ຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງບໍລິຄໍາໄຊ ຈັດພິທີປະກາດປ່ອຍຕົວກ່ອນກໍານົດແບບມີເງື່ອນໄຂຕາມແນວທາງນະໂຍບາຍຂອງພັກ-ລະບຽບກົດ ໝາຍຂອງລັດ, ໃນຄັ້ງວັນທີ 23 ມິຖຸນາ 2020 ຊຶ່ງອິງໃສ່ລັດຖະທໍາມະນູນໝວດທີ 04 ມາດຕາ 252, 253 ແລະ 254 ແລະອີງໃສ່ຄໍາຕັດສີນຂອງຄະນະສານອາຍາຂັ້ນຕົ້ນສານປະຊາຊົນ ແຂວງບໍລິຄໍາໄຊ ສະບັບເລກທີ 84/ຂຕ.ອ ລົງວັນທີ 22 ມິຖຸນາ 2020 ວ່າດ້ວຍການປ່ອຍຕົວກ່ອນກໍານົດໂດຍມີເງື່ອນໄຂຕາມກົດໝາຍ, ໂດຍການເປັນປະທານຂອງທ່ານ ພັນໂທ ຄໍາແພງ ນໍາພາວັນ ປະທານກວດກາພັກຮອງຫົວໜ້າກອງບັນຊາການ ປກສ ແຂວງ,ມີທ່ານ ພັນໂທ ວຽງແກ້ວ ພຽນວົງ ຄະ ນະພັກຮາກຖານຮອງຫົວໜ້າຄ້າຍຄຸມຂັງ-ດັດສ້າງ ປກສ ແຂວງ, ມີຜູ້ຕາງໜ້າອົງການໄອຍະການປະຊາຊົນ, ສານປະຊາຊົນ, ພະແນກຍຸຕິທໍາ, ພະນັກງານ-ນັກຮົບຄ້າຍຄຸມຂັງ-ດັດສ້າງ, ຍາດພີ່ນ້ອງ ນັກໂທດ ແລະນັກໂທດຜູ້ທີ່ໄດ້ຮັບການ ປ່ອຍຕົວເຂົ້າຮ່ວມ.


   ທ່ານ ພັນໂທ ວຽງແກ້ວ ພຽນວົງ ຮອງຫົວໜ້າຄ້າຍຄຸມຂັງດັດສ້າງ ປກສ ແຂວງ ໄດ້ຜ່ານບັນຊີລາຍຊື່ຈໍານວນນັກໂທດທີ່ໄດ້ຮັບນະໂຍບາຍປ່ອຍຕົວກ່ອນກໍານົດແບບມີເງື່ອນໄຂຕາມກົດໝາຍທີ່ໄດ້ຜ່ານການປະຕິບັດໂທດມາແລ້ວ 2/3 ຂອງກົດໝາຍ, ຜ່ານການຄົ້ນຄວ້າ ແລະຄັດເລືອກຕົວຈິງນັກໂທດຜູ້ມີຄວາມກ້າວໜ້າ, ຝືກຝົນຫຼໍ່ ຫຼອມຕົນເອງ, ເປັນແບບຢ່າງໃນການປະຕິບັດລະບຽບຂອງຄ້າຍຄຸມຂັງ-ດັດສ້າງ ແລະມີຜົນງານດີເດັ່ນໃນຂະບວນການອອກແຮງງານໃນນັ້ນນັກໂທດທີ່ໄດ້ຮັບການປ່ອຍ ຕົວໃນຄັ້ງນີ້ລວມມີ 60 ຄົນ, ຍິງ 6 ຄົນ, ຄົນສັນຊາດຫວຽດນາມ 1 ຄົນ, ໃຫ້ກຽດຂຶ້ນມອບໃບປ່ອຍຕົວໂດຍທ່ານ ພັນໂທ ວຽງແກ້ວ ພຽນວົງ ຮອງຫົວໜ້າຄ້າຍຄຸມ ຂັງ-ດັດສ້າງ ປກສ ແຂວງ.
  ທ່ານ ພັນໂທ ຄໍາແພງ ນໍາພາວັນ ຮອງຫົວໜ້າກອງບັນຊາການ ປກສ ແຂວງໄດ້ສະແດງຄວາມຊົມເຊີຍ ແລະດີໃຈນໍາບັນດານັກໂທດທີ່ໄດ້ຮັບການປ່ອຍຕົວກ່ອນກໍານົດໃນຄັ້ງນີ້, ທີ່ໄດ້ມີຄວາມຕື່ນຕົວປັບປ່ຽນທັດສະນະຄະຕິ ແລະແນວຄິດຂອງຕົນ,ເອົາໃຈໃສ່ປະຕິບັດກົດລະບຽບຂອງຄ້າຍຄຸມຂັງ-ດັດສ້າງໄດ້ດີ,ມີຄວາມຫ້າວຫັນໃນຂະບວນ ການອອກແຮງງານ, ພ້ອມທັງເນັ້ນໜັກໃຫ້ຜູ້ໄດ້ຮັບການປ່ອຍຕົວເມື່ອອອກໄປແລ້ວຈົ່ງເອົາໃຈໃສ່ປະຕິບັດກົດລະບຽບ, ກົດໝາຍບ້ານເມືອງຢ່າງເຂັ້ມງວດ, ການດໍາລົງຊີວິດ ແລະທໍາມາຫາກິນຢູ່ໃນສັງຄົມຕ້ອງມີຄວາມຊື່ສັດສຸຈະລິດ, ຮຽກຮ້ອງໃຫ້ພໍ່ແມ່ຜູ້ປົກຄອງຈົ່ງເອົາໃຈໃສ່ສືກສາອົບຮົມລູກຫຼານຂອງຕົນໃຫ້ກາຍເປັນຄົນດີຂອງຄອບ ຄົວ, ເປັນພົນລະເມືອງດີຂອງສັງຄົມ, ປະເທດຊາດ ແລະບໍ່ກັບມາກະທໍາຜິດຕໍ່ລະບຽບກົດໝາຍຕື່ມອີກ.

_____________

ຂ່າວ: ພອນສະຫວັນ,  ໜັງສືພິມເສດຖະກິດ-ສັງຄົມ

  

แชร์