ລັດກຳນົດ 10 ນະໂຍບາຍ, 9 ມາດຕະການແກ້ໄຂຜົນກະທົບຈາກໂຄວິດ-19

   ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ລາຍງານໃນວາລະເປີດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ໃນວັນທີ 24 ມິຖຸນາ 2020 ໃຫ້ຮູ້ວ່າ: ຕໍ່ນະໂຍບາຍ ແລະມາດຕະການແກ້ໄຂຜົນກະທົບຕໍ່ເສດຖະກິດ-ສັງຄົມຈາກການລະບາດຂອງພະຍາດ COVID-19 ລັດຖະບານໄດ້ກໍານົດ 10 ນະໂຍບາຍເພື່ອໃຫ້ຂະແໜງການທີ່ກ່ຽວຂ້ອງນໍາໄປປະຕິບັດຄື: ໄດ້ຍົກເວັ້ນການເກັບອາກອນລາຍໄດ້ຈາກເງິນເດືອນຂອງຜູ້ອອກແຮງງານທັງໝົດທີ່ມີລາຍຮັບ 5 ລ້ານກີບລົງມາ ແລະໄດ້ຍົກເວັ້ນການເກັບອາກອນລາຍໄດ້ຂອງຈາກລັດວິສາຫະກິດໃນໄລຍະເວລາ 3 ເດືອນ (4, 5, 6 ປີ 2020); ໄດ້ຍົກເວັ້ນພາສີ-ອາກອນ ແລະ ຄ່າທໍານຽມຕ່າງໆໃນການນໍາເຂົ້າສິນຄ້າປະເພດທີ່ຮັບໃຊ້ວຽກງານຕ້ານພະຍາດໂຄວິດ-19;ໄດ້ເລື່ອນການຊໍາລະພັນທະອາກອນທຸລະກິດທ່ອງທ່ຽວໃນໄລຍະເວລາ 3 ເດືອນ (ເລີ່ມແຕ່ເດືອນເມສາ 2020); ໄດ້ຕໍ່ເວລາການສົ່ງເອກະສານລາຍງານການເຄື່ອນໄຫວການເງິນ ແລະວຽກປະຈໍາປີ 2019 ຂອງວິສາຫະກິດ; ໄດ້ຕໍ່ເວລາການຊໍາລະຄ່າທໍານຽມທາງ; ໄດ້ຜ່ອນຜັນລາຄາ ແລະ ຕໍ່ເວລາການຊໍາລະຄ່າໄຟຟ້າ ແລະນໍ້າປະປາ;ໄດ້ຫຼຸດຄ່າອິນເຕີເນັດ ແລະຄ່າໂທລະສັບ;ໄດ້ປັບຫຼຸດອັດຕາດອກເບ້ຍພື້ນຖານຂອງທະນາຄານແຫ່ງ ສປປ ລາວ ແລະຫຼຸດອັດຕາສ່ວນເງິນແຮຝາກບັງຄັບຂອງທະນາຄານທຸລະກິດ; ໄດ້ໃຫ້ນະໂຍບາຍສິນເຊື່ອເລື່ອນເວລາຊໍາລະໜີ້ຕົ້ນທຶນ ແລະດອກ ເບ້ຍ,ໄດ້ປະກອບທຶນ 200 ຕື້ກີບ, ໃນນັ້ນໄດ້ປ່ອຍ 100 ຕື້ກີບ ບ້ວງທໍາອິດໃຫ້ກອງທຶນ SME ໂດຍຜ່ານທະນາຄານທຸລະກິດໃນອັດຕາດອກເບ້ຍຄົງທີ່ 3% ຕໍ່ປີ ແລະໄດ້ອະນຸມັດເງິນກູ້ດອກເບ້ຍ 3% ໃຫ້ທະນາຄານທຸລະກິດໄປປ່ອຍຕໍ່ໃນອັດຕາດອກເບ້ຍ 5,5% ເພື່ອຟື້ນຟູບັນດາຫົວໜ່ວຍທຸລະກິດຜະລິດເປັນສິນຄ້າ ແລະ ເລື່ອນເວ ລາການຊໍາລະພັນທະເຂົ້າກອງທຶນປະກັນສັງຄົມແບບບັງຄັບຂອງຫົວໜ່ວຍທຸລະກິດ.
  ນອກນັ້ນຍັງໄດ້ກຳນົດເອົາ 9 ມາດຕະການຄື: ໄດ້ຄົົ້ນຄວ້າສະເໜີດັດປັບຕົວ ເລກການຂະຫຍາຍຕົວຂອງ GDP ແລະ ຕົວເລກຄາດໝາຍເສດຖະກິດມະຫາພາກ; ເພີ່ມທະວີການຄຸ້ມຄອງສະຖຽນລະພາບເສດຖະກິດມະຫາພາກໃຫ້ຮັດ ກຸມ; ເອົາໃຈໃສ່ເລັ່ງເກັບລາຍຮັບເທົ່າທີ່ສາມາດເຮັດໄດ້ໂດຍສະເພາະລາຍຮັບທີ່ບໍ່ໄດ້ຮັບຜົນກະທົບຫຼາຍຈາກໂຄວິດ-19, ລາຍຮັບຈາກຜົນການກວດສອບ ແລະຜົນກວດກາ; ຄຸ້ມຄອງລາຍຈ່າຍງົບປະມານໃຫ້ຮັດກຸມ, ປະຢັດ ແລະຫຼຸດຜ່ອນລາຍຈ່າຍທີ່ມີເງື່ອນໄຂຫຼຸດຜ່ອນລົງໄດ້ຈໍານວນໜຶ່ງເປັນຕົ້ນລາຍຈ່າຍບໍລິຫານ-ດັດສົມສົ່ງເສີມ, ກວດກາ ແລະເຈລະຈາຄືນໂຄງການລົງທຶນຂອງລັດໂດຍສະເພາະໂຄງການໃຫຍ່ເພື່ອຫຼຸດຜ່ອນບາງກິດຈະການ ທີ່ບໍ່ຈໍາເປັນລົງຕື່ມພ້ອມທັງເຂັ້ມງວດວິໄນແຜນການ-ການເງິນ; ຊຸກຍູ້ສົ່ງເສີມການ ຜະລິດເປັນສິນຄ້າເລັ່ງປະຕິບັດກອງທຶນ ສົ່ງເສີມ SME ໂດຍໄວ; ເລັ່ງສົ່ງເສີມການທ່ອງທ່ຽວພາຍໃນໃຫ້ຫຼາຍຂຶ້ນ; ຕິດຕາມ ແລະຄຸ້ມຄອງແຮງງານລາວທີ່ມາຈາກຕ່າງປະເທດ, ກໍາລັງແກ້ໄຂເງິນອຸດໜູນແຮງງານວ່າງງານສໍາລັບແຮງງານໃນລະບົບປະກັນສັງຄົມ ແລະແຮງງານທີ່ໄດ້ຮັບຜົນກະທົບ; ປັບປຸງ ແລະກະກຽມຄວາມພ້ອມໃຫ້ແກ່ການດໍາເນີນທຸລະກິດຂອງລັດວິສາຫະກິດການບິນລາວ.

_____________

ຂ່າວ: ແພງຕາ 

ໜັງສືພິມເສດຖະກິດ-ສັງຄົມ

แชร์