເນື້ອໃນ 4 ຄາດ ໝາຍ ແລະຕາມທິດ 3 ສ້າງ ໂດຍຕິດພັນກັບການແກ້ໄຂຄວາມທຸກຍາກ ແລະຈັດຕັ້ງປັບປຸງກໍ່ສ້າງລະບົບການເມືອງຢູ່ຂັ້ນບ້ານໃຫ້ມີຄວາມ ເຂັ້ມແຂງໂດຍຖືເອົາການກໍ່ສ້າງໜ່ວຍພັກ, ສະມາຊິກພັກເປັນພື້ນຖານຊຶ່ງເຮັດໃຫ້ອົງການປົກຄອງບ້ານສາມາດນໍາພາ, ຄຸ້ມຄອງບໍລິຫານບ້ານເປັນຢ່າງດີພ້ອມດຽວກັນກໍໄດ້ຂະຫຍາຍສະມາຊິກພັກໄດ້ທັງໝົດ 256 ສະຫາຍ, ຍິງ 46 ສະຫາຍ, ສ້າງໜ່ວຍພັກແຂງໄດ້ 11 ໜ່ວຍພັກ, ສູ້ຊົນຈັດເກັບເກັບລາຍຮັບໄດ້ 48,17 ລ້ານກີບ ທຽບໃສ່ແຜນປີປະຕິບັດໄດ້ 87%, ໂດຍລວມທົ່ວເຂດຈຸດສຸມພັດທະນາທີ 3 ມີລາຍຮັບຈາກການຂາຍມັນຕົ້ນທັງໝົດ 13 ຕື້ກວ່າກີບ,ສົ່ງຜົນເຮັດໃຫ້ເສດຖະກິດ ແລະຊີວິດການເປັນຢູ່ຂອງປະຊາຊົນດີຂຶ້ນເທື່ອລະກ້າວ.

 ສ່ວນ 6 ເດືອນທ້າຍປີນີ້ ທ່ານ ສີສົມພາ ໄຊແກ້ວຍະວົງ ໄດ້ຊີ້ໃຫ້ເຫັນວ່າ: ໂດຍສືບຕໍ່ສ້າງເງື່ອນໄຂ ແລະເອື້ອອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມມີຄວາມຈຳເປັນຕ້ອງເອົາໃຈໃສ່ຢ່າງເຄັ່ງຄັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ແຕ່ລະຂັ້ນຂອງພັກໃຫ້ເປັນປົກກະຕິຕໍ່ເນື່ອງດ້ວຍການເພີ່ມທະວີຄວາມສາມັກຄີພາຍໃນພັກໃຫ້ໜັກແໜ້ນເຂັ້ມແຂງ ແລະກວ້າງຂວາງກວ່າເກົ່າ.

___________

ຂຽນໂດຍ: ລັດຕະນາ ຄຳສົມພູ

แชร์