ການເງິນຈະສືບຕໍ່ເພີ່ມທະວີການເກັບລາຍຮັບເຂົ້າງົບປະມານ

  ວັນທີ 25 ມິຖຸນາ 2020 ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນໄດ້ຊີ້ແຈງຕໍ່ສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ກ່ຽວກັບນະໂຍບາຍ, ມາດຕະການໃນການເພີ່ມທະວີການເກັບລາຍຮັບວ່າ: ຈະສືບຕໍ່ເຮັດວຽກງານແນວຄິດການເມືອງຄະນະພັກ-ຄະນະນໍາຕໍ່ສະມາຊິກ-ພະນັກງານຫຼັກແຫຼ່ງ ແລະພະນັກງານທຸກຂັ້ນຂອງຂະແໜງການເງິນທັງສູນກາງ ແລະທອງຖິ່ນໃນມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ມອບໝາຍໃຫ້, ຖືຜົນປະໂຫຍດສ່ວນລວມຂອງປະເທດຊາດເປັນຫຼັກ, ມີຈັນຍາບັນໃນການປະຕິບັດວຽກງານ, ເຄົາລົບ ແລະປະຕິບັດກົດໝາຍວ່າດ້ວຍລັດຖະກອນ, ບັດດາຂໍ້ຫ້າມ, ວິໄນຂະແໜງການເງິນຢ່າງເຂັ້ມງວດ, ດໍາເນີນການປັບປຸງກົງຈັກການຈັດຕັ້ງປະຕິບັດຂອງບາງກົມເພື່ອໃຫ້ສົມຄູ່ກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ໄປຄຽງຄູ່ກັບການປະເມີນຜົນພະນັກງານ-ລັດຖະບານຕາມຜົນງານ ແລະຜົນສໍາເລັດຕໍ່ວຽກງານທີ່ໄດ້ມອບໝາຍໃຫ້, ສຸມໃສ່ຄົ້ນ ຄວ້າ ແລະຂຸດຄົ້ນແຫຼ່ງລາຍຮັບທີ່ຍັງບົ່ງຊ້ອນເພື່ອທົດແທນແຫຼ່ງລາຍຮັບທີ່ສູນເສຍໄປສືບຕໍ່ເລັ່ງຂະຫຍາຍການຄຸ້ມຄອງຈັດເກັບລາຍຮັບຜ່ານລະບົບຄຸ້ມຄອງທີ່ທັນສະໄໝໃຫ້ກວ້າງຂວາງກວ່າເກົ່າເພື່ອຍົກສູງປະສິດທິພາບໃນການຈັດເກັບລາຍຮັບ ແລະທັງເປັນການສ້າງສິ່ງອໍານວຍຄວາມສະດວກໃຫ້ແກ່ຜູ້ປະກອບການໃນການມອບພັນທະໃຫ້ຫຼາຍຂຶ້ນ.

 ພ້ອມນັ້ນຕ້ອງໄດ້ເອົາໃຈໃສ່ຄຸ້ມຄອງຖານລາຍຮັບທີ່ມີແລ້ວໂດຍສຸມໃສ່ຫົວໜ່ວຍທຸລະກິດທີ່ສາມາດສ້າງລາຍຮັບໄດ້ດີ ແລະບໍ່ໄດ້ຮັບຜົນຈາກພະຍາດໂຄວິດ-19 ໃນໄລຍະ ດໍາເນີນມາດຕະການຕາມຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 06/ນຍ ເພື່ອໃຫ້ມອບລາຍຮັບເຂົ້າງົບປະມານຢ່າງຄົບຖ້ວນໄປຄຽງຄູ່ກັບການຂະຫຍາຍຖານລາຍຮັບໃໝ່ໃຫ້ກວ້າງຂວາງ, ພ້ອມທັງສັງລວມຄືນຜົນກະທົບຕໍ່ລາຍຮັບຕົວຈິງ ແລະ ຕີລາຄາຜົນການນໍາໃຊ້ມາດຕະການດ້ານລາຍຮັບຜ່ານມາໂດຍສ່ອງແສງໃຫ້ເຫັນຄວາມຄືບໜ້າຂອງການຂະຫຍາຍລະບົບຄຸ້ມຄອງດັ່ງກ່າວ ແລະ ປະສິດທິພາບຂອງການຫັນເປັນທັນສະໄໝທີ່ສາມາດຍູ້ດັນການເກັບລາຍຮັບເພື່ອຮອງຮັບລາຍຈ່າຍພື້ນ ຖານທີ່ສໍາຄັນ.

