ສ້າງທາງບ້ານດົງສະຫວັນ ຫາ ບ້ານສະແລນ

  ໂຄງການພັດທະນາຊົນນະບົດໄລຍະ1 (RDP1) ໄດ້ກໍ່ສ້າງ ແລະສ້ອມແປງເສັ້ນທາງແຕ່ແຍກທາງເລກທີ 9 ບໍລິເວນບ້ານດົງສະຫວັນໄປຫາບ້ານສະແລນເມືອງເຊໂປນທີ່ມີຄວາມຍາວ 24 ກວ່າກິໂລແມັດ ມາຮອດປະຈຸບັນແມ່ນໄດ້ສຳເລັດ 100% ຊຶ່ງລວມມູນຄ່າ 17,9 ຕື້ກວ່າກີບ.

  ພິທີມອບ-ຮັບໂຄງການດັ່ງກ່າວໄດ້ຈັດຂຶ້ນວັນທີ 23 ມິຖຸນາ ຊຶ່ງລະຫວ່າງ ທ່ານ ພອນມະລາ ພົມມະຫາໄຊ ຜູ້ອໍານວຍການບໍລິສັດ PMS ຮັບເໝົາກໍ່ສ້າງຂົວທາງ ຈໍາກັດ ແລະທ່ານ ເສີມຄໍາ ຈັນທະວົງ ຫົວໜ້າໂຄງການພັດທະນາຊົນນະບົດໄລຍະ 1 (RDP1) ໂດຍເຂົ້າຮ່ວມຂອງ ທ່ານ ສົມບັດ ອິດທະວົງ ຮອງເຈົ້າເມືອງເຊໂປນ ບັນດາຜູ້ຕາງໜ້າຈາກພະແນກໂຍທາທິການແລະຂົນສົ່ງແຂວງ,ພະແນກແຜນການ ແລະການລົງທຶນ, ພະແນກການຄ້າ ແລະຫ້ອງການທີ່ກ່ຽວຂ້ອງຂອງເມືອງເຊໂປນເຂົ້າຮ່ວມ.

  ໂຄງການພັດທະນາຊົນນະບົດໄລຍະ1 (RDP1) ຂອງເມືອງເຊໂປນ ແຂວງສະຫວັນນະເຂດ ກໍ່ຄືໄດ້ສ້ອມແປງ ແລະກໍ່ສ້າງເສັ້ນທາງແຕ່ແຍກທາງເລກທີ 9 ບໍລິເວນບ້ານດົງສະຫວັນໄປຫາບ້ານສະແລນທີ່ມີຄວາມຍາວ 24 ກວ່າກິໂລແມັດ ໃນນີ້ໄດ້ປູຢາງຜ່ານບ້ານປະຊາຊົນ ແລະບ່ອນສູງຊັນແມ່ນ 12 ກິໂລແມັດ,ປູຫີນແຮ່ 12 ກວ່າກິໂລແມັດ, ປູເບຕົງ 970 ແມັດ, ກໍ່ສ້າງຂົວຈົມ 15 ແຫ່ງທີ່ມີຄວາມຍາວ 837 ແມັດ, ກໍ່ສ້າງທໍ່ລ່ຽມ 8 ແຫ່ງ, ກໍ່ສ້າງທໍ່ກົມ 20 ແຫ່ງ ແລະກໍ່ສ້າງຝາປິດໃສ່ທໍ່ເກົ່າ 22 ແຫ່ງ, ກໍ່ສ້າງທາງເຂົ້າໂຮງຮຽນ ແລະ ສ້ອມແປງຫຼັງຄາໂຮງຮຽນປະຖົມ 3 ແຫ່ງ ພ້ອມນັ້ນກໍຈະໄດ້ສ້ອມແປງຂົວຈົມທີ່ເປ່ເພອີກຈຳນວນໜຶ່ງມີມູນຄ່າການກໍ່ສ້າງ ທັງໝົດ 17,9 ຕື້ກີບ ໂດຍແມ່ນບໍລິສັດ PMS ກໍ່ ສ້າງຂົວທາງຈຳກັດ ເປັນຜູ້ຮັບເໝົາໃນໄລຍະເວລາກໍ່ສ້າງ 18 ເດືອນ ເລີ່ມແຕ່ວັນທີ 1 ມັງກອນ 2019 ຈົນຮອດວັນທີ 30 ມິຖຸນາ ແມ່ນສໍາເລັດ 100% ນອກນັ້ນບໍລິສັດ PMS ຍັງໄດ້ຮັບປະກັນຄຸນນະພາບເປັນເວລາ 1 ປີ ຖ້າມີການເປ່ເພທາງດ້ານເຕັກນິກແມ່ນຮັບຜິດຊອບໃນ ການກໍ່ສ້າງ ແລະສ້ອມແປງຄືນໃໝ່.

_____________

ຂ່າວ: ແພງຕາ,  ໜັງສືພິມເສດຖະກິດ-ສັງຄົມ

แชร์