ສະຫວັນນະເຂດ-ຄຳມ່ວນ ເຊັນບົດບັນທຶກແກ້ໄຂເຂດແດນເຊື່ອມຕໍ່

  ພິທີເຊັນບົດບັນທຶກການແກ້ໄຂເຂດແດນເຊື່ອມຕໍ່ລະຫວ່າງເມືອງວິລະບູລີ, ເມືອງອາດສະພອນ ແຂວງສະຫວັນນະເຂດ ກັບເມືອງໄຊບົວທອງ ແຂວງຄຳມ່ວນ ໄດ້ຈັດຂຶ້ນໃນວັນທີ 24 ມິຖຸນາ 2020 ທີ່ຫ້ອງວ່າການປົກຄອງແຂວງສະຫວັນນະເຂດໂດຍການເປັນປະທານຂອງ ທ່ານ ໂພໄຊ ໄຊຍະສອນ ກຳມະການສຳຮອງສູນກາງພັກຮອງເລຂາພັກແຂວງຮອງເຈົ້າແຂວງສະຫວັນນະເຂດ ແລະທ່ານ ບຸນມີ ພິມມະສອນ ຮອງເລຂາພັກແຂວງຮອງເຈົ້າແຂວງຄຳມ່ວນພ້ອມດ້ວຍຄະນະຮັບຜິດຊອບແກ້ໄຂບັນຫາເຂດແດນຂອງທັງສອງແຂວງເຂົ້າຮ່ວມ.

  ໂອກາດນີ້, ທັງສອງຝ່າຍກໍ່ໄດ້ມີການປຶກສາຫາລືກ່ຽວກັບການເຊັນບົດບັນທຶກການແກ້ໄຂເຂດແດນເຊື່ອມຕໍ່ລະຫວ່າງເມືອງອາດສະພອນ, ເມືອງວິລະບູລີ, ແຂວງສະ ຫວັນນະເຂດ ແລະເມືອງໄຊບົວທອງ, ແຂວງຄຳມ່ວນຊຶ່ງໄດ້ຕົກລົງເປັນເອກະພາບກັນດັ່ງນີ້: ດ້ານການແກ້ໄຂເຂດດນເຊື່ອມຕໍ່ແມ່ນເຫັນດີປະຕິບັດຕາມບົດບັນທຶກກອງປະຊຸມກ່ຽວກັບການຕົກລົງແກ້ໄຂເຂດແດນເຊື່ອມຕໍ່ລະຫວ່າງແຂວງສະຫວັນນະເຂດກັບ ແຂວງຄຳມ່ວນ ສະບັບລົງວັນທີ 18/ 5/1999 ແລະແຜນທີ່ປີ 1983 ຢູ່ແຂວງຈຳປາສັກ, ເຫັນດີໂອນບ້ານໂພນຄຳ, ເມືອງໄຊບົວທອງ, ແຂວງຄຳມ່ວນ ໄປຂຶ້ນກັບອຳນາດການປົກຄອງເມືອງວິລະບູລີ, ແຂວງສະຫວັນນະເຂດຕາມການຕົກລົງຂອງປະຊາຊົນບ້ານດັ່ງກ່າວ, ເຫັນດີໂອນ (ຄຸ້ມທ່າໂພ) ບ້ານສົບເຊ, ເມືອງອາດສະພອນ, ແຂວງສະຫວັນນະເຂດ ໃນຈຳນວນ 18 ຫຼັງຄາເຮືອນ, 25 ຄອບຄົວ, ພົນ ລະເມືອງ 137 ຄົນ, ຍິງ 67 ຄົນ, ທີ່ຕັ້ງຖິ່ນຖານພູມລຳເນົາບ້ານເຮືອນຢູ່ພາກເຊເບື້ອງເມືອງໄຊບົວທອງ, ແຂວງຄຳມ່ວນ ໃຫ້ໄປຂຶ້ນກັບອຳນາດການປົກຄອງເມືອງໄຊບົວທອງຕາມການເຫັນດີຂອງປະຊາຊົນຄຸ້ມບ້ານດັ່ງກ່າວ, ສ່ວນພິທີມອບ-ຮັບໂອນບັນດາບ້ານເປົ້າໝາຍແມ່ນມອບໃຫ້ສອງກອງເລຂາຂອງ 2 ແຂວງ ສືບຕໍ່ກະກຽມຈັດສັນເວລາ ແລະສະຖານທີ່ຕາມຄວາມເໝາະສົມ; ດ້ານວຽກງານແກ້ໄຂເຂດແດນເຊື່ອມຕໍ່ບ້ານນາໂມ້, ເມືອງໄຊບົວທອງ ແລະເມືອງວິລະບູລີ ກອງປະຊຸມເຫັນດີມອບໃຫ້ສອງກອງເລຂາແຂວງສະຫວັນນະເຂດແລະແຂວງຄຳມ່ວນສືບຕໍ່ສົມທົບກັບກະຊວງພາຍໃນເພື່ອປຶກສາຫາລືຊອກວິທີທາງອອກຮ່ວມກັນ ແລະ ມອບໃຫ້ຄະນະຂັ້ນເມືອງ ສືບຕໍ່ພົບປະຫາລືກ່ຽວກັບວຽກງານເຂດແດນເຊື່ອມຕໍ່ໂດຍປະຕິບັດຕາມຄຳແນະນຳເລກທີ 01/ພນ.

  ຈາກນັ້ນ, ໃນພິທີກໍ່ໄດ້ມີການລົງນາມໃນບົດບັນທຶກສະບັບດັ່ງກ່າວນີ້ຊຶ່ງຕາງໜ້າແຂວງສະຫວັນນະເຂດໃຫ້ກຽດລົງນາມໂດຍທ່ານ ປອ ໂພໄຊ ໄຊຍະສອນ ແລະ ຕາງ ໜ້າແຂວງຄຳມ່ວນລົງນາມໂດຍທ່ານ ບຸນມີ ພິມສະສອນ ຊ້ອງໜ້າບັນດາພະແນກການ, ຂະແໜງການ ແລະເມືອງທີ່ກ່ຽວຂ້ອງຂອງສອງແຂວງດັ່ງກ່າວ.

แชร์