  ທ່ານ ສົມດີ ດວງດີ ກ່າວຕື່ມວ່າ: ຈະຕ້ອງໄດ້ສືບຕໍ່ປະສານສົມທົບພາກສ່ວນທີ່ກ່ຽວຂ້ອງເພື່ອຄົ້ນຄວ້າປັບປຸງລັດຖະບັນຢັດຂອງປະທານປະເທດເລກທີ 03/ປປທ ວ່າດ້ວຍອັດຕາການເກັບຄ່າທໍານຽມ ແລະຄ່າບໍລິການເພື່ອເປັນພື້ນຖານທ່າແຮງໃນການຈັດເກັບລາຍຮັບ, ສືບຕໍ່ສຸມໃສ່ຄຸ້ມຄອງເກັບອາກອນປະເພດຕ່າງໆ ເປັນຕົ້ນອາກອນມູນຄ່າເພີ່ມ ແລະ ອາການຊົມໃຊ້ຈາກການສະໜອງບໍລິການຊົມໃຊ້ໄຟຟ້າ, ໂທລະສັບ, ອິນເຕີເນັດ ແລະຢາສູບ, ເພີ່ມທະວີການຄຸ້ມຄອງຈັດເກັບລາຍຮັບຈາກຖານໃໝ່ ເປັນຕົ້ນ: ໂຮງຊີມັງແຂວງຫຼວງພະບາງ ແລະແຂວງອຸດົມໄຊໂຄງການທາງດ່ວນວຽງຈັນ-ວັງວຽງ ແລະໂຄງການຂະໜາດໃຫຍ່ອື່ນຂອງລັດ.

  ພ້ອມທັງສືບຕໍ່ປະຕິບັດການນໍາເອົາລາຍຮັບຈາກຊັບສິນ, ຄຸ້ມຄອງ ແລະຕິດຕາມການເຄື່ອນໄຫວຂອງສະພາບໍລິຫານແລະຄະນະອໍານວຍການບັນດາວິສາຫະກິດລັດລົງທຶນຢ່າງໃກ້ຊິດເພື່ອຊຸກຍູ້ການປະຕິບັດໜ້າທີ່ຂອງເຂົາເຈົ້າໃຫ້ມີປະສິດທິພາບ ແລະສອດຄ່ອງກັບລະບຽບກົດໝາຍ, ເລັ່ງທວງບັນດາໜີ້ຄ້າງມອບຂອງບັນດາວິສາຫະ ກິດລັດລົງທຶນຕ່າງໆ, ຄົ້ນຄວ້າ ແລະດໍາເນີນການປັບປຸງວິສາຫະກິດຂອງລັດລົງທຶນທີ່ມີປະສິດທິພາບຕໍ່າໃຫ້ມີປະສິດທິຜົນດີຂຶ້ນກວ່າເກົ່າ ແລະສືບຕໍ່ເອົາຫົວໜ່ວຍທຸລະ ກິດທີ່ມີລາຍຮັບເກີນ 400 ລ້ານກີບ ແຕ່ຍັງບໍ່ທັນໄດ້ເຂົ້າລະບົບອາກອນມູນຄ່າເພີ່ມເພື່ອເປັນເປົ້າໝາຍຂະຫຍາຍຖານ (VAT) ໂດຍຈະຕ້ອງໄດ້ສົມທົບແໜ້ນກັບຂະ ແໜງການກ່ຽວຂ້ອງດໍາເນີນມາດຕະການທີ່ຈໍາເປັນພ້ອມກັນນັ້ນກໍຈະໄດ້ຄົ້ນຄວ້າໃຫ້ພາກເອກະຊົນມີສ່ວນຮ່ວມໃນການຂະຫຍາຍຖານລາຍຮັບອາກອນມູນຄ່າເພີ່ມ.

_______________

ຂ່າວ: ວົງມະນີ

แชร์