ສະຖານທີ່ທ່ອງທ່ຽວຕາດຜາສ້ວມ

 ນໍ້າຕົກຕາດຜາສ້ວມເປັນແຫຼ່ງທ່ອງທ່ຽວທາງທໍາມະຊາດທີ່ມີຄວາມສວຍງາມຕັ້ງຢູ່ບ້ານໂດນ ເມືອງບາຈຽງຈະເລີນສຸກ ແຂວງຈໍາປາສັກ ຊຶ່ງມີໄລຍະທາງຫ່າງຈາກຕົວເມືອງປາກເຊ ໄປທາງທິດເໜືອຕາເວັນອອກສຽງເໜືອ 38 ກິໂລແມັດ, ເດີນທາງໄປທາງປາກຊ່ອງແລ້ວກໍຮອດຫຼັກ 21 ໃຫ້ລ້ຽວຊ້າຍໄປຕາມເສັ້ນທາງເມືອງບາຈຽງ ໄປປະມານ 15 ກິໂລແມັດ, ແລ້ວກໍຈະເຫັນປ້າຍໃຫ່ຍຢູ່ທາງເບື້ອງຊາຍມືຂຽນວ່ານໍ້າຕົກຕາດຜາສ້ວມຫຼັງຈາກນັ້ນກໍໃຫ້ຂີ່ເຂົ້າໄປປະມານ 2 ກິໂລແມັດກໍ ຈະຮອດນໍ້າຕົກ ຕາດຜາສ້ວມ.

 ນໍ້າຕົກຕາດຜາສ້ວມເປັນຕາດທີ່ມີຄວາມສວຍສົດງົດງາມເປັນຢ່າງຍິ່ງ,ມີນໍ້າຂາວໃສສະອາດໄຫຼອອກມາຈາກຮ່ອມຜາລົງມາໂຕນໃສ່ຕາດທີ່ເປັນຫຼາຍຂັ້ນກະແຈກກະຈາຍ ,ນໍ້າຕົກຕາດຜາສ້ວມມີຄວາມສູງປະມານ 6 ແມັດ ແລະມີຄວາມກ້ວາງ 7 ແມັດ, ຄຳວ່າສ້ວມເປັນພາສາລາວໝາຍເຖິງຫ້ອງຫໍ ຫຼື ຫ້ອງນອນຊຶ່ງລັກສະນະຂອງຕາດສ້ວມຄ້າຍຄືຫ້ອງຫໍຂອງຄູ່ສົມລົດໃໝ່, ຈຸດເດັ່ນຂອງນໍ້າຕົກຕາດຜາສ້ວມຄືສາຍນໍ້າທີ່ໄຫຼຜ່ານຫິນຜາຂະໜາດໃຫຍ່ທີ່ມີລັກສະນະເປັນແທ່ງໆຮູບຮ່າງຄ້າຍຫ້ອງຫໍບໍລິເວນອ້ອມຂ້າງນໍ້າຕົກຕາດຜາສ້ວມມີທໍາມະຊາດທີ່ອຸດົມສົມບູນ,ມີປ່າໄມ້ທີ່ຂຽວກະຈີງົດງາມຍິ່ງ,ປະກອບດ້ວຍຕົ້ນໄມ້ນ້ອຍ-ໃຫຍ່ລວມທັງຊີວະນາໆພັນອາໄສຢູ່.

 

 ເມື່ອມາທ່ອງທ່ຽວ “ນໍ້າຕົກຕາດຜາສ້ວມ”ແຫ່ງນີ້ນັກທ່ອງທ່ຽວຈະໄດ້ສໍາຜັດກັບນໍ້າທີ່ໃສສະອາດ, ອາກາດທີ່ເຢັນສົດຊື່ນ, ເພີດເພີນກັບບັນຍາກາດທີ່ຜ່ອນຄາຍ, ໄດ້ສໍາຜັດທ່ຽວຊົມຄວາມສວຍ ງາມທີ່ແຕກຕ່າງກັນຂອງຕາດໂດຍການຄ່ອຍໆຍ່າງຂຶ້ນຕາມເສັ້ນທາງຂ້າງຕາດ ຫຼືຂຶ້ນມາຕາມຕາດເລີຍເພື່ອສໍາຜັດກັບສາຍນໍ້າເຢັນສົດຊື່ນເມື່ອນໍ້າຕົກຟົ້ງໃສ່ພ້ອມທັງສາມາດເຂົ້າຫຼິ້ນນໍ້າເຂົ້າໄປໃນກ້ອງຕາດທີ່ມີນໍ້າໄຫຼຜ່ານຢ່າງໜ້າຕື່ນຕາຕື່ນໃຈເໝາະສໍາລັບຜູ້ທີ່ມັກການທ່ອງທ່ຽວໃນຮູບແບບພະຈົນໄພ.

____________

ໂດຍ: ວົງມະນີ, ໜັງສືພິມເສດຖະກິດ-ສັງຄົມ

แชร์