ປັບປຸງຄະນະບໍລິຫານງານສະຫະພັນເທຄວັນໂດ ແຫ່ງຊາດ

  ພາຍຫຼັງທີ່ໄດ້ມີພິທີຜ່ານຂໍ້ຕົກລົງວ່າດ້ວຍການປະກາດແຕ່ງຕັ້ງຄະນະບໍລິຫານງານສະຫະພັນເທຄວັນໂດແຫ່ງຊາດລາວຊຸດໃໝ່ມາແຕ່ປີ 2018 (2018-2020) ນັບມາຮອດປະຈຸບັນສະຫະພັນດັ່ງກ່າວກໍໄດ້ມີພິທີປະກາດປັບປຸງກົນຈັກການຈັດຕັ້ງຄືນໃໝ່ຢ່າງເປັນທາງການໂດຍແມ່ນ ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນຍັງຄົງດຳເນີນຕຳແໜ່ງເປັນປະທານສະຫະພັນກີລາເທຄວັນໂດແຫ່ງຊາດລາວຄືເກົ່າ ແລະ ປັບຄະນບໍລິຫານງານຈຳນວນໜຶ່ງເພື່ອແນໃສ່ກຽມຄວາມພ້ອມສົ່ງເສີມການພັດທະນາວົງການກີລາເທຄວັນໂດລາວນັບມື້ເຕີບໃຫຍ່ຂະຫຍາຍຕົວໃນວົງກວ້າງສາມາດສ້າງນັກກີລາໃຫ້ມີຄຸນນະພາບກຽມສົ່ງເຂົ້າຮ່ວມລ່າຫຼຽນຄຳງານມະຫະກຳກີລາຊີເກມຄັ້ງທີ 31 ທີ່ ສສ ຫວຽດນາມ ເປັນເຈົ້າພາບໃນປີ 2021 ນີ້.

  ເມື່ອວັນທີ 23 ມິຖຸນາ ຜ່ານມາທີ່ຮ້ານອາຫານລອງລູມເມືອງສີ ໂຄດຕະບອງນະຄອນຫຼວງວຽງຈັນ ໄດ້ມີພິທີປະກາດປັບປຸງກົນຈັກການຈັດຕັ້ງສະຫະພັນເທຄວັນໂດແຫ່ງຊາດລາວ ຢ່າງເປັນທາງການໂດຍໃຫ້ກຽດເຂົ້າຮ່ວມ ແລະເປັນສັກຂີພິຍານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາ (ສສກ) ທັງເປັນປະທານຄະນະກຳມະການໂອແລມປີກແຫ່ງຊາດລາວ ຫຼືຄອລ, ມີທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນທັງເປັນປະທານສະຫະພັນເທຄວັນໂດແຫ່ງຊາດ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງ ສສກ ແລະ ທັງເປັນຮອງປະທານຄອລ, ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ແລະ ທ່ານ ວຽງແກ້ວ ພົມມະວົງ ຫົວໜ້າກົມຈັດຕັ້ງ ແລະພະນັກງານພ້ອມດ້ວຍຄະນະບໍລິຫານງານສະຫະພັນ, ພະນັກງານທີ່ກ່ຽວຂ້ອງຕະ ຫຼອດຮອດສື່ມວນຊົນບາງພາກສ່ວນເຂົ້າຮ່ວມ.

