ທ່ຽວຊົມນໍ້າຕົກຕາດພະແຈແຫຼ້ ເມືອງຮົ່ມ

   ນໍ້າຕົກຕາດພະແຈແຫຼ້ ໃນເມືອງຮົ່ມແຂວງໄຊສົມບູນເປັນອີກເຂດໜຶ່ງທີ່ສຳຄັນຂອງຫຼາຍໆ ນໍ້າຕົກຕາດ, ແຕ່ບ່ອນນີ້ອາດຈະແຕກຕ່າງຈາກບ່ອນອື່ນຍ້ອນເປັນແຫຼ່ງທ່ອງທ່ຽວທີ່ສາມາດເຂົ້າເຖິງທຳມະຊາດໃນເຂດປ່າດົງດິບໄດ້ຕາມອັດທະຍາໄສ, ພ້ອມທັງອາບ ແລະເບິ່ງນໍ້າທີ່ໄຫຼມາຈາກຕີນພູ ຜ່ານໂງ່ນຫີນລົງມາ ແລະ ກິນອາກາດສົດໆພາຍໃນປ່າພາຍໃຕ້ຮົ່ມສີຂຽວທີ່ຫາເບິ່ງຍາກໃນເຂດເມືອງລາວ.

 ສະຖານທີ່ທ່ອງທ່ຽວແຫ່ງນີ້ເປັນຈຸດດຶງດູດນັກທ່ອງທ່ຽວແຫ່ງສຳຄັນຍ້ອນອາກາດເຢັນສະບາຍປະກອບກັບພູຜາປ່າໄມ້ທີ່ປົກຄຸມເປັນຜູ້ຜະລິດອາກາດສົດໆທັງສອງຟາກທາງ, ຮົ່ມເຢັນສະບາຍບວກກັບສາຍນໍ້າທີ່ທະຍອຍກັນຢັງຢາຍລົງມາຈາກຕີນພູສູງຄ່ອຍໆ ໄຫຼລີນລົງມາຕາມຮ່ອງຫ້ວຍລົງຕາມຮ່ອງຫີນເປັນຊັ້ນໆບັນດານັກທ່ອງທ່ຽວສາມາດອາບນໍ້າໄດ້ຢ່າງສະບາຍຢູ່ກ້ອງນໍ້າຕົກ, ເປັນນໍ້າທີ່ໄຫຼຜ່ານຮາກໄມ້ທຳມະຊາດ, ໄຫຼຜ່ານຕົ້ນໄມ້ແບບສົດໆຄືຈັ່ງຊີ້, ນັກທ່ອງທ່ຽວບາງກຸ່ມພະຍາຍາມຍ່າງຂຶ້ນໄປຕາມເນີນພູເພື່ອໄປເບິ່ງຈຸດທີ່ນໍ້າໄຫຼອອກມາຈາກຜາຫີນສິ່ງເຫຼົ່ານັ້ນຈະເຮັດໃຫ້ທ່ານເພີດເພີນ.

  ນໍ້າຕົກຕາດພະແຈແຫຼ້ ເປັນຕາດທີ່ຖືກສ້າງຂຶ້ນໂດຍທຳມະຊາດໄດ້ຮັບການພັດທະນາມາເປັນສະຖານທີ່ການທ່ອງທ່ຽວທີ່ໜ້າຈັບໃຈຂອງຜູ້ທີ່ໄດ້ເຫັນໃນແຕ່ລະປີ, ຢ່າງ ໃດກໍ່ຕາມຖ້າຫາກວ່ານັກ ທ່ອງທ່ຽວທ່ານໃດທີ່ສົນໃຈກໍສາມາດໄປທ່ຽວໄປຊົມກັນໄດ້ບໍລິເວນອ້ອມຮອບເຂດດັ່ງກ່າວຍັງເຕັມໄປດ້ວຍພູຜາປ່າໄມ້ຂຽວສົດງົດງາມອັນລ້ວນແລ້ວແຕ່ຜະລິດສາຍລົມໃຫ້ມີອາກາດເຢັນສົດຊື່ນຢູ່ຕະຫຼອດເວລາ.

__________

ໂດຍ: ວົງມະນີ, ໜັງສືພິມເສດຖະກິດ-ສັງຄົມ

 

แชร์