ປະຫວັດວັດສີສະຫວ່າງວົງສ໌ ເມືອງໄຊຍະບູລີ

  ວັດສີສະຫວ່າງວົງສ໌ ເປັນວັດທີ່ຕັ້ງຢູ່ໃຈກາງເມືອງໄຊຍະບູລີ ແຂວງໄຊຍະບູລີ ໂດຍການອຸປະຖຳຈາກ 3 ໝູ່ບ້ານຄື: ບ້ານສີເມືອງບ້ານຖິ່ນ ບ້ານສີມຸງຄຸນ ແລະອອກຕົນຍາດໂຍມຫຼາຍບ້ານທັງພາຍໃນ ແລະຕ່າງປະເທດໄດ້ອຸປະຖຳບຳລຸງຕາມກຳລັງສັດທາ, ວັດສີສະຫວ່າງຖືເປັນວັດທີ່ສໍາຄັນຂອງແຂວງ ຫຼື ເປັນວັດຫຼວງຂອງແຂວງກໍ່ວ່າໄດ້ນອກນີ້ຍັງເປັນທີ່ຕັ້ງຂອງອົງການປົກຄອງສົງສູງສຸດພາຍໃນແຂວງ, ໂຮງຮຽນ ມສ ສົງ, ຫ້ອງການສຶກສາສົງ, ຫ້ອງການ ອພສ ເມືອງແຕ່ລະປີມີພະສົງຈຳພັນສາຫຼາຍທີ່ສຸດໃນແຂວງໄຊຍະບູລີ ສະເພາະປີ 2015-2016 ມີພະສົງສາມະເນນຈໍາພັນສາເຖິງ 111 ອົງ.

 ຕາມປະຫວັດກ່າວວ່າວັດສີສະຫວ່າງວົງສ໌ ສ້າງໃນສະໄໝເຈົ້າຊີ ວິດສີສະຫວ່າງວົງສ໌ ໃນປີ ຄສ 1920 ພະອົງເປັນສັດທາສ້າງວັດ ສີສະຫວ່າງ ໃນແຂວງໄຊຍະບູລີ 2 ແຫ່ງ ອີກວັດໜຶ່ງແມ່ນຕັ້ງຢູ່ເມືອງ ປາກລາຍ ຫ່າງຈາກເມືອງໄຊຍະບູ ລີປະມານ 200 ກິໂລແມັດສໍາລັບວັດສີສະຫວ່າງວົງສ໌ ເມືອງໄຊຍະບູລີ ສ້າງຂຶ້ນທຳອິດແມ່ນຕັ້ງຢູ່ແຄມນໍ້າຮຸ່ງບໍລິເວນຫົວຂົວນໍ້າຮຸ່ງປະຈຸບັນແຕ່ຍ້ອນໄພທຳມະຊາດນໍ້າຮຸ່ງເຊາະເຈື່ອນດິນວັດເຂົ້າມາທຸກປີສະໄໝນັ້ນແມ່ນສາທຸໃຫຍ່ສີດາເປັນເຈົ້າອາວາດພ້ອມກັບອອກຕົນຍາດໂຍມມີຄວາມເຫັນດີໃຫ້ຍ້າຍວັດໄປບ່ອນໃໝ່ທີ່ເໝາະສົມກວ່າຈຶ່ງສະເໜີໄປຍັງສຳນັກຣາດຊະວັງຫຼວງພະບາງໃນ ປີ ຄສ 1947 ຈຶ່ງຍ້າຍວັດມາດອນນາຂອງຊາວບ້ານຖິ່ນທີ່ປະກົດເຫັນໃນປະຈຸບັນສ່ວນການຍ້າຍນັ້ນແມ່ນພຽງແຕ່ຍ້າຍສະຖານທີ່ໃໝ່ເທົ່ານັ້ນວັດຖຸອຸປະກອນພະປະທານແມ່ນອັນເກົ່າ ແລະ ຊື່ວັດກໍ່ໃສ່ຊື່ເກົ່າເພາະການຍົກຍ້າຍແມ່ນເຈົ້າສັດທາເກົ່າ ແລະໄດ້ນຳນາຍຊ່າງຈາກສຳນັກຣາດຊະວັງຫຼວງພະບາງມານຳພາກໍ່ສ້າງລວດລາຍສິລະປະຈຶ່ງຍັງຄົງຮູບແບບເດີມ,ສ່ວນການອຸປະຖໍາແມ່ນຊາວບ້ານຖິ່ນເປັນບ້ານກົກບ້ານເຄົ້າຕໍ່ມາໄດ້ມີການຕັ້ງບ້ານໃໝ່ຂຶ້ນອີກສອງບ້ານຄື: ບ້ານສີເມືອງ ແລະ ບ້ານສີມຸງຄຸນກ່ອນປີ 1975 ການກໍ່ສ້າງຖາວອນວັດຖຸຕ່າງໆແມ່ນສໍານັກຣາດຊະວັງອະນຸຍາດກ່ອນຈຶ່ງສ້າງໄດ້.

 ຫຼັງຈາກປະເທດລາວໄດ້ຮັບການປົດປ່ອຍມາຮອດປະຈຸບັນແມ່ນໄດ້ຮັບການອຸປະຖຳຈາກການນຳຂັ້ນແຂວງຂັ້ນເມືອງ ແລະສາມໝູ່ບ້ານມາໂດຍຕະຫຼອດ.

 

แชร์