ສະຫວັນ ປະກາດການຈັດຕັ້ງ 3 ພະແນກການ

  ຕອນບ່າຍວັນທີ18 ມິຖຸນາ 2020 ແຂວງສະຫວັນນະເຂດ ຈັດພິທີປະກາດການຈັດຕັ້ງຂອງພະແນກສາທາລະນະສຸກແຂວງ ແລະວິທະຍາໄລວິທະຍາສາດສຸຂະພາບ ແຂວງ, ໂດຍການເປັນປະທານຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ແລະມີບັນດາພະແນກການຕ່າງໆອ້ອມຂ້າງແຂວງເຂົ້າຮ່ວມ.
  ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງສະ ຫວັນນະເຂດ ໄດ້ຜ່ານຂໍ້ຕົກລົງຂອງ ທ່ານເຈົ້າແຂວງສະຫວັນນະເຂດ ວ່າດ້ວຍການຍົກຍ້າຍ ແລະແຕ່ງ ຕັ້ງພະນັກງານຊຶ່ງໄດ້ອະນຸມັດໃຫ້ ທ່ານ ດຣ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ, ທ່ານ ດຣ ນາງ ຈັນດອນ ມະນີພູໃສ ຮອງຫົວໜ້າພະ ແນກສາ ທາລະນະສຸກແຂວງ, ທ່ານ ດຣ ນາງ ສູນທອນ ໂພທິສານ ຜູ້ອຳນວຍການວິທະຍາໄລວິທະຍາສາດສຸຂະພາບແຂວງ ແລະທ່ານ ດຣ ບຸນນັກ ກຸລະວົງສາ ຮອງຜູ້ອຳນວຍການໂຮງໝໍແຂວງອອກພັກຜ່ອນຮັບເບ້ຍບຳນານ, ຈາກນັ້ນກໍ່ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງ, ໃນນັ້ນໄດ້ແຕ່ງຕັ້ງທ່ານ ດຣ ແສງດາວ ສີດາໄລ ເປັນຮັກສາການຫົວໜ້າພະແນກສາທາລະນະສຸກແຂວງ, ທ່ານ ດຣ ຜາລີ ສີບຸນຍາ ແລະທ່ານ ດຣ ນາງ ເກດສະພອນ ຍາດຕິວົງ ເປັນຮອງຫົວໜ້າພະແນກສາທາລະນະສຸກແຂວງ ແລະຕົກລົງແຕ່ງຕັ້ງທ່ານ ປອ ດຣ ສຸ ຄັນທອນ ສິງພວງເພັດ ເປັນຜູ້ວ່າການຜູ້ອຳນວຍການວິທະຍາໄລວິທະຍາສາດສຸຂະພາບແຂວງ.
   ໂອກາດດັ່ງກ່າວ, ທ່ານເຈົ້າແຂວງສະຫວັນນະເຂດມີຄຳເຫັນ ແລະສະແດງຄວາມຊົມເຊີຍຕໍ່ຜົນງານທີ່ຜ່ານມາຂອງການນຳພະແນກ ແລະການເຮັດໜ້າທີ່ຂອງອ້າຍນ້ອງພະນັກງານແພດໝໍ ແລະວິຊາການທົ່ວພະແນກສາທາລະນະສຸກແຂວງ ໃນຂະບວນການຕ້ານ, ສະກັດກັ້ນການລະບາດຂອງພະຍາດໂຄວິດ-19 