ສຳເລັດກອງປະຊຸມໃຫຍ່ສະມາຊິກພັກ ຄັ້ງທີ IV ຄະນະພັກຮາກຖານ ສທຄ

  ກອງປະຊຸມໃຫຍ່ສະມາຊິກພັກຄັ້ງທີ IV ຂອງຄະນະພັກຮາກຖານສະຖາບັນການທະນາຄານ (ສທຄ) ໄດ້ສໍາເລັດລົງດ້ວຍໝາກຜົນອັນຈົບງາມໃນວັນທີ 26 ມິຖຸນາ 2020 ທີ່ສະໂມສອນ ສທຄ ນະຄອນຫຼວງວຽງຈັນ ພາຍໃຕ້ການເປັນປະທານຂອງສະຫາຍ ປອ. ສັນຕິ ພົນເມືອງລາວເລຂາຄະນະພັກຮາກຖານ-ຫົວໜ້າ ສທຄ ໂດຍການໃຫ້ກຽດເຂົ້າຮ່ວມຂອງສະຫາຍ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ-ຜູ້ວ່າການທະນາຄານ ແຫ່ງ ສປປ ລາວ (ທຫລ); ພ້ອມນີ້, ກໍ່ມີສະຫາຍ ພານຸສັກ ແກ່ນວົງພະຈັນ ຄະນະພັກ ທຫລ, ຫົວໜ້າກົມຈັດຕັ້ງ ແລະພະນັກງານ, ບັນດາສະຫາຍຄະນະພັກຮາກຖານ-ຄະນະໜ່ວຍພັກທີ່ຂຶ້ນກັບອົງຄະນະພັກ ທຫລ, ຜູ້ແທນທົ່ວຄະນະພັກຮາກຖານ ແລະ 3 ອົງການຈັດຕັ້ງຈັດຕັ້ງມະຫາຊົນ ສທຄ ເຂົ້າຮ່ວມ.
  ກອງປະຊຸມໄດ້ພ້ອມກັນຄົ້ນຄວ້າ ແລະຮັບຮອງເອົາຮ່າງລາຍງານການເມືອງຂອງຄະນະພັກຮາກຖານ ສທຄ ທີ່ສະເໜີໂດຍສະຫາຍ ນາງ ພຸດສະດີ ພົມພິພັກ ຄະນະ ພັກຮາກຖານ ສທຄ ທີ່ໄດ້ສັງເກດຕີລາຄາຜົນງານໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຕະຫຼອດໄລຍະ 5 ປີແຫ່ງການຊີ້ນໍາ-ນໍາພາ ຊຶ່ງຢູ່ໃນເງື່ອນ ໄຂສະພາບແວດລ້ອມພາຍໃນ ແລະຕ່າງປະເທດມີການຜັນແປໂດຍສະເພາະພະຍາດລະບາດ, ການຜັນຜວນຂອງອັດຕາແລກປ່ຽນ ແລະ ອັດຕາດອກເບ້ຍ. ແຕ່ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງຄະນະພັກ-ຄະນະຜູ້ວ່າ ທຫລ, ຄະນະພັກຮາກຖານ ສທຄ ໄດ້ມີຄວາມພະຍາຍາມປຸກລະດົມກໍາລັງແຮງພາຍໃນເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກ ທຫລ ໂດຍສະເພາະສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ແລະ ແຜນຍຸດທະສາດໄລຍະຍາວຂອງ ສທຄ ດ້ວຍຜົນສໍາເລັດຫຼາຍດ້ານ.
  ຄະນະພັກຮາກຖານຖືເອົາການສຶກສາອົບຮົມການເມືອງ-ແນວຄິດເປັນບັນຫາກົກ ແລະຕິດພັນກັບທຸກການເຄື່ອນໄຫວວຽກງານດ້ວຍຫຼາຍຮູບການທີ່ເໝາະສົມເຮັດໃຫ້ສະມາຊິກພັກ-ພະນັກງານກຳໄດ້ແນວທາງນະໂຍບາຍຂອງພັກ ແລະຖືເອົາລະບອບສ່ອງແສງສາຍງານ, ກໍາສະພາບແຕ່ລະບັນຫາໃຫ້ຈະແຈ້ງເປັນເນື້ອໃນສໍາຄັນໃນການດໍາເນີນຊີວິດການເມືອງພາຍໃນພັກ ແລະ ອົງການຈັດຕັ້ງມະຫາຊົນເພື່ອສໍາຫຼວດກວດກາ, ຕໍາໜິກໍ່ສ້າງຊ່ວຍເຫຼືອກັນ, ຈາກການປະຕິບັດຄືດັ່ງກ່າວເຮັດໃຫ້ສະ ພາບແນວຄິດຂອງຖັນແຖວສະມາຊິກພັກ-ພະນັກງານແຕ່ລະຂັ້ນມີແນວຄິດອຸ່ນອ່ຽງທຸ່ນທ່ຽງ, ມີຄວາມເປັນເອກະພາບຕໍ່ກັບແນວທາງການບໍລິຫານງານຂອງຂັ້ນເທິງ, ມີຄວາມຫ້າວຫັນ, ສຸມກໍາລັງເຫື່ອແຮງ, ສະຕິປັນຍາເຂົ້າໃນການປະຕິບັດໜ້າທີ່ທີ່ໄດ້ຮັບມອບໝາຍເປັນຢ່າງດີ.
