ສ້ອມແປງເສັ້ນທາງເມືອງລອງຫາເມືອງເມິງໃຫ້ທຽວໄດ້ສອງລະດູ

  ທ່ານ ຈີນ ກິລິວົງ ຮອງຫົວໜ້າຫ້ອງການໂຍທາທິການ ແລະຂົນສົ່ງເມືອງ ລອງໃຫ້ຮູ້ວ່າ: ເສັ້ນທາງເມືອງລອງ ແຂວງຫຼວງນໍ້າທາຫາເມືອງເມິງ ແຂວງບໍ່ແກ້ວ ໄດ້ຮັບການທະລຸໃນປີ 2002 ມີ ຄວາມຍາວທັງໝົດ 40 ກວ່າກິໂລແມັດ ໃນນີ້ຊາຍແດນເມືອງລອງເລີ່ມແຕ່ບ້ານຊຽງກົກຫາຂົວນໍ້າຟ້າທີ່ເປັນຊາຍແດນເຊື່ອມຕໍ່ເມືອງເມິງມີຄວາມຍາວ 11,3 ກິໂລແມັດ ເສັ້ນທາງດັ່ງກ່າວເປັນເສັ້ນທາງດິນແດງກວ້າງ 6 ແມັດ, ການສັນຈອນໄປມາພົບຄວາມຫຍຸ້ງຍາກໂດຍສະເພາະແມ່ນຊ້ວງລະດູຝົນ, ມາເຖິງປະຈຸບັນບໍລິສັດເຈິງຢຸຍເຊີ້ງໄດ້ເຂົ້າໄປລົງທຶນສໍາປະທານທີ່ີດິນເຂດເມືອງເມິງເພື່ອທໍາການຜະລິດກະສິກໍາສົ່ງອອກໄດ້ບູລະນະສ້ອມແປງເສັ້ນທາງເຊື່ອມຕໍ່ລະຫວ່າງ 2 ເມືອງ ຂອງ 2 ແຂວງຫຼວງນໍ້າທາ-ບໍ່ແກ້ວໃຫ້ສາມາດສັນຈອນໄປມາໄດ້ຕະຫຼອດປີ.
  ທ່ານ ຫວັງ ເສົາຟາ ປະທານບໍລິສັດ ເຈິງຢຸຍເຊີ້ງ ໄດ້ລາຍງານວ່ານັບແຕ່ປີ 2019 ມາເຖິງປະຈຸບັນບໍລິສັດຂອງຕົນໄດ້ສ້ອມແປງເສັ້ນທາງລະຫວ່າງເມືອງລອງຫາເມືອງເມິງເພື່ອໃຫ້ມີຄວາມສະດວກໃນການທຽວໄປມາເປັນຕົ້ນແມ່ນໄດ້ຕັດແປງເສັ້ນທາງເຂດທີ່ຄົດໂຄ້ງກັນດານໃຫ້ກວ້າງອອກ, ສ້ອມແປງບ່ອນທີ່ເປັນບວກຂຸມລວມມູນຄ່າ 4 ຕື້ກ່ວາກີບ ພ້ອມທັງໄດ້ກໍ່ສ້າງຂົວນໍ້າອອນຮ່ວມກັບອົງການປົກຄອງເມືອງລອງ 1 ຈຸດ ແລະ ສ້ອມແປງຂົວນໍ້າຟ້າເສີມໂຄງສ້າງສ່ວນເທິງໃຫ້ສາມາດຮອງຮັບນໍ້າ ໜັກໄດ້ຫຼາຍກວ່າເກົ່າມູນຄ່າ 1 ຕື້ກ່ວາກີບ, ທັງນີ້ກໍ່ເພື່ອເປັນການປະກອບສ່ວນຊ່ວຍເຫຼືອຮ່ວມພັດທະນາກັບພາກສ່ວນລັດ ແລະສັງຄົມເວົ້າລວມເວົ້າສະເພາະກໍ່ຄືການດໍາເນີນກິດຈະການຂອງບໍລິສັດໃນການຜະລິດປູກຝັງດ້ານກະສິກໍາເປັນຕົ້ນແມ່ນປູກກ້ວຍ, ແຕງໂມ, ໝາກອຶ, ໝາກຖົ່ວ, ມັນຕົ້ນ, ອ້ອຍ ແລະໄມ້ໃຫ້ໝາກຕ່າງໆເປັນສິນຄ້າສົ່ງອອກໄປ ສປ ຈີນ ສາມາດຂົນສົ່ງໃຫ້ມີຄວາມສະດວກດີຂຶ້ນ.
  ທ່ານຍັງໃຫ້ຮູ້ຕື່ມວ່າ: ການຈັດຕັ້ງປະຕິບັດວຽກງານການກໍ່ສ້າງແມ່ນພົບຄວາມຫຍຸ້ງຍາກຫຼາຍ, ເຮັດໃຫ້ການຂົນສົ່ງນໍາເຂົ້າເຄື່ອງວັດສະດຸ ແລະເຄື່ອງກົນຈັກການກໍ່ ສ້າງຫຼ້າຊ້າບໍ່ທັນຕອບສະໜອງໄດ້ຕາມຄວາມຕ້ອງການຍ້ອນການລະບາດຂອງເຊື້ອພະຍາດໂຄວິດ-19 ແລະປີ 2021 ທາງບໍລິສັດໄດ້ມີແຜນຍົກລະດັບຈາກເສັ້ນທາງດິນແດງເປັນເສັ້ນທາງປູແຮ່ນັບແຕ່ເມືອງລອງຫາເມືອງເມິງຕື່ມອີກ.

_____________

ຂ່າວ: ມຸນຕີ, ໜັງສືພິມເສດຖະກິດ-ສັງຄົມ

แชร์