8 ແຂວງພາກເໜືອຍົກລະດັບນໍາໃຊ້ຖານຂໍ້ມູນນິຕິກຳຂອງຂະແໜງການຄ້າ

  ຫ້ອງການກະຊວງອຸດສາຫະກໍາ ແລະການຄ້າໄດ້ຈັດກອງປະຊຸມຝຶກອົບຮົມກ່ຽວກັບການນໍາໃຊ້ຖານຂໍ້ມູນນິຕິກໍາຂອງຂະແໜງອຸດສາຫະກຳ ແລະການຄ້າ ແລະ ການມອບ-ຮັບເຄື່ອງຄອມພິວເຕີ-ເຄື່ອງແຈກສັນຍານອິນເຕີເນັດໃຫ້ກັບ 8 ແຂວງພາກເໜືອຂຶ້ນໃນວັນທີ 26 ມິຖຸນາ 2020, ຢູ່ຫ້ອງປະຊຸມໂຮງແຮມເດີແກຼນແຂວງຫຼວງຫຼວງພະບາງ ໂດຍການເປັນປະທານຂອງທ່ານ ນາງ ບານສະຕິ ເທບພະວົງ ຫົວໜ້າຫ້ອງການກະຊວງອຸດສາຫະກຳ ແລະການຄ້າ, ມີທ່ານ ສຳນານ ສົນທະນີຫົວໜ້າພະແນກອຸດສາຫະກຳ ແລະການຄ້າແຂວງຫຼວງພະບາງ,ມີບັນດາຕາງໜ້າ 8 ແຂວງ 10 ເມືອງ ຈາກພາກເໜືອຂອງຂະແໜງອຸດສາຫະກຳ ແລະການຄ້າເຂົ້າຮ່ວມ.

 ທ່ານ ນາງ ບານສະຕິ ເທບພະວົງ ຫົວໜ້າຫ້ອງການກະຊວງອຸດສາຫະກຳ ແລະການຄ້າກ່າວວ່າ: ການຝຶກອົບຮົມໃຫ້ກັບ8 ແຂວງພາກເໜືອຄືແຂວງຜົ້ງສາລີ,ຫຼວງນໍ້າທາ, ບໍ່ແກ້ວ, ອຸດົມໄຊ, ຫຼວງພະບາງ, ໄຊຍະບູລີ, ຫົວພັນ ແລະ ແຂວງຊຽງຂວາງ ຄັ້ງນີ້ໄດ້ຮັບການສະໜັບສະໜູນຈາກກອງທຶນຮ່ວມມືແມ່ນໍ້າຂອງ ສ.ເກົາຫຼີ ເພື່ອສ້າງຄວາມເຂັ້ມແຂງໃຫ້ແກ່ຂະແໜງອຸດສາຫະກຳ ແລະການຄ້າເພື່ອສ້າງຖານຂໍ້ມູນນິຕິກຳກໍ່ຄືການສ້າງເວັບໄຊນິຕິກໍາຂອງຂະແໜງອຸດສາຫະກຳ ແລະ ການຄ້າ ເປັນການລວມສູນບັນດານິຕິກຳສະເພາະຂອງກະຊວງອຸດສາຫະກຳ ແລະການຄ້າທາງລະບົບເອເລັກໂຕຣນິກເພື່ອເລັ່ງໃສ່ອໍານວຍຄວາມສະດວກວ່ອງໄວພຽງແຕ່ທ່ານສາ ມາດເຊື່ອມຕໍ່ອິນເຕີເນັດໃນການເຂົ້າເຖິງຂໍ້ມູນນິຕິກຳສະເພາະຂອງຂະແໜງອຸດສາຫະກຳ ແລະການຄ້າທີ່ກະຊວງໄດ້ຮັບຮອງ ແລະປະກາດໃຊ້ໃນແຕ່ລະໄລຍະເພື່ອເປັນການສ້າງຄວາມເຂັ້ມແຂງໃຫ້ກັບຫ້ອງການອຸດສາຫະກຳ ແລະ ການຄ້າເມືອງເປົ້າໝາຍໃນທົ່ວປະເທດໂດຍສັງລວມບັນດາກົດໝາຍ ແລະ ນິຕິກຳລຸ່ມກົດໝາຍທັງໝົດຂອງຂະແໜງອຸດສາຫະກຳ ແລະການທີ່ປະກາດໃຊ້ຜ່ານເຂົ້າສູ່ຖານຂໍ້ມູນລະບົບເອເລັກໂຕຣນິກ.

  ຈາກນັ້ນບັນດາຜູ້ເຂົ້າຮ່ວມຝຶກອົບຮົມໄດ້ມີທົດລອງການນໍາໃຊ້ຖານຂໍ້ມູນນິຕິກໍາວິທີເຂົ້າເຖິງຖານຂໍ້ມູນການສ້າງຂໍ້ມູນນິຕິກຳຂອງຂະແໜງອຸດສາຫະກຳ ແລະການຄ້າ ແລະຕອນທ້າຍພິທີໄດ້ຈັດພິທີມອບ-ຮັບເຄື່ອງຄອມພິວເຕີພ້ອມດ້ວຍເຄື່ອງແຈກສັນຍານອິນເຕີເນັດໃຫ້ແກ່ບັນດາຫ້ອງການອຸດສາຫະກຳ ແລະການຄ້າເມືອງທີ່ນອນຢູ່ໃນເປົ້າໝາຍທົ່ວປະເທດຈໍານວນທັງໝົດ 22 ເມືອງ ໃນນັ້ນພາກເໜືອຈໍານວນ 10 ຊຸດ ໃຫ້ກຽດມອບຂອງ ທ່ານ ນາງ ບານ ສະຕິເທບພະວົງ ຫົວໜ້າຫ້ອງການກະ ຊວງອຸດສາຫະກຳ ແລະການຄ້າພັດປ່ຽນຂຶ້ນຮັບຈາກຕາງໜ້າ 8 ແຂວງ 10 ເມືອງ ພາກເໜືອຂຶ້ນຮັບໃນນັ້ນ ແຂວງຫຼວງພະບາງ ມີ 2 ເມືອງຄືເມືອງນໍ້າບາກ ແລະ ເມືອງໂພນທອງ.

___________

ຂ່າວ: ສີສຸວັນ,  ໜັງສືພິມເສດຖະກິດ-ສັງຄົມ

แชร์