ຮສສ ຊີ້ແຈງນະໂຍບາຍຊ່ວຍເຫຼືອແຮງງານລາວຮັບຜົນກະທົບຈາກໂຄວິດ-19

  ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມໄດ້ຂຶ້ນຊີ້ແຈງກ່ຽວກັບນະໂຍບາຍ ແລະມາດຕະການຊ່ວຍເຫຼືອແຮງງານລາວທີ່ໄດ້ຮັບຜົນກະທົບຈາກການລະບາດຂອງພະຍາດ (ໂຄວິດ-19) ຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ໃນຕອນເຊົ້າຂອງວັນທີ 25 ມິ ຖຸນາ 2020 ວ່າ: ໄດ້ຕິດຕາມຄຸ້ມຄອງຜູ້ອອກແຮງງານລາວຢູ່ພາຍໃນ ແລະມາຈາກຕ່າງປະເທດ,ການສ້າງນະໂຍບາຍ ແລະນິຕິກຳ, ລວມທັງນະໂຍບາຍປະກັນສັງຄົມເພື່ອແກ້ໄຂຜົນກະທົບໃນໄລຍະການລະບາດ, ນະໂຍບາຍອຸດໜູນວ່າງງານສະເພາະໃຫ້ຜູ້ປະກັນຕົນໃນລະບົບປະກັນສັງຄົມພາກວິສາຫະກິດ ແລະອື່ນໆ.

 ທ່ານ ຄໍາແພງ ໄຊສົມແພງ ກ່າວວ່າ: ການແຜ່ລະບາດຂອງພະຍາດໂຄວິດ-19 ໄດ້ຮັບຜົນກະທົບຕໍ່ເສດຖະກິດ-ສັງຄົມພາຍໃນປະເທດຫຼາຍດ້ານໂດຍສະເພາະຂົງເຂດແຮງງານ ແລະສະຫວັດດີການສັງຄົມແມ່ນໄດ້ປິດຫົວໜ່ວຍແຮງງານ/ຫົວໜ່ວຍ ທຸລະກິດອັນເຮັດໃຫ້ແຮງງານຈໍານວນຫຼາຍຕ້ອງໄດ້ພັກວຽກ, ມີຫຼາຍຫົວໜ່ວຍທຸລະ ກິດທີ່ມີຄວາມຈໍາເປັນຕ້ອງຫຼຸດຜ່ອນການຜະລິດກໍ່ມີຄວາມສ່ຽງໃນການຍົກເລີກສັນຍາແຮງງານມີຫຼາຍຫົວໜ່ວຍທຸລະກິດບໍ່ສາມາດຈ່າຍຄ່າແຮງງານໃຫ້ແຮງງານໄດ້ໃນເວລາທີ່ຍັງບໍ່ສາມາດດໍາເນີນກິດຈະການໂດຍສະເພາະແມ່ນຂະແໜງການທ່ອງທ່ຽວ, ໂຮງແຮມ, ຮ້ານອາຫານ ແລະອື່ນໆ, ພ້ອມດຽວກັນນັ້ນແຮງງານລາວຈໍານວນ ຫຼາຍໄດ້ເດີນທາງກັບຈາກຕ່າງປະເທດຊຶ້ງມີຜົນກະທົບຕໍ່ຄ່າແຮງງານ ແລະຊີວິດການເປັນຢູ່ຂອງເຂົ້າເຈົ້າບໍ່ໜ້ອຍ. ສະນັ້ນ, ກະຊວງ ຮສສ ກໍໄດ້ເອົາໃຈໃສ່ປະສານງານກັບກອງເລຂາຄະນະສະເພາະກິດຂອງກະຊວງການຕ່າງປະເທດ, ກະຊວງທີ່ກ່ຽວຂ້ອງ, ສູນບໍລິການຈັດຫາງານ ແລະ ບັນດາບໍລິສັດຈັດຫາງານໃນການຕິດຕາມຮັບຜູ້ອອກແຮງງານລາວພ້ອມເກັບກໍາຕົວເລກຂອງພົນລະເມືອງລາວທີ່ເດີນທາງມາຈາກປະເທດໄທຢູ່ຕາມດ່ານສາກົນ ແລະດ່ານທ້ອງຖິ່ນເພື່ອນໍາເຂົ້າໄປສູ່ສູນກັກກັນ ແລະສົ່ງກັບຄືນທ້ອງຖິ່ນ.

 ນອກຈາກນີ້, ຍັງຕິດຕາມຊຸກຍູ້ ແລະໃຫ້ການຊ່ວຍເຫຼືອຜູ້ອອກແຮງງານລາວຢູ່ບັນດາແຂວງທີ່ມີດ່ານຊາຍແດນຕິດກັບປະເທດໃກ້ຄຽງເຊັ່ນ: ແຂວງຄໍາມ່ວນ, ສະຫວັນນະເຂດ ແລະຈໍາປາສັກ, ພ້ອມກັນນັ້ນ, ກໍໄດ້ສະໜອງຂໍ້ມູນຂ່າວສານແກ່ຜູ້ອອກແຮງງານ ແລະໃຫ້ການຊ່ວຍເຫຼືອໃນສິ່ງທີ່ຈໍາເປັນໂດຍສະເພາະແມ່ນອາຫານ, ນໍ້າດື່ມ, ຜ້າອັດປາກ ແລະນໍ້າຢາລ້າງມືຢູ່ບັນດາສູນກັກກັນແຫ່ງຕ່າງໆ.

  ຜ່ານການປະສານສົມທົບກັບພາກສ່ວນກ່ຽວຂ້ອງໂດຍສະເພາະກະຊວງປ້ອງກັນຄວາມສະຫງົບ ແລະ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ຢູ່ແຕ່ລະແຂວງໄດ້ມີພົນລະເມືອງລາວເດີນທາງກັບຄືນຈາກຕ່າງປະເທດໂດຍຜ່ານຊ່ອງທາງຕ່າງໆເຊັ່ນ: ດ່ານສາກົນ, ດ່ານທ້ອງຖິ່ນ, ດ່ານປະເພນີ ແລະອື່ນໆ ຊຶ່ງສາມາດເກັບກໍາຂໍ້ມູນຜູ້ທີ່ເຂົ້າມາຜ່ານດ່ານສາກົນໃນຂອບເຂດທົ່ວປະເທດແຕ່ວັນທີ 20 ມີນາ ຫາ ວັນທີ 15 ມິຖຸນາ 2020 ໄດ້ທັງໝົດ 117.843 ຄົນ; ສໍາລັບຜູ້ອອກແຮງງານລາວທີ່ກັບຈາກປະເທດໃກ້ຄຽງ (ໄທ) ມີທັງໝົດ 56.852 ຄົນ, ຍິງ46.628 ຄົນ ແລະເດັກນ້ອຍ 1.229 ຄົນ.

____________

ຂ່າວ: ຟ້າ,  ໜັງສືພິມເສດຖະກິດ-ສັງຄົມ

แชร์