5 ເດືອນ ເມືອງປາກລາຍ ເກັບລາຍຮັບໄດ້ 3,61 ຕື້ກີບ

   ຫ້ອງການການເງິນເມືອງປາກລາຍ ແຂວງໄຊຍະບູລີ ສາມາດເກັບລາຍຮັບເຂົ້າງົບປະມານໃນ 5 ເດືອນຕົ້ນປີໄດ້ທັງໝົດ 3,61 ຕື້ກີບ ເທົ່າກັບ 42,03% ຂອງແຜນການປີໃນນີ້ເດັ່ນກວ່າໝູ່ແມ່ນລາຍຮັບສ່ວຍສາອາກອນຊຶ່ງປະຕິບັດໄດ້ 3,55 ຕື້ກີບ ເທົ່າກັບ 43,48% ຂອງແຜນການປີ ແລະຄາດວ່າໝົດປີຈະປະຕິບັດໃຫ້ໄດ້ 6,83 ຕື້ກີບ ເທົ່າກັບ 79,54%.
ທ່ານ ພຸດທະສອນ ສິດທິວົງ ຫົວໜ້າຫ້ອງການ-ການເງິນ ເມືອງປາກລາຍ ໃຫ້ຮູ້ວ່າ: ປີ 2020 ຫ້ອງການ-ການເງິນເມືອງປາກລາຍໄດ້ຮັບຕົວເລກແຜນການປີແມ່ນ 8,59 ຕື້ກີບ, ທຽບໃສ່ແຜນປີຜ່ານມາຫຼຸດລົງ 25,47%, ປະຕິບັດງົບປະມານ 5 ເດືອນ ໄດ້ທັງໝົດ 3,61 ຕື້ກີບ ເທົ່າກັບ 42,03% ຂອງແຜນການປີ, ທຽບໃສ່ເວລາດຽວກັນຂອງປີຜ່ານມາຫຼຸດລົງ 36,78% ໃນນັ້ນລາຍຮັບສ່ວຍສາອາກອນແຜນການ 8,16 ຕື້ກີບ ປະຕິບັດໄດ້ 3,55 ຕື້ກີບ ເທົ່າກັບ 43,48% ຂອງແຜນ ການປີ, ທຽບໃສ່ເວລາດຽວກັນຂອງປີຜ່ານມາຫຼຸດລົງ 36,85%; ລາຍຮັບຊັບສິນແຜນການ 427 ລ້ານກີບ ປະຕິບັດໄດ້ 61 ລ້ານກີບ ເທົ່າກັບ 14,42% ຂອງແຜນການປີ, ທຽບໃສ່ເວລາດຽວກັນຂອງປີຜ່ານມາຫຼຸດລົງ 32,25%.


  ການຈັດຕັ້ງແຜນງົບປະມານ 5 ເດືອນນີ້ໂດຍລວມແລ້ວເຫັນວ່າຈັດຕັ້ງປະຕິບັດໄດ້ດີພໍສົມຄວນໂດຍສະເພາະແມ່ນການເກັບລາຍຮັບເຂົ້າງົບປະມານແຫ່ງລັດເຖິງແມ່ນ ວ່າສະພາບເສດຖະກິດຂອງພາກພື້ນກໍ່ຄືປະເທດທີ່ໃກ້ຄຽງມີຄວາມຫຍຸ້ງຍາກທາງດ້ານເສດຖະກິດການເງິນຫຼາຍປັດໄຈກໍ່ຕາມ, ແຕ່ຍ້ອນຄວາມເອົາໃຈໃສ່ຊິ້ນຳໆພາຂອງອົງຄະນະພັກເມືອງ ແລະ ສາຍຕັ້ງຂອງແຂວງເຮັດໃຫ້ແຜນການດ້ານງົບປະມານລາຍຮັບ-ລາຍຈ່າຍຖືກຈັດຕັ້ງປະຕິບັດໄດ້ດີພໍສົມຄວນ, ເຮັດໃຫ້ວຽກງານດ້ານເສດຖະ ກິດ-ການເງິນມີສະເຖຍລະພາບ, ສ້າງໃຫ້ເມືອງປາກລາຍມີຄວາມເຂ້ມແຂງຮອບດ້ານທາງດ້ານງົບປະມານ.
   ສໍາລັບແຜນການ 6 ເດືອນ ທ້າຍປີຫ້ອງການການເງິນເມືອງປາກລາຍ ຈະສູ້ຊົນຈັດເກັບລາຍຮັບໃຫ້ໄດ້ 2,26 ຕື້ກີບ, ເທົ່າກັບ 26,38% ຂອງແຜນການປີ,ປະຕິ ບັດໝົດປີໃຫ້ໄດ້ 6,83 ຕື້ກີບ ເທົ່າກັບ 79,54% ຂອງແຜນ ການປີ, ໃນນີ້ສ່ວຍສາອາກອນໃຫ້ ໄດ້ 2,21 ຕື້ກີບ ເທົ່າກັບ 27,08% ຂອງແຜນການປີ, ປະຕິບັດໝົດປີໃຫ້ໄດ້ 6,70 ຕື້ກີບ ເທົ່າກັບ 82,08% ຂອງແຜນການປີ; ລາຍຮັບຊັບສິນສູ້ຊົນໃຫ້ໄດ້ 56 ລ້ານກີບ ເທົ່າກັບ 13,09% ຂອງແຜນການປີ, ປະຕິບັດໝົດປີໃຫ້ໄດ້ 132,76 ລ້ານກີບ ເທົ່າກັບ 31,02% ຂອງແຜນການປີ.

แชร์