ຊາວກະສິກອນເມືອງນອງ ເລີ່ມລົງມືປັກດຳເຂົ້ານາປີ

 ຕາມການລາຍງານຫ້ອງການກະສິກຳ ແລະປ່າໄມ້ເມືອງນອງ ແຂວງສະຫວັນນະເຂດ ໃຫ້ຮູ້ວ່າ: ເລີ່ມແຕ່ກາງເດືອນພຶດສະພາເປັນຕົ້ນມາ, ຊາວນາຊາວກະສິກອນໃນທົ່ວເມືອງນອງໄດ້ພາກັນລົງມືສູ່ການຜະລິດເຂົ້ານາປີຢ່າງເປັນຂະບວນທັງນີ້ກໍ່ເພື່ອເຮັດໃຫ້ການປັກດຳເຂົ້ານາປີໄດ້ທ່ວງທັນຕາມລະດູການ.
  ໃນປີ 2020ນີ້, ເມືອງນອງມີແຜນຜະລິດເຂົ້ານາປີໃນຈຳນວນເນື້ອທີ່ທັງໝົດ 1.000 ເຮັກຕາ ແລະເນື້ອທີ່ເຂົ້າໄຮ່ສວນຈຳນວນ 3.907 ເຮັກຕາ, ມາຮອດປະຈຸ ບັນ, ໄຖຮຸດນາໄດ້ແລ້ວ 85%, ຕົກກ້າໄດ້ 70% ແລະ ປັກດຳເຂົ້ານາປີໄດ້ 20% ຂອງເນື້ອທີ່ແຜນການໂດຍໄດ້ນຳໃຊ້ແນວພັນເຂົ້າປັບປຸງ ແລະ ແນວພັນເຂົ້າພື້ນ ເມືອງປະສົມປະສານກັນຕາມເງື່ອນໄຂຕົວຈິງຂອງແຕ່ລະພື້ນທີ່. ຄຽງຄູ່ກັນນັ້ນ, ຊາວນາຍັງໄດ້ລົງມືສູ່ການຜະລິດການປູກພືດຊະນິດຕ່າງໆ ແລະຕົ້ນໄມ້ໃຫ້ໝາກໃສ່ສັບຫວ່າງເຂົ້າໄຮ່ສວນເຊັ່ນ: ໝາກເຜັດ, ໝາກເຂືອ, ມັນຕົ້ນ, ມັນດ້າງ, ສາລີ ແລະອື່ນໆ.


  ນອກຈາກນັ້ນ, ປະຊາຊົນບາງຄອບຄົວຍັງໄດ້ສຸມໃສ່ການເຮັດສວນເປັນຫຼັກເພື່ອປູກຕົ້ນໄມ້ເປັນສິນຄ້າເຊັ່ນວ່າໄມ້ວິກເພື່ອສົ່ງຂາຍໃຫ້ບໍລິສັດຊັນເປເປີ້ໂຮນດິ້ງລາວຈຳກັດ ທີ່ຕັ້ງຢູ່ເມືອງເຊໂປນ; ສ່ວນກ້ວຍ, ມັນຕົ້ນ, ຫວາຍ, ໝາກເນ ແລະໝາກໄມ້ຊະນິດຕ່າງໆແມ່ນຈະໄດ້ສົ່ງຂາຍສົ່ງອອກໄປ ສສ ຫວຽດນາມ.

 

แชร์