ພະທາດຫຼວງຊຽງຕຶງ ສູນລວມສັດທາຂອງຊາວເມືອງສິງ

   ພະທາດຫຼວງຊຽງຕຶງ ເປັນພະທາດເກົ່າແກ່, ເປັນສູນລວມຄວາມສັດທາຂອງຊາວເມືອງສິງມາແຕ່ບູຮານນະການ, ຊຶ່ງຕັ້ງຢູ່ເທິງຈອມພູທາງທິດຕາເວັນຕົກສ່ຽງໃຕ້ຂອງເມືອງສິງ ເປັນແຫຼ່ງທ່ອງທ່ຽວທາງປະຫວັດສາດ ແລະວັດທະນະທຳທີ່ຖືກຮັບຮອງເອົາເປັນມູນມໍລະດົກວັດທະນະທຳຂອງແຂວງຫຼວງນໍ້າທາ.

ຕາມຕຳນານພະທາດຫຼວງຊຽງຕຶງ ໄດ້ກ່າວໄວ້ວ່າ: ພະພຸດທະເຈົ້າໄດ້ເດີນທາງມາຈາກເມືອງລັງກາທິບ ແລະໄດ້ຜ່ານມາເຖິງໜ່ວຍພູທີ່ພະທາດຊຽງຕຶງຕັ້ງຢູ່ໃນປະຈຸບັນ ແລະປະຊາຊົນກໍ່ໄດ້ເອົາວັດຖຸທານ ແລະຂອງທານມາຖວາຍໃຫ້ພະພຸດທະເຈົ້າໄດ້ສັນ (ກິນ) ແລະພະພຸດທະເຈົ້າກໍ່ໄດ້ເທດສະໜາທຳໃຫ້ແກ່ປະຊາຊົນ ແລະ ໄດ້ກ່າວສັ່ງ ສອນໃຫ້ຊາວເມືອງແຫ່ງນີ້ຖືສິນກິນທານ ແລະກ່ອນທີ່ພະພຸດທະເຈົ້າຈະຈາກໄປໄດ້ສັ່ງໄວ້ກັບພະມະຫາອະນົນເຖຣະຜູ້ຕິດຕາມຂອງຕົນໄວ້ວ່າ “ໃນເມື່ອເຮົາຫາກໄດ້ປະລິນິພານໄປແລ້ວໃຫ້ພະອານົນເຖຣະເຈົ້າເອົາກະດູກຄໍຫອຍ,ຫີນລັບພ້າຊາຍຄຳ ແລະພ້າມິດຂູບດ້າມຄຳຂອງເຮົາມາຈຸກໍ່ໄວ້ເໜືອດອຍ (ເທິງພູ) ຊຽງຕຶງແຫ່ງນີ້ເພື່ອໄວ້ປົກປັກຮັກສາດິນແດນເມືອງແຫ່ງນີ້ຕໍ່ໄປ, ຫຼັງຈາກນັ້ນກໍ່ໄດ້ເດີນທາງໄປສູ່ປ່າເຊຕະວັນ ແລະອີກສອງປີຕໍ່ມາພະພຸດທະເຈົ້າກໍ່ໄດ້ປະລິນິພານ (ຕາຍ).

