ຫຼວງພະບາງ ສະຫຼອງວັນແພດແຫ່ງຊາດລາວ

 ວັນທີ 18 ມິຖຸນາ ຜ່ານມາພະແນກສາທາລະສຸກແຂວງຫຼວງພະບາງໄດ້ຈັດກິດຈະກໍາສະເຫຼີມສະຫຼອງວັນແພດແຫ່ງຊາດລາວຄົບຮອບ 55 ປີ (18 ມິຖຸນາ 1965 ຫາ 18 ມິຖຸນາ 2020) ຂຶ້ນທີ່ສະໂມສອນວິທະຍາໄລວິທະຍາສາດສຸຂະພາບຫຼວງພະບາງໂດຍມີທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ມີຫົວ ໜ້າ-ຮອງຫົວໜ້າພະແນກ, ອຳນວຍການ, ພະນັກງານ, ແພດໝໍ, ຄູ-ອາຈານ ແລະນັກສຶກສາວິທະຍາໄລວິທະຍາສາດສຸຂະພາບເຂົ້າຮ່ວມ.

  ທ່ານ ດຣ ຄຳສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງ ໄດ້ຂຶ້ນເລົ່າປະຫວັດມູນເຊື້ອການເຕີບໃຫຍ່ຂະຫຍາຍຕົວວັນແພດແຫ່ງຊາດລາວວ່າ: ວັນແພດລາວໄດ້ສ້າງຕັ້ງຂຶ້ນ ແລະ ໄດ້ກຳນົດໄວ້ໃນກົດໝາຍປິ່ນປົວ ເພື່ອເຮັດໃຫ້ພົນລະເມືອງລາວ ບັນດາເຜົ່າ, ທຸກຊັ້ນຄົນເຫັນໄດ້ການເຕີບໃຫຍ່ຂະຫຍາຍຕົວຂອງວຽກ ງານສາທາລະນະສຸກ, ຂອງຖັນແຖວແພດໝໍລາວໃນແຕ່ລະໄລຍະ,ເພື່ອຈາລຶກບຸນຄຸນໆງາມຄວາມດີ ຂອງແພດໝໍ ແລະພະນັກງານສາທາລະນະສຸກທຸກຖ້ວນໜ້າທີ່ໄດ້ປະກອບສ່ວນເຂົ້າໃນການປິ່ນປົວ, ຮັກສາສຸຂະພາບທັງເປັນການປຸກລະດົມມວນຊົນໃຫ້ເຫັນຄວາມສຳຄັນ, ເປັນເຈົ້າການໃນການສົ່ງເສີມ, ຮັກສາສຸຂະພາບຂອງຕົນເອງ, ຄອບຄົວ ແລະຊຸມຊົນກໍ່ຄືຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ມອບໝາຍ, ເພື່ອເປັນການປັບປຸງກໍ່ສ້າງຕົນເອງໃຫ້ມີຄວາມຮູ້ຄວາມສາມາດ ແລະມີຈັນຍາບັນ-ຈັນຍາທຳ ໃນການເຮັດໜ້າທີ່ຮັບໃຊ້ພໍ່ແມ່ປະຊາຊົນບັນດາເຜົ່າ ແລະເຮັດໃຫ້ ສົມກັບຄຳຂວັນທີ່ວ່າ “ ເປັນນັກຮົບເສື້ອຂ່າວຂອງພັກ”.

 ໂອກາດນີ້ທ່ານ ວົງສະຫວັນ ເທບພະຈັນ ໄດ້ມີຄຳເຫັນບາງຕອນ ວ່າ:ຕະຫຼອດໄລຍະຜ່ານມາພັກ-ລັດຖະບານກໍ່ຄືແຂວງຫຼວງພະບາງ ຊຶ່ງໄດ້ມີນະໂຍບາຍ ແລະເອົາໃຈໃສ່ໃຫ້ຄວາມສຳຄັນຕໍ່ການພັດທະນາວຽກງານສາທາລະນະສຸກ, ຂະຫຍາຍຕາໜ່າງສາທາລະນະສຸກ ແລະພັດທະນາບຸກຄະລາກອນທາງດ້ານການແພດລວມທັງພະຍາ ບານ, ແພດ ແລະໝໍໃຫ້ມີຄວາມຮູ້ຄວາມສາມາດທາງດ້ານເຕັກໂນໂລຊີທີທັນສະໄໝ, ມີຈັນຍາບັນ-ຈັນຍາທຳໃນການເຮັດໜ້າທີ່ວິຊາສະເພາະຂອງຕົນເພື່ອຮັບໃຊ້ປະຊາ ຊົນບັນດາເຜົ່າໄດ້ມີໃບໜ້າອັນໃໝ່ ແລະມີການພັດທະນາດີຂຶ້ນເປັນກ້າວໆມາ.

  ການຈັດກິດຈະກຳສະເຫຼີມສະຫຼອງວັນແພດແຫ່ງຊາດລາວຢູ່ ແຂວງຫຼວງພະບາງ ຄັ້ງນີ້ຍັງໄດ້ຈັດໃຫ້ການບໍລິຈາກເລືອດແບບສະມັກໃຈເພື່ອຊ່ວຍເຫຼືອສັງຄົມໂດຍມີພະນັກງານ, ນັກສຶກສາຈາກວິທະຍາໄລວິທະຍາສາດສຸຂະພາບ ແລະນັກສຶກສາຈາກສະຖາບັນຍຸຕິທຳພາກເໜືອຮ່ວມບໍລິຈາກເລືອດ.

____________

ໜັງສືພິມເສດຖະກິດ-ສັງຄົມ

 

แชร์