ໂຄງການສ້າງທາງລົດໄຟລາວ-ຈີນ ຊ້ວງຜ່ານຫຼວງນໍ້າທາ ສຳເລັດ 96%

  ວັນທີ 26 ມິຖຸນາ 2020 ທີ່ຫ້ອງການບ້ານນາເຕີຍເມືອງຫຼວງນໍ້າທາ ແຂວງຫຼວງນໍ້າທາ, ໄດ້ຈັດກອງປະຊຸມປຶກສາຫາລືການຈັດຕັ້ງປະຕິບັດແກ້ໄຂຜົນກະທົບການກໍ່ສ້າງທາງລົດໄຟລາວ-ຈີນຊ້ວງຜ່ານ ແຂວງຫຼວງນໍ້າທາເຂດ ບ້ານນາເຕີຍ ໂດຍການເປັນປະທານຂອງ ທ່ານ ຄຳໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາຜູ້ຊີ້ນຳ ໂຄງການກໍ່ສ້າງທາງລົດໄຟລາວ-ຈີນ ຊ້ວງຜ່ານ ແຂວງຫຼວງນໍ້າທາ, ທ່ານ ນາງ ອຸ່ນຫຼ້າອ້ຽງລໍລາດ ຮອງປະທານສະພາປະຊາຊົນແຂວງຄະນະໄກ່ເກ່ຍຂັ້ນແຂວງ ແລະປະຊາຊົນຜູ້ຖືກຜົນກະທົບເຂົ້າຮ່ວມ.

  ທ່ານ ທອງແດງ ສິດທິສົນ ຫົວໜ້າຄະນະໄກ່ເກ່ຍແກ້ໄຂຜົນກະທົບການກໍ່ສ້າງທາງລົດໄຟລາວ-ຈີນ ຊ້ວງຜ່ານ ແຂວງຫຼວງນໍ້າທາ ກໍໄດ້ລາຍງານການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນເລີ່ມແຕ່ບໍ່ເຕ່ນຊາຍແດນລາວ-ຈີນແຂວງຫຼວງນໍ້າທາຫານະຄອນຫຼວງວຽງຈັນມີຄວາມຍາວທັງໝົດ 409 ກິໂລແມັດ ໃນນັ້ນແລວທາງລົດໄຟໄດ້ຜ່ານແຂວງຫຼວງນໍ້າທາ 16,9 ກິໂລແມັດ, ໄດ້ກໍ່ສ້າງຂົວໃຫຍ່ຈຳນວນ 7 ແຫ່ງ,  ເຈາະອຸໂມງ 3 ແຫ່ງ ແລະກໍ່ສ້າງເສົາຂົວທັງໝົດແມ່ນກໍ່ສ້າງສຳເລັດ 100%, ວາງຂາງຂົວສຳເລັດຈຳນວນ 313 ຂາງເທົ່າກັບ 93%, ການກໍ່ສ້າງ ທາງລົດໄຟລາວ-ຈີນ ສັນຍາທີ 1 ຊ້ວງ ຜ່ານແຂວງຫຼວງນໍ້າທາປະຈຸບັນສຳເລັດ ແລ້ວ 96%, ມີ 4 ບ້ານທີ່ຖືກຜົນກະທົບຄື: ບ້ານບໍ່ເຕ່ນ, ບ້ານບໍ່ປຽດ, ບ້ານຕີນຕົກແລະບ້ານນາເຕີຍມາເຖີງປະຈຸບັນປະຊາຊົນໄດ້ຮັບເງິນຊົດເຊີຍສິ່ງກີດຂວາງຈາກບໍລິສັດທາງລົດໄຟລາວ-ຈີນ ແລະຄະນະຄຸ້ມຄອງໂຄງການ, ກະຊວງໂຍທາທິການ ແລະຂົນສົ່ງຈຳນວນ 7 ງວດລວມເປັນເງິນທັງໝົດ 131 ຕື້ກວ່າກີບ ແລະໄດ້ເບີກຈ່າຍໃຫ້ປະຊາຊົນຈຳນວນ 218 ຄອບຄົົວ ມີມູນຄ່າທັງໝົດ 100 ຕື້ກວ່າກີບ, ໃນຈໍານວນ 321 ຄອບຄົວ.

  ຈາກນັ້ນກອງປະຊຸມໄດ້ຮັບຟັງຄຳຄິດ,ຄຳເຫັນຂອງປະຊາຊົນຜູ້ທີ່ໄດ້ຮັບຜົນກະທົບຊຶ່ງໃນນັ້ນລວມເຖິງຜູ້ທີ່ໄດ້ຮັບການຊົດເຊີຍໄປແລ້ວ ແລະຜູ້ທີ່ຍັງບໍ່ທັນໄດ້ຮັບການຊົດ ເຊີຍເທື່ອ, ພ້ອມທັງປຶກສາຫາລືຊ່ອງທາງ ແລະວິທີການແກ້ໄຂຫຼາຍບັນຫາເປັນຕົ້ນກ່ຽວກັບວຽກງານຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບໃນຂັ້ນຕໍ່ໄປກໍ່ຄືຈ່າຍຄ່າຊົດເຊີຍສີ່ງຂີດຂວາງໃຫ້ແກ່ປະຊາຊົນໃນງວດທີ 8  ແລະການກະກຽມຍົກຍ້າຍຈັດສັນທີ່ຢູ່ຊົ່ວຄາວໃຫ້ແກ່ຜູ້ທີ່ໄດ້ຮັບຜົນກະທົບຢູ່ເຂດສະຖານີນາເຕີຍຈໍານວນ 21 ຄອບຄົວ ເປັນອັນຮີບດ່ວນເພື່ອເຮັດໃຫ້ໂຄງການກໍ່ສ້າງທາງລົດໄຟລາວ-ຈີນ ໄດ້ລົງມືກໍ່ສ້າງຕາມແຜນຂອງລັດຖະບານລາວ-ຈີນທີ່ ໄດ້ກໍານົດຮ່ວມກັນສຳເລັດຕາມລະດັບຄາດໝາຍທີ່ວາງໄວ້ໃນທ້າຍປີ 2021.

____________

ຂ່າວ: ມຸນຕີ, ໜັງສືພິມເສດຖະກິດ-ສັງຄົມ

แชร์