ຈີນ ເລີ່ມເປີດຖ້ຽວບິນຈາກຕ່າງປະເທດ

  ສາຍການບິນຂອງນານາປະເທດເລີ່ມກັບມາໃຫ້ບໍລິການຖ້ຽວບິນໄປຍັງປະເທດ ສປ ຈີນອີກຄັ້ງ ຫຼັງຈາກລັດຖະບານຈີນປະກາດຜ່ອນຄາຍຂໍ້ຈຳກັດການເດີນທາງທາງອາກາດເພື່ອຄວບຄຸມການແຜ່ລະບາດຂອງເຊື້ອໂຄວິດ-19.

  ຕາມຂ່າວຕ່າງປະເທດລາຍງານວ່າທ້ານອາທິດທີ່ຜ່ານມາສາຍການບິນລຸບຮັນຊ່າຂອງເຢຍລະມັນໄດ້ກັບມາໃຫ້ບໍລິການຖ້ຽວບິນລະຫວ່າງແຟຣງເຟຣິດກັບຊຽງໄຮ້ອາ ທິດລະເທື່ອຊຶ່ງເປັນຄັ້ງທຳອິດໃນຮອບຫຼາຍເດືອນທີ່ຢຸດໃຫ້ບໍລິການເນື່ອງຈາກການແຜ່ລະບາດຂອງເຊື້ອໂຄວິດ-19 ນອກຈາກນີ້ສາຍການບິນລຸບຮັນຊ່າຍັງໄດ້ວາງແຜນຈະໃຫ້ບໍລິການຖ້ຽວບິນລະຫວ່າງອົດສະຕຣາລີ-ຈີນ ແລະສະວິດ-ຈີນ ອີກຄັ້ງໃນອະນາຄົດ,ຂໍ້ມູນດັ່ງກ່າວສອດຄ່ອງກັບສະຖານະການຂອງໂຄວິດ-19 ໃນຈີນທີ່ມີທ່າອຽງດີຂຶ້ນເປັນລໍາດັບ ໂດຍໃນຕົ້ນເດືອນມິຖຸນທີ່ຜ່ານມາ ຈີນໄດ້ຜ່ອນຄາຍຂໍ້ຈຳກັດການບິນຈາກນະໂຍບາຍ "Five Ones" ທີ່ປະກາດໃຊ້ໃນທ້າຍເດືອນມີນາ ຊຶ່ງອະນຸຍາດໃຫ້ຖ້ຽວບິນໂດຍສານຂອງແຕ່ລະສາຍການບິນສາມາດຂຶ້ນບິນໄດ້ເສັ້ນທາງລະ 1 ຄັ້ງຕໍ່ອາທິດເທົ່ານັ້ນ, ປະຈຸບັນ ສາຍການບິນສາກົນທີ່ໄດ້ຮັບອະນຸຍາດຈະສາມາດໃຫ້ບໍລິການຖ້ຽວບິນໃນຈີນໄດ້ອາທິດລະຄັ້ງ ແລະສາຍການບິນຂອງອາເມລິກາຈະໄດ້ຮັບອະນຸຍາດໃຫ້ບິນໄດ້ອາທິດລະ 2 ຄັ້ງຈົນກວ່າຈຳນວນຜູ້ຕິດເຊື້ອໂຄວິດໃນຜູ້ໂດຍສານໃໝ່ທີ່ກວດພົບເມື່ອມາເຖິງນັ້ນຍັງບໍ່ເຖິງຈຸດທີ່ຈະສັ່ງໂຈະຖ້ຽວບິນ.

  ສຳນັກຂ່າວຊິນຮວາລາຍງານວ່າໃນອາທິດທີ່ຜ່ານມາສາຍການບິນເດລຕ້າ ແອລາຍຂອງອາເມລິກາໄດ້ກັບມາໃຫ້ບໍລິການຖ້ຽວບິນໄປຍັງຊຽງໄຮ້ອາທິດລະ 2 ຄັ້ງຂະນະທີ່ສາຍການບິນຢູໄນເຕັດແອລາຍກໍມີກຳນົດຈະກັບມາໃຫ້ບໍລິການເສັ້ໜທາງຊານຟຣານຊິສໂກ-ຊຽງໄຮ້ໃນວັນທີ 8 ກໍລະກົດນີ້.

____________

ໜັງສືພິມເສດຖະກິດ-ສັງຄົມ

แชร์