  ໂອກາດນີ້,ທ່ານ ນາງ ແສງເດືອນ ຫຼ້າຈັນທະບູນ ກໍໄດ້ສະແດງຄວາມຍ້ອງຍໍຊົມເຊີຍມາຍັງປະທານພ້ອມດ້ວຍຄະນະບໍລິຫານງານສະຫະພັນເທຄວັນໂດແຫ່ງຊາດຕະ ຫຼອດໄລຍະການຈັດຕັ້ງປະຕິບັດວຽງການ 2 ປີຜ່ານມາສາມາດສ້າງຜົນສຳເລັດ ແລະຜົນງານ ດີເດັ່ນເປັນກຽດສັກສີມາສູ່ປະເທດຊາດຢ່າງຫຼວງຫຼາຍໂດຍສະເພາະໃນງານມະຫະກຳກີລາຊີເກມຄັ້ງ ທີ 30 ທີ່ປະເທດຟິລິບປິນເມື່ອທ້າຍ ປີ 2019 ກໍສາມາດຍາດໄດ້ຫຼຽນເງິນ ແລະຫຼຽນທອງໃຫ້ທັບນັກກີລາລາວ, ເຖິງຢ່າງໃດກໍດີ,ອີງຕາມການຊີ້ນຳຂອງທາວລັດຖະບານກໍຄືການປືກສາຫາລືຂອງຄະນະນຳກະຊວງ ສສກ ເພື່ອປັບປຸງບັນດາຄະນະບໍລິຫານງານສະຫະພັນກີລາແຫ່ງຊາດຄືນໃໝ່ ໂດຍສະເພາະກີລາເທຄວັນໂດເພື່ອເຮັດແນວໃດໃຫ້ວົງການກີລາລາວກ້າວສູ່ຄຸນນະພາບໃໝ່ແນໃສ່ສົ່ງເສີມການພັດທະນານັກກີລາລາວໃຫ້ດີຂຶ້ນກວ່າເກົ່າພ້ອມທັງດຶງເອົາສັງຄົມໄດ້ມີສ່ວນຮ່ວມ, ແນວໃດກໍຕາມ, ຍັງເຊື່ອໝັ້ນວ່າໃນຄະນະບໍລິຫານ ງານສະຫະພັນກີລາຊຸດນີ້ຫຼາຍທ່ານ ລ້ວນແລ້ວແຕ່ມີບົດບາດສຳຄັນຂອງຊາດທີ່ມາຈາກພາກລັດ, ທຸລະກິດ ແລະທະຫານ-ຕຳຫຼວດມີຄວາມໜຸ່ມແໜ້ນ ແລະມີແນວຄິດປັນຍາທີ່ດີ ຊຶ່ງເປັນກຳລັງທ່າແຮງທີ່ຈະຊ່ວຍສົ່ງເສີມການພັດທະນາວົງການກີລາເທຄວັນໂດລາວມີຄວາມເຕີບໃຫຍ່ເຂັ້ມແຂງສາມາດເຊື່ອມໂຍງກັບບັນດາປະເທດອາຊຽນ, ອາຊີ ແລະສາກົນເພື່ອຍາດແຍ່ງເອົາການຊ່ວຍເຫຼືອ, ແລກປ່ຽນບົດຮຽນ ແລະປະສົບການຢ່າງມີໝາກຜົນສຳເລັດໃຫ້ແກ່ປະເທດຊາດຫວັງວ່າສະຫະພັນເທຄວັນໂດລາວຈະເປັນຄວາມຫວັງໃຫ້ແກ່ກະຊວງ ສສກ ກໍຄືຂອງລັດຖະບານທີ່ຈະນຳເອົາຫຼຽນຄຳຈາກສາ ກົນສ້າງກຽດສັກສີມາສູ່ປະເທດຊາດ.

