ຕາດປ່າໄລ ຄວາມມະຫັດສະຈັນທີ່ຄວນໄປສຳຜັດ

 ຄວາມໂດ່ງດັງເລື່ອງການທ່ອງທ່ຽວຢູ່ປະເທດເຮົາບໍ່ເຄີຍຂາດທັງຄົນລາວເຮົາເອງ ແລະຕ່າງຊາດກ່າວຂານມາຕະຫຼອດເນື່ອງຈາກໃຜໄປແລ້ວກໍ່ຕິດອົກຕິດໃຈທັງອີ່ມເມື່ອໄດ້ສູບດົມອາກາດທີ່ບໍລິສຸດທັງປະທັບໃຈກັບຄວາມງາມຂອງທຳມະຊາດ “ນໍ້າຕົກຕາດ” ກໍ່ເປັນອີກຈຸດໜຶ່ງທີ່ຫຼາຍແຂວງມີ ແລະ ພັດທະນາເປັນແຫຼ່ງທ່ອງທ່ຽວດັ່ງນະ ຄອນຫຼວງວຽງຈັນ ຈຸດໃຈກາງຂອງຂອງປະເທດລາວຊຶ່ງນອກຈາກມີແຫຼ່ງທ່ອງທ່ຽວວັດທະນະທໍາ, ປະຫວັດສາດ ແລະທໍາມະຊາດແລ້ວ, ຍັງມີຕາດປ່າໄລ ເມືອງສີໂຄດຕະບອງ ທີ່ນັບວ່າເປັນອີກແຫຼ່ງທ່ອງທ່ຽວໜຶ່ງທີ່ສ້າງຄວາມຕື່ນຕາຕື່ນໃຈໃຫ້ແກ່ນັກທ່ອງທ່ຽວທັງພາຍໃນ ແລະຕ່າງປະເທດ.

 ຕາດປ່າໄລເປັນສະຖານທີ່ທ່ອງທ່ຽວທາງທໍາມະຊາດແຫ່ງໜຶ່ງທີ່ມີທິວທັດທໍາມະຊາດອ້ອມຂ້າງສວຍສົດງົດງາມ, ເຕັມໄປດ້ວຍຕົ້ນໄມ້ນ້ອຍ-ໃຫຍ່ຂຽວສົດໃສຫຼາກຫຼາຍຊະນິດປົກຄຸມພື້ນທີ່ຊຶ່ງເໝາະກັບການພາຄົນຮັກ ຫຼື ຄອບຄົວໄປຫຼິ້ນທ່ຽວເພື່ອຜ່ອນຄາຍຊຶ່ງສະຖານທີ່ດັ່ງກ່າວມີຄວາມສວຍງາມປະກອບກັບບັນຍາກາດທີ່ສົດຊື່ນຕິດກັບທໍາມະຊາດເຮັດໃຫ້ສະຖານທີ່ທ່ອງທ່ຽວໃນເຂດດັ່ງກ່າວໜ້າຫຼົງໄຫຼ ແລະກໍາລັງເປັນທີ່ສົນໃຈຂອງນັກທ່ອງທ່ຽວພາຍໃນສະຖານທີ່ດັ່ງກ່າວຕັ້ງຢູ່ບ້ານຈຳປາ ເມືອງສີໂຄດຕະບອງ ນະຄອນຫຼວງວຽງຈັນ ທິດເໜືອຕິດກັບຕາດວັງນໍ້າເຜິ້ງ, ທິດໃຕ້ຕິດກັບຕາດມູນຫ່າງຈາກເສັ້ນທາງເລກທີ 13 ເໜືອເຂົ້າມາທາງໜອງແຕ່ງ.

  ເມື່ອມາທ່ອງທ່ຽວ “ຕາດປ່າໄລ” ແຫ່ງນີ້ນັກທ່ອງທ່ຽວຈະໄດ້ສໍາຜັດກັບນໍ້າທີ່ໃສສະອາດ, ອາກາດທີ່ເຢັນສົດຊື່ນ, ເພີດເພີນກັບບັນຍາກາດທີ່ຜ່ອນຄາຍ, ໄດ້ສໍາຜັດທ່ຽວຊົມຄວາມສວຍງາມທີ່ແຕກຕ່າງກັນໄປໂດຍຄ່ອຍໆຍ່າງຂຶ້ນຕາມເສັ້ນທາງຂ້າງຕາດ ຫຼືຂຶ້ນມາຕາມຕາດເລີຍເພື່ອສໍາຜັດກັບສາຍນໍ້າເຢັນສົດຊື່ນເມື່ອນໍ້າຕົກຟົ້ງໃສ່ພ້ອມທັງສາມາດເຂົ້າຫຼິ້ນນໍ້າເຂົ້າໄປໃນກ້ອງຕາດທີ່ມີນໍ້າໄຫຼຜ່ານຢ່າງໜ້າຕື່ນຕາຕື່ນໃຈໄດ້ເລີຍ.

___________

ໂດຍ: ວົງມະນີ,  ໜັງສືພິມເສດຖະກິດ-ສັງຄົມ

• 30/06/2020