ການລົງທຶນທົ່ວປະເທດ 5 ເດືອນ ມີ 2.384 ໂຄງການມູນຄ່າພັນຕື້ກວ່າກີບ

  ວັນທີ 25 ມິຖຸນາ 2020, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນໄດ້ຂຶ້ນຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ກ່ຽວກັບນະໂຍບາຍ, ວິທີການ ແລະມາດຕະການຊຸກຍູ້ ແລະສົ່ງ ເສີມການລົງທຶນເພື່ອຮັບປະກັນເຮັດໃຫ້ການເຕີບໂຕຂອງເສດຖະກິດແຫ່ງຊາດສາມາດສືບຕໍ່ຂະຫຍາຍຕົວຢ່າງຕໍ່ເນື່ອງ.

  ທ່ານ ສອນໄຊ ສີພັນດອນ ກ່າວວ່າ: ສະພາແຫ່ງຊາດໄດ້ຮັບຮອງເອົາແຜນດັດແກ້ຕົວເລກມະຫາພາກໃນໄລຍະ 4 ປີ (2017-2020) ຂອງແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ VIII (2016-2020) ຕາມມະຕິ 014/ສພຊ, ລົງວັນທີ24/11/2016 ຊຶ່ງຄາດ ໝາຍລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບສະເລ່ຍ 7,2% ໃນນັ້ນ ປີ 2017 ເທົ່າກັບ 7%, ປີ 2018 ເທົ່າກັບ 7%, ປີ 2019 ເທົ່າກັບ 7,3% ແລະ ປີ 2020 ເທົ່າກັບ 7,5% ,ຄາດຄະເນຄວາມຕ້ອງການທຶນເພື່ອການພັດທະນາທັງໝົດ 173.329 ຕື້ກີບ ຫຼື 21,4 ຕື້ໂດລາສະຫະລັດ ກວມເອົາ 29% ຂອງ GDP ໃນນີ້ການລົງທຶນຂອງລັດກວມປະມານ 12-15% ຂອງການລົງທຶນລວມທັງໝົດ, ແຫຼ່ງທຶນຈາກການຊ່ວຍເຫລືອທາງການເພື່ອການພັດທະນາກວມປະມານ 15-24%, ການລົງທຶນຂອງເອກະຊົນພາຍໃນ ແລະຕ່າງປະເທດກວມປະມານ 40-49% ແລະການລົງທຶນຈາກລະບົບເງິນຕາກວມປະມານ 21-23% ຂອງທຶນລວມທັງໝົດ.

  ຜ່ານການຈັດຕັ້ງປະຕິບັດຕົວຈິງຄາດວ່າ GDP ຈະຂະຫຍາຍຕົວໂດຍສະເລ່ຍໃນລະດັບ 5,9% ຫຼຸດແຜນການທີ່ວາງໄວ້ 1,3% (ແຜນການ 7,2%) ແລະການ ສະໜອງທຶນເພື່ອການພັດທະນາໃນໄລຍະ 4 ປີ ກໍຈະບໍ່ສາມາດບັນລຸໄດ້ຕາມແຜນທີ່ວາງໄວ້, ສະນັ້ນເພື່ອເຮັດໃຫ້ການເຕີບໂຕຂອງເສດຖະກິດແຫ່ງຊາດສືບຕໍ່ຂະຫຍາຍ ຕົວຕາມທິດທີ່ຍືນຍົງລັດຖະບານໄດ້ເອົາໃຈໃສ່ຂົນຂວາຍ, ດຶງດູດ ແລະຄຸ້ມຄອງການຈັດຕັ້ງປະຕິບັດ 4 ແຫຼ່ງທຶນເພື່ອການພັດທະນາໃຫ້ມີປະສິດທິພາບສູງຂຶ້ນດ້ວຍການກໍານົດນະໂຍບາຍ,ນິຕິກໍາ ແລະມາດຕະການຕ່າງໆ ໂດຍສະເພາະປັບປຸງ, ສ້າງກົດໝາຍ ແລະນິຕິກໍາລຸ່ມກົດໝາຍຈໍານວນໜຶ່ງ,ກົດໝາຍວ່າດ້ວຍການລົງທຶນຂອງລັດ, ຄຳແນະນຳ, ດໍາລັດ, ຂໍ້ຕົກລົງຕ່າງໆ.

  ພ້ອມກັນນີ້, ໄດ້ເອົາໃຈໃສ່ປະຕິບັດຕາມຂັ້ນຕອນທີ່ກໍານົດໄວ້ໃນກົດໝາຍວ່າດ້ວຍການລົງທຶນຂອງລັດ ແລະຄໍາແນະນໍາຈັດຕັ້ງປະຕິບັດກົດໝາຍດັ່ງກ່າວຢ່າງເຄັ່ງຄັດຊຶ່ງທຸກໂຄງການຕ້ອງຜ່ານການປະເມີນ, ເດັດຂາດບໍ່ຮັບເອົາໂຄງການທີ່ບໍ່ມີຜົນການປະເມີນ ຫຼືຜົນການປະເມີນໃນລະດັບຕໍ່າເຂົ້າແຜນ, ຕິດຕາມ, ກວດກາ ແລະຊຸກຍູ້ໂຄງ ການລົງທຶນຂອງລັດທີ່ສະພາແຫ່ງຊາດ ແລະ ສະພາທ້ອງຖິ່ນໄດ້ຮັບຮອງແລ້ວໃຫ້ສາມາດຈັດຕັ້ງປະຕິບັດໄດ້ຕາມແຜນເພື່ອຮັບປະກັນໃຫ້ວຽກຈຸດສຸມຂອງລັດຖະບານ ແລະ ທ້ອງຖິ່ນກໍຄືບັນດາຄາດໝາຍທີ່ສະພາໄດ້ຮັບຮອງແລ້ວໃຫ້ບັນລຸຜົນ.

  ທ່ານ ສອນໄຊ ສີພັນດອນ ກ່າວຕື່ມວ່າ: ລັດຖະບານໄດ້ເອົາໃຈໃສ່ແກ້ໄຂໜີ້ສິນໂຄງການລົງທຶນຂອງລັດຢ່າງເປັນລະບົບ, ສະເພາະໃນ ປີ 2020 ສະພາແຫ່ງຊາດອະ ນຸມັດແຜນການລົງທຶນຂອງລັດຈໍານວນ 2.600 ຕື້ກີບ (ທຶນສົມທົບທາງລົດໄຟລາວ-ຈີນຈໍານວນ 400 ຕື້ກີບ)ໃນນັ້ນໄດ້ຈັດສັນຊໍາລະໜີ້ສິນ 539,57 ຕື້ກີບ, ສ່ວນການດຶງດູດການລົງທຶນໃນ 5 ເດືອນຜ່ານມາສາມາດປະຕິບັດໄດ້ 2.384 ໂຄງການມູນຄ່າ 1.044 ຕື້ກີບ (40,14% ຂອງແຜນການ).

แชร์