ຕາດທອງ ແຫຼ່ງທ່ອງທ່ຽວທາງທໍາມະຊາດ ສວຍງາມ

 ໃນລະດູນີ້ຫຼາຍຄົນ,ຫຼາຍຄອບຄົວນິຍົມໄປທ່ຽວນໍ້າຕົກຕາດເພື່ອສຳຜັດກັບທຳມະຊາດ,ນໍ້າຕົກຕາດທີ່ໄຫຼເຢັນເຮັດໃຫ້ຈິດໃຈເບີກບານມ່ວນຊື່ນ,ຖ້າໄກິນເຂົ້າປ່າແບບຄອບຄົວດ້ວຍອາຫານພື້ນບ້ານແລ້ວຍິ່ງເພີ່ມສີສັນເຮັດໃຫ້ການພັກຜ່ອນມີຄວາມສຸກຫຼາຍຂຶ້ນຕື່ມອີກ,ປະເທດເຮົາກໍມີສະຖານທີ່ທ່ອງທ່ຽວທຳມະຊາດຫຼາຍແຫ່ງທີ່ມີຄວາມສວຍງາມ ແລະໄດ້ຮັບຄວາມນິຍົມໜຶ່ງໃນນັ້ນນໍ້າຕົກຕາດທອງເປັນນໍ້າຕົກໜຶ່ງທີ່ມີຄວາມສວຍງາມ ແລະໄດ້ຮັບຄວາມນິຍົມຈາກນັກທ່ອງທ່ຽວພາຍໃນເຂົ້າ ໄປທ່ຽວຊົມຈັດກິດຈະກຳກິນເຂົ້າປ່າສາມັກຄີໃນວັນພັກ ຊຶ່ງນໍ້າຕົກຕາດນີ້ຕັ້ງຢູ່ເມືອງພູຄູນ ແຂວງ ຫຼວງພະບາງ.

 ຖ້າທ່ານໃດມີໂອກາດໄດ້ໄປ ແຂວງຫຼວງພະບາງ ກໍຢ່າລືມໄປ ສຳຜັດກັບບັນຍາກາດອັນສວຍງາມຂອງນໍ້າຕົກຕາດແຫ່ງນີ້ຮັບຮອງວ່າທ່ານຈະຕິດໃຈ ແລະຢາກ ກັບໄປອີກຢ່າງແນ່ນອນ, ນໍ້າຕົກຕາດແຫ່ງນີ້ຍັງຮັກສາຄວາມເປັນທຳມະຊາດໄວ້ໄດ້ຢ່າງສົມບູນເພາະຍັງບໍ່ມີກັນດັດແປງ ຫຼື ພັດທະນາພໍປານໃດ, ສ່ວນເສັ້ນທາງທີ່ເຂົ້າໄປຫາຕາດນັ້ນແມ່ນສະດວກສະບາຍ ຫຼາຍເອົາເປັນວ່າຖ້າທ່ານໃດໄປ ແລະຕ້ອງການໄປພັກຜ່ອນກິນເຂົ້າປ່າທ່າມກາງທຳມະຊາດອັນສວຍ ງາມກໍຕ້ອງໄດ້ກະກຽມອາຫານ ການກິນ, ເຄື່ອງດື່ມ ແລະເຄື່ອງອຳນວຍຄວາມະດວກຕ່າງໆໄປພ້ອມ ແລະຖ້າໄປໄປຮອດແລ້ວຢ່າລືມລົງຫຼິ້ນນໍ້າໄສໆເຢັນໆທີ່ໄຫຼຼໄປຕາມໂຫງ່ນຫີນນ້ອຍໃຫຍ່ ຊຶ່ງຈະສ້າງຄວາມເພີດເພີນໃຫ້ທ່ານຢ່າງແນ່ນອນ.

 ແຂວງຫຼວງພະບາງ ເປັນພູ ດອຍສູງຊັນ, ມີອາກາດເຢັນສະບາຍ, ມີພູຜາປ່າໄມ້ທີ່ອຸດົມສົມບູນ ຈຶ່ງເໝາະແກ່ການທ່ອງທ່ຽວແບບທຳມະຊາດ,ຖ້າທ່ານໃດໄດ້ໄປແຂວງຫຼວງພະບາງ ແລ້ວແລ້ວກໍຄວນຫາໂອກາດໄປສຳຜັດກັບບັນຍາກາດດີໆແບບນີ້ເພື່ອຜ່ອນຄາຍຄວາມຕຶງຄຽດຈາກວຽກງານ, ການໄດ້ສຳຜັດກັບອາກາດບໍລິສຸດກໍຈະເຮັດໃຫ້ຮ່າງກາຍ ແລະ ຈິດໃຈເບີກບານມ່ວນຊື່ນມີກຳລັງແຮງໃນການເຮັດວຽກງານໃຫ້ມີຜົນສຳເລັດຢ່າງແນ່ນອນ.

--------

ໜັງສືພິມເສດຖະກິດ-ສັງຄົມ

 

แชร์