ກອງກວດກາພາສີປະຈໍາແຂວງຫຼວງພະບາງໄດ້ເປີດກອງປະຊຸມເຜີຍແຜ່ລະບຽບການນໍາໃຊ້ລະບົບຄຸ້ມຄອງພາຫະນະເຂົ້າ-ອອກທ່ອງທ່ຽວຢ້ຽມຢາມພາຫະນະຂົນສົ່ງສິນຄ້າດ້ວຍລະບົບເອເລັກໂຕຣນິກ ບ53 ໃຫ້ແກ່ເຈົ້າໜ້າທີ່ພາສີຢູ່ກອງຄຸ້ມຄອງພາສີ III ແຂວງຫຼວງພະບາງ ແລະ ແຂວງໄຊຍະບູລີ ໂດຍການເປັນປະທານຂອງທ່ານ ຄິນຄໍາ ເລັ່ງສະຫວັດ ຫົວໜ້າພະແນກການເງິນແຂວງຫຼວງພະບາງ, ມີບັນດາພະນັກງານຕາງໜ້າກົມພາສີ, ເຈົ້າໜ້າທີ່ພາສີຢູ່ກອງຄຸ້ມຄອງພາສີ, ພະແນກການທີ່ກ່ຽວຂ້ອງຂອງສອງແຂວງພ້ອມດ້ວຍວິຊາການຂອງບໍລິສັດຕິດຕັ້ງເຂົ້າຮ່ວມ.
  ທ່ານ ວິລະກອນ ເກດຕະວົງ ຮອງຫົວໜ້າພະແນກແຜນການ ແລະຂໍ້ມູນຂ່າວສານກົມພາສີໄດ້ຂຶ້ນເຜີຍແຜ່ນິຕິກຳຄຸ້ມຄອງ ແລະວິທີການນໍາໃຊ້ລະບົບ ບ53 ເປັນຕົ້ນແມ່ນຄໍາແນະນໍາວ່າດ້ວຍການນໍາໃຊ້ລະບົບຄຸ້ມຄອງພາຫະນະທ່ອງທ່ຽວຢ້ຽມຢາມແລະພາຫະນະຂົນສົ່ງສິ້ນຄ້າດ້ວຍລະບົບເອເລັກໂຕຣນິກ ບ53 ຂອງລັດຖະມົນຕີກະ ຊວງການເງິນໂດຍສະເພາະແມ່ນຫຼັກການລະບຽບການ ແລະມາດຕະການໃນການຄຸ້ມຄອງຕິດຕາມ ແລະ ກວດກາພາຫະນະທ່ອງທ່ຽວຢ້ຽມຢາມ ແລະ ພາຫະນະຂົນສົ່ງສິນຄ້າຜ່ານດ່ານສາກົນທາງບົກດ້ວຍການນໍາໃຊ້ລະບົບເອເລັກໂຕຣນິກໃຫ້ມີຄວາມສະດວກວ່ອງໄວ, ສອດຄ່ອງຖືກຕ້ອງຕາມກົດໝາຍ ແລະ ລະບຽບການ, ຂອບ ເຂດການນໍາໃຊ້ເງື່ອນໄຂໃນການອະນຸຍາດນໍາເຂົ້າພາຫະນະທ່ອງທ່ຽວຢ້ຽມຢາມ ແລະ ຜ່ານການຂົນສົ່ງສິນຄ້າ, ຂັ້ນຕອນການດຳເນີນການແຈ້ງເອກະສານຂາເຂົ້າ-ຂາ ອອກ, ການນໍາໃຊ້ສະຕິກເກີ ບ53, ກຳນົດອາຍຸການນໍາໃຊ້ ບ53 ແລະ ການຕໍ່ອາຍຸກົນໄກການປະສານງານ, ຄວາມຮັບຜິດຊອບການຄວບຄຸມຂອງພະນັກງານພາສີ, ມາດຕະການສຸກເສີນກໍລະນີລະບົບຂັດຂ້ອງ, ມາດຕະການຕໍ່ພາຫະນະທີ່ລະເມີດກົດໝາຍ ແລະ ລະບຽບການຂອງ ສປປ ລາວ, ມາດຕະການຕໍ່ເຈົ້າໜ້າທີ່ພາສີຂອງ ການຈັດຕັ້ງປະຕິບັດການນໍາໃຊ້ລະບົບ ບ53.
  ສໍາລັບລະບົບດັ່ງກ່າວກະຊວງການເງິນເຫັນດີຮັບຮອງເອົາການພັດທະນາ ແລະຮູບແບບຂອງລະບົບຄຸ້ມຄອງພາຫະນະເຂົ້າ-ອອກຢ້ຽມຢາມຊົ່ວຄາວຂອງບໍລິສັດ ຄໍາປະ ເສີດ ຄອມພິວເຕີ້ ຈໍາກັດຜູ້ດຽວ ໃນການທົດລອງນໍາໃຊ້ຢູ່ສາມດ່ານພາສີສາກົນເປົ້າໝາຍຄືດ່ານພາສີສາກົນຂົວມິດຕະພາບ1, ດ່ານພາສີສາກົນບໍ່ເຕນ, ດ່ານພາສີສາກົນຂົວມິດຕະພາບ 4, ລະບົບດັ່ງກ່າວໂດຍມີການຊໍາລະດ້ວຍລະບົບເອເລັກໂຕຣນິກໃຊ້ສະຕິກເກີ ແລະຈ່າຍຜ່ານລະບົບທະນາຄານຊຶ່ງສາມາດຮັບປະກັນໃນການຄຸ້ມຄອງຕິດ ຕາມພາຫະນະເຂົ້າ-ອອກຜ່ານດ່ານພາສີສາກົນໃຫ້ມີຄວາມເປັນເອກະພາບໃນຂອບເຂດທົ່ວປະເທດ.

_______________

ຂ່າວ: ສີສຸວັນ,  ໜັງສືພິມເສດຖະກິດ-ສັງຄົມ

  

แชร์