ວັນທີ 22 ມິຖຸນາຜ່ານມາ ແຂວງຫົວພັນ ໄດ້ຈັດພິທີເປີດສູນວາງສະແດງການໃຫ້ຄວາມຮູ້ລະເບີດບໍ່ທັນແຕກຂຶ້ນຢູ່ທີ່ບ້ານນາທົ່ງຈອງ ເມືອງຊໍາເໜືອ ແຂວງຫົວພັນ ໂດຍການເຂົ້າຮ່ວມເປັນປະທານຂອງ ທ່ານ ພູໂຊນ ທຳມະວິໄຊ ຮອງເຈົ້າແຂວງໆຫົວພັນ, ທ່ານ ເບີນົວ ຜູ້ອຳນວຍການໃຫຍ່ປະຈຳພາກພື້ນຂອງໂຄງການ HI, ມີພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ, ເມືອງຊໍາເໜືອເຂົ້າຮ່ວມນຳ.
  ການເປີດສູນວາງສະແດງແມ່ນການເປີດໂອກາດໃຫ້ທຸກຄົນໃນສັງຄົມໄດ້ສຶກສາ ແລະເຂົ້າເຖິງຂໍ້ມູນກ່ຽວກັບລະເບີດບໍ່ທັນແຕກ, ເພາະແຂວງຫົວພັນເປັນແຂວງໜຶ່ງທີ່ມີລະເບີດຕົກຄ້າງຫຼາຍທີ່ສຸດໃນສະໄໝສົງຄາມໂດຍສະເພາະແມ່ນຢູ່ເມືອງຫົວເມືອງທັງນີ້ເພື່ອເຮັດໃຫ້ນັກຮຽນຮູ້ປັນຍາຊົນ, ພໍ່ແມ່ປະຊາຊົນ, ຜູ້ທີ່ຮູ້ເທົ່າບໍ່ເຖິງການໄດ້ເຂົ້າເຖິງ ແລະຮູ້ຈັກກ່ຽວກັບຜົນຮ້າຍຂອງລະເບີດບໍ່ທັນແຕກທີ່ຕົກຄ້າງຢູ່ຕາມໄຮ່ນາຮົ້ວສວນ ແລະສະຖານທີ່ອື່ນໆ, ຖ້າຫາກພົບເຫັນແມ່ນຫ້າມຈັບ, ຫ້າມໂຍນ, ຫ້າມຖິ້ມ,ຫ້າມຫຼິ້ນຢ່າງເດັດຂາດ, ການຕັ້ງສູນນີ້ຂຶ້ນຈະເປັນບ່ອນຮຽນຮູ້ດ້ານຂໍ້ມູນຕ່າງໆທີ່ສໍາຄັນກ່ຽວກັບລະເບີດບໍ່ທັນແຕກທັງເປັນບ່ອນກະຈາຍຂໍ້ມູນຂ່າວສານເພື່ອຊ່ວຍ ເຫຼືອຊຸມຊົນເຮັດໃຫ້ທຸກຄົນໃນທົ່ວສັງຄົມຮູ້ໄດ້ຜົນຮ້າຍຂອງລູກລະເບີດບໍ່ທັນແຕກທີ່ຍັງຕົກຄ້າງຢູ່ບົນດິນແດນຂອງແຂວງຫົວພັນພ້ອມຮຽກຮ້ອງໃຫ້ທຸກພາກສ່ວນຫາກພົບເຫັນໃຫ້ລາຍງານພາກສ່ວນທີ່ກ່ຽວຂ້ອງທີ່ປະຈຳຢູ່ແຂວງຫົວພັນເພື່ອເກັບກູ້, ທຳລາຍໃຫ້ຖືກວິທີ ແລະມີຄວາມປອດໄພ.

_____________

ຂ່າວ: ນິດຖະໜອມ, ໜັງສືພິມເສດຖະກິດ-ສັງຄົມ

• 25/06/2020