  ຄະນະພັກຮາກຖານ ສທຄ ປະຕິບັດໜ້າທີ່ເປັນເສນາທິການໃນການກໍ່ສ້າງ ແລະພັດທະນາຊັບພະຍາກອນມະນຸດດ້ານການເງິນ-ການທະນາຄານເພື່ອສະໜອງໃຫ້ບັນດາທະນາຄານ ແລະສະຖາບັນການເງິນກໍ່ຄືຂະແໜງການ-ທ້ອງຖິ່ນໃນທົ່ວປະເທດ. ໃນຜ່ານມາ, ສທຄ ໄດ້ປະຕິບັດຕາມລະບຽບຂອງກະຊວງສຶກສາທິການ ແລະກິລາວາງອອກໂດຍສະເພາະມາດຕະຖານຫຼັກສູດການສຶກສາແຫ່ງຊາດ; ສໍາເລັດການສ້າງ, ປັບປຸງຫຼັກສູດ ແລະໄດ້ຮັບອະນຸມັດ 4 ສາຂາ ຄື: ການທະນາຄານ, ການເງິນ, ການບັນຊີ ແລະການເງິນຈຸລະພາກໃນນີ້ປະກອບມີຫຼັກສູດປະລິນຍາຕີ, ຕໍ່ເນື່ອງປະລິນຍາຕີພາກປົກກະຕິ ແລະ ພາກຄໍ່າ ແລະ ອະນຸປະລິນຍາຕີສາມາດສ້າງບຸກຄະລາກອນອອກສູ່ສັງຄົມໄດ້ທັງໝົດ 5.603 ຄົນ, ປະລິນຍາຕີ 2.996 ຄົນ, ຊັ້ນສູງ 2.607 ຄົນ, ປະຈຸບັນມີນັກສຶກສາທັງໝົດ 3.070 ຄົນ, ລະດັບຊັ້ນສູງ 1.071 ຄົນ ແລະ ປະລິນຍາຕີ 2.636 ຄົນ.
ສທຄ ໄດ້ປັບປຸງຕໍາລາຮັບໃຊ້ການຮຽນ-ການສອນໃນແຕ່ລະພາກຮຽນໃຫ້ມີຄວາມສົມບູນທາງດ້ານເນື້ອໃນ, ປະລິມານ ແລະຄຸນນະພາບຊຶ່ງສໍາເລັດການສ້າງ, ຮຽບຮຽງ, ປັບປຸງຕໍາລາ 28 ວິຊາ ແລະນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການຮຽນ-ການສອນ; ຈັດຝຶກອົບຮົມໃນຫົວຂໍ້ຕ່າງໆ 40 ຫົວຂໍ້ ແລະ ໄດ້ຄົ້ນຄວ້າວິທະຍາສາດສໍາເລັດ 18 ຫົວຂໍ້, ນໍາພານັກສຶກສາ ສທຄ ຝຶກງານຢູ່ທະນາຄານຈໍາລອງໄດ້ 6 ຊຸດ ມີ 4.402 ຄົນ ແລະ ຮັບນັກສຶກສາຝຶກງານຈາກພາກສ່ວນພາຍນອກ 4 ຊຸດມີ 170 ຄົນ; ພັດທະນາລະບົບຄຸ້ມຄອງຫໍສະໝຸດໂດຍໄດ້ນໍາໃຊ້ລະບົບໂປຼແກຼມ PMB ແລະ E-book ເຂົ້າໃນການຄຸ້ມຄອງບໍລິຫານ, ຈັດການ ແລະບໍລິການຂໍ້ມູນຂ່າວສານຕ່າງໆ, ຄຸ້ມຄອງການປະພຶດຂອງນັກສຶກສາໂດຍຈັດຕັ້ງໂຄສະນາເຜີຍແຜ່ຜົນຮ້າຍຂອງຢາເສບຕິດ, ວຽກງານປ້ອງກັນອັກຄີໄພ ແລະປາຖະກະຖາປະຖົມນິເທດໃນເວລາເປີດຮຽນໃໝ່; ຈັດກິດຈະກໍາກິລາ, ສິລະປະວັນນະຄະດີ, ຖາມຕອບວິທະຍາສາດ, ໄປທັດສະນະສຶກສານອກສະຖານທີ່, ອອກແຮງງານລວມຕ່າງໆຢ່າງເປັນປົກ ກະຕິ. ນອກຈາກນັ້ນ, ຍັງບໍລິຈາກເລືອດ 8 ຄັ້ງ 901 ເທື່ອຄົນ; ລະດົມເຄື່ອງຊ່ວຍເຫຼືອສັງຄົມມູນຄ່າ 203,28 ລ້ານກີບ. ນອກນັ້ນຍັງສ້າງສະໂມສອນອະດິດນັກ ສຶກສາ ແລະຄັງສະຫວັດດີການນັກສຶກສາຂຶ້ນ. ພ້ອມນີ້, ຍັງມີການພົວພັນກັບສະຖາບັນການສຶກສາພາຍໃນ-ຕ່າງປະເທດ ແລະຜົນງານດ້ານອື່ນໆ.
  ກອງປະຊຸມຍັງໄດ້ສະເໜີທິດທາງລວມ ແລະໜ້າທີ່ຕົ້ນຕໍໃນການຊີ້ນໍາ-ນໍາພາໃນ 5 ປີ ຕໍ່ໜ້າ ແລະ ທີ່ປະຊຸມຍັງພ້ອມກັນໃຊ້ສິດປະຊາທິປະໄຕຂອງຕົນຢ່າງເຕັມສ່ວນເລືອກເອົາຄະນະພັກຮາກຖານ ສທຄ ສະໄໝທີ IV ປະກອບດ້ວຍ 5 ສະຫາຍ ເພື່ອສືບຕໍ່ເປັນແກນນໍາໃນການຊີ້ນໍາ-ນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນໂດຍເລືອກເອົາສະຫາຍ ປອ. ສັນຕິ ພົນເມືອງລາວ ເປັນເລຂາຄະນະພັກຮາກຖານ ສທຄ , ສະຫາຍ ປອ. ນາງ ທ່ອນມີ ແກ້ວກິນນາລີ ເປັນຮອງເລຂາ ແລະສະຫາຍ ສະຫວັນດວງຈິດ ແສງເດືອນ ເປັນປະທານຄະນະກວດກາ.ພ້ອມນີ້ຍັງເລືອກເອົາຜູ້ແທນສົມບູນ 6 ສະຫາຍ, ສຳຮອງ 2 ສະຫາຍ ເຂົ້າຮ່ວມກອງປະຊຸມໃຫຍ່ຄັ້ງທີ IV ຂອງອົງຄະນະພັກ ທຫລ.
  ໃນໂອກາດດັ່ງກ່າວ, ສະຫາຍເລຂາຄະນະພັກ ທຫລ ໄດ້ສະແດງຄວາມຍ້ອງຍໍ, ຊົມເຊີຍຕໍ່ຄະນະພັກຮາກຖານຊຸດເກົ່າທີ່ໄດ້ຊີ້ນໍາ - ນໍາພາສະມາຊິກພັກ, ພະນັກງານປະຕິບັດໜ້າທີ່ການເມືອງສາມາດຍາດໄດ້ຜົນງານໃນຫຼາຍໆດ້ານ ແລະມີທິດຊີ້ນໍາໃນແຕ່ລະວຽກງານຢ່າງພາວະວິໄສ ແລະມີຈຸດສຸມ; ນອກຈາກນີ້, ສະຫາຍຍັງມີຄວາມເຊື່ອໝັ້ນວ່າ: ໃນຕໍ່ໜ້າຄະນະພັກຮາກຖານຊຸດໃໝ່ຈະນໍາພາຖັນແຖວສະມາຊິກພັກ-ພະນັກງານສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນໃຫ້ບັນລຸຜົນສໍາເລັດ ແລະຍາດໄດ້ໝາກຜົນອັນໃໝ່ທີ່ໃຫຍ່ຫຼວງກວ່າເກົ່າ.

________________

ຂຽນໂດຍ: ຣັດສະໝີ ດວງສັດຈະ     

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์