   ຂະນະດຽວກັນ,ທ່ານ ອາດສະພັງທອງ ສີພັນດອນ ກໍໄດ້ສະແດງຄວາມຂອບໃຈເປັນຢ່າງສູງມາຍັງທ່ານລັດຖະມົນຕີກະຊວງ ສສກ ທີ່ໄດ້ໃຫ້ກຽດ, ໃຫ້ຄວາມອົບອຸ່ນ ແລະໄວ້ວາງໃຈໃຫ້ໄດ້ສືບຕໍ່ຮັບໜ້າທີ່ີ່ໆມີກຽດພ້ອມທັງຊີ້ທິດເຢື່ອງທາງເຮັດໃຫ້ການເຄື່ອນໄຫວໃນໄລຍະທີ່ຜ່ານມາປະສົບຜົນສຳເລັດຢ່າງ ໜ້າພາກພູມໃຈຄືບັນດາທ່ານຮູ້ກັນ ແລ້ວວ່າສະຫະພັນເທຄວັນໂດລາວ ແມ່ນອົງການຈັດຕັ້ງຂອງສັງຄົມໜຶ່ງທີ່ໄດ້ຮັບການແຕ່ງຕັ້ງຈາກກະຊວງ ສສກ ຊຶ່ງມີບົດບາດໃນການສົ່ງເສີມພັດທະນາກີລາດັ່ງກ່າວມີທັກສະໃນດ້ານການປ້ອງກັນຕົວ, ສ້າງສຸຂະພາບພາລະນາໄມທີ່ດີກໍຄືການສ້າງໂອກາດໃຫ້ອານຸຊົນ,ເຍົາວະຊົນ ແລະໄວໜຸ່ມຫ່າງໄກປາກົດການຫຍໍ້ທໍ້ຢາເສບຕິດທີ່ກຳລັງຄຸຄາມສັງຄົມປະຈຸບັນພ້ອມນີ້ພວກເຮົາກໍຍັງໄດ້ໜ້າທີ່ບົດບາດສຳຄັນໃນການປະກອບສ່ວນສ້າງສາພັດທະນາປະເທດຊາດໃນການພັດທະນາກີລາລາວກໍຄືເສດຖະ ກິດ-ສັງຄົມຂອງຊາດມີຄວາມເຂັ້ມແຂງເຕີບໃຫຍ່ເປັນກ້າວໆອີງໃສ່ຄວາມຮຽກຮ້ອງຕ້ອງການຕົວຈິງເພື່ອຮັບປະກັນໃນການເຄື່ອນໄຫວສົ່ງເສີມການພັດທະນາກີລາເທຄວັນໂດ ຢ່າງມີຄວາມຍືນຍົງສາມາດສ້າງຜົນງານໃຫ້ແກ່ປະເທດຊາດ, ດັ່ງນັ້ນສະຫະພັນເທຄວັນໂດແຫ່ງຊາດຊຸດໃໝ່ນີ້ຈະພ້ອມກັນເພີ່ມທະວີຄວາມເອົາໃຈໃສ່ປັບປຸງແກ້ໄຂໂດຍສະເພາະໜ້າວຽກຈຸດເດັ່ນຕົ້ນຕໍ ແມ່ນການສ້າງແຜນຍຸດທະສາດການພັດທະນາກີລາເທຄວັນໂດໃຫ້ເປັນລະບົບຢ່າງຕໍ່ເນື່ອງທັງໄລຍະສັ້ນ ແລະໄລຍະຍາວຄາດວ່າຈະເລີ່ມຕົ້ນຈາກປີ 2020-2025 ເປັນຕົ້ນໄປ, ປັບປຸງຕຳແໜ່ງງານພາຍໃນສະຫະພັນໃຫ້ແທດເໝາະຕົວຈິງ, ປັບປຸງລະບົບການບໍລິການ, ລະບົບຫ້ອງການ ແລະລະບົບການລາຍງານການເຄື່ອນໄຫວ ຢ່າງລະອຽດໃນແຕ່ລະໄຕມາດກໍຄືປະຈຳປີ, ການຊຸກຍູ້ຕິດຕາມ ແລະ ກວດກາການປະຕິບັດແຜນພັດທະນາສອດຄ່ອງກັບສະພາບຕົວໃນ ແຕ່ລະໄລຍະຮ່ວມກັບບັນດາສະໂມສອນພາຍໃນຂອບເຂດ ແລະທົ່ວປະເທດ,ຈະສ້າງພັດທະນາກີລາເທຄວັນໂດລາວໃຫ້ມີຄຸນະພາບໃໝ່ຈະຕ້ອງຄຽງຄູ່ກັບການສ້າງບຸກຄະລາກອນທາງຄູຝຶກ ແລະປັດໄຈສຳຄັນແມ່ນຈະເລັ່ງໃສ່ໃນການສ້າງຕັ້ງກອງທຶນເພື່ອຮັບປະກັນໃຫ້ແກ່ການເຄື່ອນໄຫວເພື່ອເປັນທຶນ ສົມທົບກັບລັດທີ່ໄດ້ຮັບຈັດສັນໃນແຕ່ໄລຍະທັງໝົດເຫຼົ່ານັ້ນກໍເປັນວຽກງານຈຸດສຸມສະຫະພັນພວກເຮົາຈະໄດ້ສືບຕໍ່ຈັດຕັ້ງປະຕິບັດໃນແຕ່ລະສົກປີກໍຄືການພັດທະນາແຕ່ນີ້ຫາປີ 2025 ແລະ ສະຫະພັນຊຸດໃໝ່ຈະໄດ້ພ້ອມພຽງກັນຄົ້ນຄວ້າ ແລະກຳນົດທິດທາງແຜນການໃຫ້ສຳເລັດໄປຕາມເປົ້າໝາຍທີ່ວາງ ໄວ້ສະນັ້ນໃນໂອກາດອັນສະຫງ່າລາສີນີ້ຂໍໃຫ້ເຊື່ອໝັ້ນວ່າໃນນາມປະທານສະຫະພັນເທຄວັນໂດແຫ່ງຊາດຂໍຢັ້ງຢືນວ່າພວກເຮົາຈະສຸມທຸກກຳລັງເຫື່ອແຮງຄວາມຮູ້ຄວາມສາມາດເຂົ້າໃນການພັດທະນາກີລາເທຄວັນໂດໃຫ້ມີທ່າກ້າວທີ່ພົ້ນເດັ່ນກວ່າເກົ່າ ແລະ ຈະພະຍາຍາມເຮັດໃຫ້ສຳເລັດໃນວຽກງານແຕ່ລະເປົ້າໝາຍດັ່ງທີ່ໄດ້ກຳນົດມານັ້ນ.

 ຄະນະບໍລິຫານງານສະຫະພັນເທຄວັນໂດແຫ່ງຊາດລາວຊຸດປັບປຸງໃໝ່ໃນຄັ້ງນີ້ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງເປັນປະທານສຳລັບທ່ານ ອຸໄດ ສຸວັນມະລີ, ທ່ານ ທະນຸສັກ ຍົມມະຈັກ ແລະທ່ານ ສີວັນ ນະກອນມະລີວັນ ເປັນຮອງປະທານສ່ວນທ່ານ ຈັນທະວົງ ປັນຍາສິລິ ເປັນເລຂາທິການນອກນັ້ນກໍຍັງມີອີກ 10 ທ່ານ ເປັນຄະນະບໍລິຫານງານສະຫະພັນ.  

 

แชร์