ຄະນະກຳມະການຮ່ວມມື ລາວ-ຫວຽດ ລົງເຮັດວຽກຢູ່ສອງແຂວງຂອງພາກກາງ

  ໃນລະຫວ່າງວັນທີ 19-20 ມິຖຸນາ 2020 ສະຫາຍ ຄຳເຜີຍ ແກ້ວກິນນາລີ, ຮອງປະທານຜູ້ປະຈຳການຄະນະກຳມະການຮ່ວມມືລາວ-ຫວຽດນາມ ໄດ້ນຳພາຄະ ນະລົງເຮັດວຽກຢູ່ແຂວງສະຫວັນນະເຂດ ແລະຄຳມ່ວນເພື່ອກວດກາການຈັດຕັ້ງຜັນຂະຫຍາຍຂໍ້ຕົກລົງວ່າດ້ວຍແຜນການຮ່ວມມືລະຫວ່າງສອງລັດຖະບານລາວ ແລະ ຫວຽດນາມປະຈຳປີ 2020 ຊຶ່ງໄດ້ຮັບກຽດຕ້ອນຮັບຂອງສະຫາຍ ໂພໄຊ ໄຊຍະສອນ ຮອງເລຂາພັກແຂວງ, ຮອງເຈົ້າແຂວງໆ ແຂວງສະຫວັນນະເຂດພ້ອມດ້ວຍພາກ ສ່ວນທີ່ກ່ຽວຂ້ອງ.
  ສະຫາຍ ໂພໄຊ ໄຊຍະສອນໄດ້ ລາຍງານການເຄື່ອນໄຫວກ່ຽວກັບສະພາບການພົວພັນຮ່ວມມື ແລະທິດທາງການດຶງດູດການລົງທຶນ,ການຊ່ວຍເຫຼືອຈາກ ສສ ຫວຽດ ນາມໂດຍສະເພາະຈາກ 18 ແຂວງແຮກສ່ຽວ; ສະຫວັນນະເຂດຖືວ່າເປັນແຂວງໜຶ່ງທີ່ມີການພົວພັນຮ່ວມມືກັບບັນດາແຂວງຂອງຫວຽດນາມກວ້າງຂວາງພໍສົມຄວນ. ໃນນັ້ນຄະນະໄດ້ໄປຢ້ຽມຢາມໂຮງຮຽນມິດຕະພາບ ແລະລົງກວດກາສະຖານີຖ່າຍທອດຕໍ່ລາຍການວິທະຍຸກະຈ່າຍສຽງ ແລະໂທລະພາບແຫ່ງຊາດທີ່ແຂວງສະຫວັນນະເຂດ ຊຶ່ງແມ່ນທຶນຊ່ວຍເຫຼືອລ້າຂອງລັດຖະບານ ສສ ຫວຽດນາມໃຫ້ແກ່ລັດຖະບານລາວ.
  ຈາກນັ້ນຄະນະໄດ້ສືບຕໍ່ເດີນທາງໄປຢ້ຽມຢາມໂຮງຮຽນວິທະຍາໄລເຕັກນິກວິຊາຊີບ (ວິທະຍາເຂດເຊໂປນ) ເພື່ອເປັນການເກັບກຳຂໍ້ມູນ, ຄົ້ນຄວ້ານຳສະເໜີຂັ້ນເທິງໃນການພັດທະນາໂຮງຮຽນດັ່ງກ່າວໃນຕໍ່ໜ້າ ແລະລົງກວດກາ ແລະຢ້ຽມຢາມໂຄງການຊ່ວຍເຫຼືອ ແລະລົງທຶນຈຳນວນໜຶ່ງຢູ່ແຂວງຄຳມ່ວນ.

แชร์