ໄລຍະທີ່ຜ່ານມາ, ແຕ່ກໍ່ຍັງມີບັນຫາທີ່ທ້າທາຍອີກໂດຍສະເພາະພະຍາດຕາມລະດູການໃນປະຈຸບັນກໍ່ແມ່ນໄຂ້ເລືອດອອກທີ່ກຳລັງເກີດຢູ່ໃນຫຼາຍທ້ອງຖິ່ນ, ຊຶ່ງວຽກງານສາທາລະນະສຸກກໍ່ແມ່ນວຽກງານໜຶ່ງທີ່ພົວພັນເຖິງບົດບາດການນຳພາຂອງພັກສະນັ້ນ, ຜູ້ທີ່ໄດ້ຮັບການແຕ່ງຕັ້ງໃໝ່ຕ້ອງໄດ້ເຮັດໜ້າທີ່ໃຫ້ດີທີ່ສຸດໂດຍສະເພາະການປັບປຸງແບບແຜນວິທີເຮັດວຽກ, ແບບແຜນການນຳພາໃນທຸກຂັ້ນນັບແຕ່ຂັ້ນພະແນກ, ຂະແໜງຈົນລົງຮອດຂັ້ນໜ່ວຍງານ ແລະການຈັດຕັ້ງປະຕິບັດຕ້ອງໃຫ້ມີຄວາມສອດຄ່ອງ, ເຮັດວຽກ ແບບບຸກທະລຸຢ່າງຈິງຈັງ, ແກ້ໄຂບັນຫາແນວຄິດ ແລະການເຮັດວຽກແບບມີແຕ່ເວົ້າແຕ່ຫ່າງເຫີນຕົວຈິງ, ອີກດ້ານໜຶ່ງກໍ່ແມ່ນຍູ້ແຮງການຈັດຕັ້ງປະຕິບັດຄາດໝາຍສູ້ ຊົນຂອງວຽກງານສາທາລະນະສຸກໃຫ້ບັນລຸຜົນຕາມຄາດໝາຍສະຫັດສະວັດທີ່ວາງໄວ້, ຍົກສູງການບໍລິການປິ່ນປົວໃຫ້ມີຄຸນນະພາບ, ຮັກສາຈັນຍາບັນ, ຈັນຍາທຳຂອງຕົນ, ສືບຕໍ່ສຶກສາອົບຮົມວຽກງານການເມືອງແນວຄິດໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນໃຫ້ເຊື່ອມຊຶມເລິກເຊິ່ງຕໍ່ພາລະໜ້າທີ່ ແລະ ສຸດທ້າຍສິ່ງສຳຄັນກໍ່ແມ່ນການແບ່ງງານ, ແບ່ງຄວາມຮັບຜິດຊອບລະອຽດ, ມີຄວາມສາມັກຄີເປັນເອກະພາບພາຍໃນໃຫ້ໜັກແໜ້ນຈຶ່ງເຮັດໃຫ້ວຽກງານຕ່າງໆມີຜົນສຳເລັດໄດ້.
  ຂ່າວແຈ້ງໃຫ້ຮູ້ຕື່ມວ່າ: ໃນຕອນເຊົ້າວັນດຽວກັນນີ້, ທີ່ຫ້ອງປະຊຸມພະແນກ ຖວທ ແຂວງກໍ່ໄດ້ຈັດພິທີປະກາດການຈັດຕັ້ງພະແນກການກົມກອງອ້ອມຂ້າງແຂວງໂດຍການເປັນປະທານຂອງ ທ່ານ ນາງ ບຸນເຍື້ອນ ທິດພຸດທະວົງ ກຳມະການປະຈຳພັກແຂວງປະທານກວດກາພັກ-ລັດແຂວງສະຫວັນນະເຂດ.
 ໃນພິທີ, ໄດ້ຜ່ານຂໍ້ຕົກລົງຂອງເຈົ້າແຂວງສະຫວັນນະເຂດວ່າດ້ວຍການຍົກຍ້າຍ ແລະແຕ່ງຕັ້ງພະນັກງານ, ໃນນັ້ນໄດ້ຕົກລົງເຫັນດີຍົກຍ້າຍ ທ່ານ ປອ ໂພໄຊ ສິດທິຊົນ ພະນັກງານເຂດເສດຖະກິດ ພິເສດແຂວງສະຫວັນນະເຂດໄປ ປະຈຳການຢູ່ພະແນກ ຖວທ ແຂວງ, ພ້ອມທັງອະນຸມັດແຕ່ງຕັ້ງເປັນຮອງຫົວໜ້າພະແນກ ຖວທ ແຂວງ ແລະເຫັນດີຍົກຍ້າຍທ່ານ ສີສຸກ ເທບທານີ ຮອງເຈົ້າເມືອງອາດສະພອນ ໄປປະຈຳການຢູ່ພະແນກຍຸຕິທຳແຂວງພ້ອມທັງອະນຸມັດແຕ່ງຕັ້ງເປັນຮອງຫົວໜ້າພະແນກຍຸຕິ ທຳແຂວງ.

แชร์