ປູກສາລີຫວານສ້າງລາຍຮັບ 35 ລ້ານກີບຕໍ່ປີ

  ທ່ານ ນາງ ຈັນຫອມ ເພຍໄຊ ໄດ້ຕາງໜ້າຄອບຄົວຕົວແບບຂຶ້ນຜ່ານບົດລາຍງານດ້ານການປູກພືດເປັນສິນຄ້າຕໍ່ກອງປະຊຸມຜູ້ແທນແມ່ຍິງແຂວງບໍລິຄຳໄຊຄັ້ງທີ VII ທີ່ໄດ້ຈັດຂຶ້ນເມື່ອບໍ່ດົມານີ້ຢູ່ສະໂມສອນໃຫຍ່ຂອງແຂວງ.


  ທ່ານ ນາງ ຈັນຫອມ ເພຍໄຊ ອາຍຸ 48 ປີ ປະຊາຊົນຢູ່ບ້ານໜອງຊອດ ເມືອງປາກກະດິງ ໄດ້ສ້າງຄອບຄົວກັບທ້າວ ແກ້ວ ວຽງສະໄໝ ອາຊີບພະນັກງານຄູມີລູກນຳ ກັນ 3 ຄົນ ຍິງ 1, ໂດຍປະຕິບັດຕາມມະຕິກອງປະຊຸມໃຫຍ່ແຕ່ລະຂັ້ນໃນການຊຸກຍູ້, ສົ່ງເສີມການສ້າງເສດຖະກິດຄອບຄົວດ້ວຍການສົ່ງເສີມການປູກພືດເປັນສິນຄ້າ, ໃນ ຕົ້ນປີ 2017 ຄອບຄົວຂອງພະເຈົ້າໄດ້ເລີ່ມປູກໝາກແຕງໃນເບື້ອງຕົ້ນລົງທຶນ 3 ລ້ານກີບ ປູກໝາກແຕງໃນເນື້ອທີ່ປະມານ 4 ໄລ່ ໃຊ້ເວລາ 45 ວັນ ສາມາດເກັບ ຂາຍ, ສະເລ່ຍລາຍຮັບ 30 ລ້ານກີບ ຕໍ່ປີ, ຊຶ່ງເຫັນວ່າການປູກໝາກ ແຕງແມ່ນໄດ້ໃຊ້ຕົ້ນທຶນ ແລະແຮງ ງານຫຼາຍໃນການບົວລະບັດຮັກສາ ແຕ່ຜົນໄດ້ຮັບພັດໜ້ອຍ ສະນັ້ນ ມາຮອດທ້າຍປີ 2017 ຈຶ່ງໄດ້ມີການປຶກສາຫາລືກັນເພື່ອຊອກຫາ ວິທີສ້າງເສດຖະກິດຄອບຄົວໃຫ້ເພີ່ມຂຶ້ນຈຶ່ງໄດ້ຫັນມາທົດລອງປູກສາລີຫວານຊຶ່ງການປູກໃຊ້ເວລາພຽງແຕ່ 3 ເດືອນ ກໍ່ສາມາດເກັບຂາຍໄດ້ ແລະເຫັນວ່າປີໜຶ່ງສາມາດປູກໄດ້ 3 ຄັ້ງ ລົງທຶນປະມານ 4 ລ້ານກີບຕໍ່ຄັ້ງ, ໃນເມື່ອກ່ອນມີເນື້ອທີ່ 5 ໄລ່ ມາຮອດປະຈຸ ບັນໄດ້ຂະຫຍາຍເນື້ອທີ່ປູກເປັນ 6 ໄລ່ ສາມາດສ້າງລາຍຮັບໄດ້ໃຫ້ແກ່ຄອບຄົວໄດ້ 35 ລ້ານກີບຕໍ່ປີ, ການ ຈຳໜ່າຍແມ່ນມີແມ່ຄ້າມາຮັບຊື້, ຈາກລາຍຮັບດັ່ງກ່າວໄດ້ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເປັນກ້າວໆ ສາມາດສົ່ງລູກຮຽນຈົບ ແລະຊື້ພາຫະນະຮັບໃຊ້ໃນຄອບຄົວໄດ້ຈຳນວນໜຶ່ງ.


 ປະຈຸບັນຄອບຄົວຂອງຂ້າພະເຈົ້າໄດ້ຮັບການຢັ້ງຢືນເປັນຄອບຄົວພັດທະນາ, ຫຼຸດພົ້ນອອກຈາກຄວາມທຸກຍາກມາເປັນຄອບຄົວກຸ້ມຢູ່ກຸ້ມກິນຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນເປັນກ້າວໆ, ສະນັ້ນຄອບຄົວຂອງຂ້າພະເຈົ້າຈຶ່ງໄດ້ຢຶດຖືການປູກສາລີຫວານເປັນສິນຄ້າເພື່ອສ້າງລາຍຮັບເພີ່ມໃຫ້ແກ່ຄອບຄົວ.

แชร์