ສເກົາຫຼີຊຸກຍູ້ການສົ່ງອອກໄປຍັງຕະຫຼາດອາຊຽນ

   ສ ເກົາຫຼີເປີດເຜີຍໃນວັນທີ 11 ກຸມພາຜ່ານມາວ່າເລີ່ມວາງແຜນຫຼຸດການເພິ່ງພາການສົ່ງອອກສິນຄ້າໄປຍັງ ສປ ຈີນ ໂດຍເລັ່ງຊຸກຍູ້ການສົ່ງອອກໄປຍັງຕະຫຼາດອາຊຽນເພີ່ມຫຼາຍຂຶ້ນ.

   ຕາມຂ່າວຕ່າງປະເທດລາຍງານວ່າ ທ່ານ ຄິມ ຮະຢຸນ ຊອງ ລັດຖະມົນຕີວ່າການກະຊວງການຄ້າຂອງ ສ ເກົາຫຼີ ເປີດເຜີຍວ່າ ສ ເກົາຫຼີ ມີແຜນການຫຼຸດການເພິ່ງພາການສົ່ງອອກໄປຍັງຈີນ ແລະ ຈະຫັນໄປສົ່ງອອກສິນຄ້າໄປຍັງປະເທດອື່ນໆ ໂດຍສະເພາະປະເທດໃນອາຊຽນ, ຊຶ່ງຖະແຫຼງການດັ່ງກ່າວມີຂຶ້ນໃນກອງປະຊຸມເຈົ້າໜ້າທີ່ພາກລັດ ແລະພາກອຸດສາຫະກຳຂອງ ສ ເກົາຫຼີ ໃນວັນທິີ 11 ກຸມພາຜ່ານມາໂດຍໃນກອງປະຊຸມເນັ້ນໜັກການຍົກລະດັບການຄ້າ, ໂດຍລາຍງານລະບຸວ່າ ຂະນະນີ້ ສ ເກົາຫຼີ ກຳລັງພະຍາຍາມເຈລະຈາເພື່ອບັນລຸຂໍ້ຕົກລົງການຄ້າເສລີກັບຟິລິບປິນ, ອິນໂດເນເຊຍ ແລະມາເລເຊຍ ຊຶ່ງເປັນສ່ວນໜຶ່ງຂອງຄວາມພະຍາຍາມໃນການຫຼຸດເພິ່ງພາການສົ່ງອອກໄປຍັງຈີນ ແລະພະຍາຍາມເຂົ້າເຖິງຕະຫຼາດເກີດໃໝ່.

   ທັງນີ້ ການຂະຫຍາຍຕົວຂອງການສົ່ງອອກສິນຄ້າຈາກ ສ ເກົາຫຼີ ໄປຍັງປະເທດໃນອາຊີຕາເວັນອອກສຽງໃຕ້ (ອາຊຽນ) ໃນປີ 2017 ເພີ່ມຂຶ້ນຈຸລະດັບ 16,6% ໂດຍສິນຄ້າສົ່ງອອກສ່ວນໃຫຍ່ຄືໜ້າຈໍໂທລະພາບ ແລະສິນຄ້າບໍລິໂພກຫຼາກຫຼາຍປະເພດ.

• 12/02/2019