ກະສິກຳຊຸກຍູ້ສົ່ງເສີມການຜະລິດສະບຽງອາຫານໃຫ້ພຽງພໍ

  ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ໄດ້ຊີ້ແຈ້ງກ່ຽວກັບທິດທາງແຜນການ ແລະມາດຕະການໃນການຊຸກຍູ້ ແລະສົ່ງເສີມການຜະລິດສະບຽງອາຫານໃນເງື່ອນໄຂການແຜ່ລະບາດຂອງພະຍາດໂຄວິດ-19 ແກ່ຍາວ; ລວມທັງບັນຫາໄພທຳມະຊາດໃນປີຜ່ານມາ ແລະໄພແຫ້ງແລ້ງໃນປະຈຸບັນຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ວັນທີ 25 ມິຖຸນາ 2020 ວ່າ: ເພື່ອຮັບປະກັນມີສະບຽງອາຫານພຽງພໍຕອບສະໜອງໃຫ້ການຊົມໃຊ້ພາຍໃນ ແລະການສົ່ງອອກ, ສຳລັບແຜນການປີ 2020, ຂະແໜງກະສິກຳ ແລະ ປ່າໄມ້ໄດ້ຮ່ວມກັບອົງການປົກຄອງທ້ອງຖິ່ນທົ່ວປະເທດສູ້ຊົນປະຕິບັດຕົວເລກຄາດໝາຍ 5 ນະໂຍບາຍ ແລະ 4 ມາດຕະການກ່ຽວກັບການຟື້ນຟູ ແລະ ສົ່ງເສີມການຜະລິດທີ່ສະພາແຫ່ງຊາດຮັບຮອງຊຶ່ງເຮັດໃຫ້ແຜນການຄໍ້າປະກັນຄວາມໝັ້ນຄົງສະບຽງອາ ຫານ, ແຜນງານຜະລິດກະສິກຳເປັນສິນຄ້າກາຍເປັນຂະບວນຟົດຟື້ນໃນທົ່ວປະເທດເຮັດໃຫ້ຕະຫຼາດຈຳໜ່າຍສິນຄ້າຟົດຟື້ນຂຶ້ນໃນເບື້ອງຕົ້ນ, ແຕ່ໃນຕົ້ນປີນີ້ໄດ້ປະສົບກັບໄພແຫ້ງແລ້ງແກ່ຍາວຫຼາຍເດືອນເຮັດໃຫ້ຄວາມອາດສາມາດໃນການປະຕິບັດຕົວເລກຄາດໝາຍຫຼາຍດ້ານບໍ່ບັນລຸຕາມແຜນການທີ່ວາງໄວ້ຊຶ່ງໄດ້ສົ່ງຜົນໃຫ້ການຂະ ຫຍາຍຕົວຂະແໜງກະສິກຳຈະສາມາດບັນລຸພຽງ 2,3% ຫຼຸດແຜນການ 0,4%.

  ຢ່າງໃດກໍຕາມຂະແໜງກະສິກຳ ແລະປ່າໄມ້ຈະສູ້ຊົນຮັກສາລະດັບການຂະຫຍາຍຕົວ 2,3 ຫາ 2,5% ປະກອບສ່ວນໃນລວມຍອດຜະລິດຕະພັນພາຍໃນ 15 ຫາ 17%; ສູ້ຊົນຜະລິດເຂົ້າເປືອກບໍ່ຫຼຸດ 3,5 ລ້ານໂຕນ ໂດຍການສຸມໃສ່ຜະລິດເຂົ້ານາແຊງ ແລະນາປີ, ຜະລິດພືດຜັກ, ຂະຫຍາຍການລ້ຽງປາໃຫ້ມີຜົນຜະລິດເພີ່ມຂຶ້ນ ເພື່ອສະໜອງການບໍລິໂພກໃຫ້ພຽງພໍ; ສູ້ຊົນການຜະລິດກະສິກຳ ແລະປ່າໄມ້ເປັນສິນຄ້າເພື່ອສົ່ງອອກໃຫ້ໄດ້ຫຼາຍກວ່າ 1,2 ຕື້ໂດລາສະຫະລັດ.

---------------

ຂ່າວ: ຟ້າ, ໜັງສືພິມເສດຖະກິດ-ສັງຄົມ

 

แชร์