ສຶກສາແຂວງວຽງຈັນ ສໍາເລັດກອງປະຊຸມໃຫຍ່

  ເມື່ອອາທິດຜ່ານມາ 2020 ພະແນກສຶກສາທິການ ແລະກີລາ ແຂວງວຽງຈັນ ໄດ້ເປີດກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານພະແນກສຶກສາທິການ ແລະກີລາແຂວງຂຶ້ນທີ່ຫ້ອງປະຊຸມພະແນກດັ່ງກ່າວ ໂດຍການເປັນປະທານຂອງສະຫາຍ ນາງ ຈັນແພງ ວິພາວັນ ຄະນະປະຈໍາພັກແຂວງ  ຫົວໜ້າພະແນກສຶກສາທິການ ແລະ ກີລາແຂວງ, ເປັນກຽດເຂົ້າຮ່ວມຂອງສະຫາຍ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງໆວຽງຈັນ,ມີຄະນະຈັດຕັ້ງແຂວງ, ຄະນະກວດກາພັກ-ລັດແຂວງ, ຄະນະໂຄສະນາອົບຮົມແຂວງ, ຄະນະພັກຮາກຖານວິທະຍາໄລຄູບ້ານເກິນ, ໂຮງຮຽນ ມສ ໂພນໝີ ພ້ອມດ້ວຍຄະນະໜ່ວຍພັກ ແລະສະມາຊິກພັກເຂົ້າຮ່ວມ.

  ໃນກອງປະຊຸມສະມາຊິກພັກໄດ້ພ້ອມກັນຄົ້ນຄວ້າ ແລະປະກອບຄໍາຄິດເຫັນໃສ່ຮ່າງບົດລາຍງານ ການເມືອງ, ບົດສໍາຫຼວດການນໍາພາ, ຕິລາຄາດ້ານດີ, ດ້ານອ່ອນຂໍ້ ຄົງຄ້າງ, ສາເຫດ,ບົດຮຽນໃນການຊີ້ນຳ-ນຳພາ ແລະການຈັດຕັ້ງປະຕິບັດແຜນການຂອງຄະນະພັກຮາກຖານພະແນກສຶກສາທິການ ແລະກີລາແຂວງວຽງຈັນ ໃນໄລຍະ 5 ປີ ຜ່ານມາ, ພ້ອມດຽວກັນນັ້ນຍັງໄດ້ເປັນເອກະພາບຮັບຮອງເອົາບັນດາທິດທາງ, ແຜນການຄາດໝາຍສູ້ຊົນ ແລະໄດ້ເອກະພາບ ກໍານົດເປັນມະຕິກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານ.

  ກອງປະຊຸມຄັ້ງປະຖົມມະລຶກ ຂອງຄະນະພັກຮາກຖານຊຸດທີ III ໄດ້ເລືອກຕັ້ງເອົາເລຂາ, ຮອງ ເລຂາ, ປະທານກວດກາ ແລະຮອງປະທານກວດກາຂອງຄະນະພັກຮາກຖານ ໂດຍເລືອກເອົາສະຫາຍ ອ໊ອດ ແສງພິມ ເປັນເລຂາ, ສະຫາຍ ນາງ ວັນທອງ ດວງພະຈັນ ເປັນຮອງເລຂາ, ເປັນປະທານ ກວດກາ, ສະຫາຍ ພັນທະວົງ ສິມທອງຄໍາ ເປັນຮອງປະທານກວດກາ, ສະຫາຍ ສຸກັນ ພົງສະຫວັດ ເປັນຮອງປະທານກວດກາ.

  ນອກນັ້ນຍັງໄດ້ຮັບຟັງການໂອ້ລົມຂອງ ສະຫາຍ ຄໍາພັນ ສິດທິດຳພາກໍາມະການສູນກາງພັກ,ເລຂາຄະນະບໍລິຫານງານພັກແຂວງ ເຈົ້າແຂວງໆວຽງຈັນ ຊຶ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳ-ນຳພາຂອງຄະນະພັກຮາກຖານພວກເຮົາທີ່ໄດ້ມີການ ເອົາໃຈໃສ່ຊີ້ນຳພະນັກງານສະມາຊິກພັກພາຍໃນຂະແໜງການຂອງ ຕົນທີ່ສາມາດຍາດແຍ່ງຜົນສຳເລັດ ຫຼາຍດ້ານພ້ອມດຽວກັນນັ້ນສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງທີ່ຄະນະພັກຍັງບໍ່ທັນບັນລຸໄດ້ຕາມລະດັບຄາດໝາຍ, ພ້ອມທັງ ໄດ້ໃຫ້ທິດຊີ້ນຳຕື່ມອີກກຽ່ວກັບການ ເຄື່ອນໄຫວວຽກງານຕາມທິດທາງ ແຜນການ ແລະຄາດໝາຍສູ້ຊົນໃນ 5 ປີຕໍ່ໜ້າໃຫ້ປະກົດຜົນເປັນຈິງ. 

-------

-ໜັງສືພິມເສດຖະກິດ-ສັງຄົມ

แชร์