  ດັ່ງນັ້ນພະອານົນເຖຣະເຈົ້າຈຶ່ງໄດ້ນຳເອົາກະດູກຄໍຫອຍ, ຫີນລັບພ້າຊາຍຄຳ ແລະມີດຂູບດ້າມຄຳຂອງພະພຸດທະເຈົ້າມາມອບໃຫ້ພະມະຫາເຖຣະເຈົ້າທີ່ຢູ່ເມືອງແຫ່ງນີ້ ຕາມຄຳບອກຂອງພະພຸດທະເຈົ້າ ແລະ ສິ່ງຂອງເຫຼົ່ານີ້ໄດ້ຖືກເກັບຮັກສາໄວ້ໃນຫີບຄຳຢູ່ໃນເມືອງແຫ່ງນີ້ເປັນເວລາ 7 ຊົ່ວເຈົ້າຟ້າທີ່ປົກຄອງ ເມືອງແຫ່ງນີ້ຊຶ່ງເປັນເວລາ 400 ປີ ແລະມີພະສຳພູຕະເຖຣະຕົນໜຶ່ງທີ່ມີລູກສິດ 500 ຕົນ ທີ່ໄດ້ຮັກສາຫີບຄຳນີ້ໄດ້ 20 ປີ, ຈາກນັ້ນຈຶ່ງໄດ້ຮູ້ຂ່າວວ່າມີພະຍາຕົນໜຶ່ງຊື່ວ່າ “ພະຍາອະໂສກະທຳ ມະລາຊາ” ເປັນຜູ້ທີ່ມີຊື່ສຽງໂດ່ງດັງໃນການສ້າງວັດວາອາຮາມ ແລະກໍ່ສ້າງເຈດີໄດ້ເຖິງ 84.000 ດວງຢູ່ທຸກຫົນແຫ່ງໃນໂລກ, ດັ່ງນັ້ນພະສຳພູຕະເຖຣະຜູ້ນີ້ຈຶ່ງໄດ້ໄປອັນເຊີນ ເອົາພະຍາອະໂສກະທຳມະລາຊາມາສ້າງພະທາດຢູ່ໃນເມືອງແຫ່ງນີ້,ດັ່ງນັ້ນພະຍາອະໂສກະທໍາມະລາຊາກໍ່ໄດ້ເດີນທາງມາຕາມຄຳເຊີນ ແລະພະສຳພູຕະເຖຣະຕົນນັ້ນພ້ອມດ້ວຍລູກສິດ 500 ຕົນ, ກໍ່ໄດ້ເອົາຫີບຄຳທີ່ໄດ້ເກັບຮັກສາກະດູກຄໍຫອຍ, ຫີນລັບພ້າຊາຍຄຳ ແລະມີດຂູບດ້າມຄຳມາມອບໃຫ້ພະຍາອະໂສກະທຳມະລາຊາເພື່ອກໍ່ເຈດີ, ດັ່ງນັ້ນພະຍາອະໂສກະທຳມະລາຊາກໍໄດ້ຫາເລີກງາມຍາມດີ ແລະກໍ່ເຈດີກວມເອົາຫີບ ຄຳທີ່ບັນຈຸກະດູກຄໍຫອຍ, ຫີນລັບພ້າຊາຍຄຳ ແລະມີດຂູດດ້າມຄຳຂອງພະພຸດທະເຈົ້າຢູ່ທີ່ເໜືອດອຍ (ເທິງພູ) ຊຽງຕຶງ ໃນເດືອນຈຽງເພັງ ປີ ພສ 400 ເພື່ອໄວ້ໃຫ້ຊາວເມືອງໄດ້ສັກກາລະບູຊາ ແລະເປັນພະທາດຄູ່ບ້ານຄູ່ເມືອງແຫ່ງນີ້ຕະຫຼອດໄປ ແລະໄດ້ກຳນົດເອົາມື້ 15 ຄໍ່າ ເດືອນກຳຊົນເຜົ່າໄຕລື້ ຊຶ່ງກົງ ກັບເດີອນ 12 ລາວ ຫຼືເດືອນຈຽງເພັງ ຂອງທຸກໆປີເປັນມື້ນະມັດສະການພະທາດຕະຫຼອດມາ.

 ດັ່ງນັ້ນ, ເມື່ອອີງຕາມຕຳນານຂອງພະທາດຫຼວງຊຽງຕຶງໄດ້ໃຫ້ ຮູ້ວ່າ: ເມືອງສິງໃນປະຈຸບັນນີ້ມີຄົນອາໄສ ແລະດຳລົງຊິວິດຢູ່ເປັນເວລາ 2.500 ກວ່າປີຜ່ານມາ ແລ້ວ, ນອກຈາກນັ້ນພະທາດຫຼວງຊຽງຕຶງ ກໍ່ໄດ້ຖືກປະຕິສັງຂອນ ຈາກເຈົ້າຟ້າສາມອົງຄື: ພະຍາແຕນໃຫ້ບູລະນະປະຕິສັງຂອນໃໝ່ໃນປີ ຄສ 1591, ເຈົ້າແສງສີຂະຕິຍະວົງສາບູລະນະປະຕິສັງຂອນຂຶ້ນໃໝ່ໃນປີ ຄສ 1792, ເຈົ້າຟ້າສິຫຼີໜໍ່ຄຳບູລະນະປະຕິສັງຂອນຂຶ້ນໃໝ່ໃນປີ ຄສ 1873, ພະທາດຊຽງຕຶງ ໃນປະຈຸບັນນີ້ປະຊາຊົນຈັດງານບຸນເພື່ອສະຫຼອງແມ່ນໄລຍະດຽວກັນກັບການສະຫຼອງພະທາດຫຼວງວຽງຈັນຂອງທຸກໆ ປີ.

 

แชร์