ລັດຖະມົນຕີ ກະຊວງພາຍໃນຊີ້ນຳວຽກຢູ່ອຸດົມໄຊ

  ວັນທີ 19 ມິຖຸນາຜ່ານມາທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນພ້ອມຄະນະໄດ້ລົງເຄື່ອນໄຫວຢ້ຽມຢາມ ແລະເຮັດວຽກທີ່ ແຂວງອຸດົມໄຊ ພ້ອມທັງພົບປະ ແລະໂອ້ລົມບັນດາພະນັກງານຫຼັກແຫຼ່ງຊຶ່ງມີທ່ານ ພົມມາ ວັນນະກຳ ຫົວໜ້າພະແນກພາຍໃນແຂວງອຸດົມໄຊ, ພ້ອມດ້ວຍຄະນະ, ຫົວໜ້າຫ້ອງການພາຍໃນ 7 ເມືອງ ແລະພະນັກງານລັດຖະກອນພາຍໃນພະແນກດັ່ງກ່າວເຂົ້າຮ່ວມຮັບຟັງ.

 ການລົງເຄື່ອນໄຫວເຮັດວຽກຂອງທ່ານລັດຖະມົນຕີກະຊວງພາຍໃນພ້ອມດ້ວຍຄະນະໃນຄັ້ງນີ້ກໍເພື່ອເປັນການຕິດຕາມ,ຊຸກຍູ້ການເຄື່ອນໄຫວຈັດຕັ້ງປະຕິບັດໜ້າທີ່ວຽກ ງານຂອງຂະແໜງພາຍໃນຢູ່ຂັ້ນຮາກຖານ, ທ້ອງຖິ່ນ,ທັງເປັນການເກັບກຳຂໍ້ມູນກ່ຽວກັບຂໍ້ສະດວກ,ຂໍ້ຫຍຸ້ງຍາກ ແລະຄວາມຕ້ອງການດ້ານຕ່າງໆເພື່ອນຳໄປພິຈາລະນາ ແລະຊອກຫາແນວທາງໃນການປັບປຸງແກ້ໄຂໃນຕໍ່ໜ້າໃຫ້ດີຂຶ້ນກວ່າເກົ່າ, ເປັນການພົບປະໂອ້ລົມ, ໃຫ້ທິດຊີ້ນຳບາງດ້ານແກ່ບັນດາພະນັກງານລັດຖະກອນຂັ້ນທ້ອງຖິ່ນ ພ້ອມກັນຈັດຕັ້ງປະຕິບັດວຽກງານວິຊາສະເພາະ ຂອງຕົນໃຫ້ໄປໃນທິດທາງດຽວກັນ,ມີປະສິດທິພາບ ແລະໄດ້ຮັບຜົນສຳເລັດຕາມລະດັບຄາດໝາຍ, ກ່ອນອື່ນທ່ານໄດ້ຮັບຟັງການລາຍງານສະພາບລວມຂອງການເຄື່ອນໄຫວຈັດຕັ້ງປະຕິບັດວຽກງານຂອງພະແນກພາຍໃນ ແຂວງອຸດົມໄຊ ໃນໄລຍະຜ່ານມາຊຶ່ງເຫັນວ່າມີທັງດ້ານດີຜົນງານ, ດ້ານອ່ອນ-ຂໍ້ຄົງຄ້າງ, ສິ່ງທ້າທາຍ ແລະບາງຂໍ້ສະເໜີເພື່ອໃຫ້ກະຊວງພາຍໃນມີຄໍາເຫັນໃນການຊອກຫາວິທີປັບປຸງ ແລະແກ້ໄຂພ້ອມທັງຮັບຟັງການສະເໜີຂອງບັນດາຫົວໜ້າຫ້ອງການພາຍໃນ 7 ເມຶອງ.

  ໂອກາດດັ່ງກ່າວທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນໄດ້ໂອ້ລົມ ແລະໃຫ້ທິດຊີ້ນຳບາງບັນຫາໂດຍສະເພາະແມ່ນເນັ້ນໜັກໃຫ້ພະແນກພາຍໃນແຂວງ ແລະຫ້ອງການພາຍໃນເມືອງເອົາໃຈໃສ່ຈັດຕັ້ງປະຕິບັດວຽກງານຂອງຕົນເອງຕາມພາລະບົດບາດ, ສິດ, ໜ້າທີ່ຢ່າງເຂັ້ມງວດ, ຖືກຕ້ອງຕາມລະບຽບ, ກົດໝາຍ, ຫຼັກ ການ ແລະນິຕິກໍາຕ່າງໆ, ມີຄວາມຮັບຜິດຊອບ, ເອົາໃຈໃສ່ດ້ານການເມືອງ-ແນວຄິດ, ປັບປຸງວຽກງານບໍລິຫານລັດ, ວຽກງານວິຊາສະເພາະ, ເຄື່ອນໄຫວຕິດຕາມຊຸກຍູ້ວຽກງານໃຫ້ທົ່ວເຖິງນັບແຕ່ຂັ້ນເມືອງຈົນຮອດຂັ້ນບ້ານ, ເພີ່ມທະວີຄວາມສາມັກຄີ ແລະມີຄວາມຫ້າວຫັນໃນການປະຕິບັດໜ້າທີ່ແນໃສ່ໃນການສ້າງຜົນງານ ແລະ ເຮັດ ໃຫ້ວຽກງານຂອງຂະແໜງພາຍໃນຢູ່ຂັ້ນທ້ອງຖິ່ນມີປະສິດທິພາບ ແລະມີຜົນສໍາເລັດຢ່າງຕໍ່ເນື່ອງ.

 ການລົງເຄື່ອນໄຫວເຮັດວຽກຢູ່ແຂວງອຸດົມໄຊ ຂອງທ່ານລັດຖະມົນຕີກະຊວງພາຍໃນພ້ອມດ້ວຍຄະນະໃນຄັ້ງນີ້ຍັງໄດ້ນຳເອົາຄອມພິວເຕີ, ເຄື່ອງກັອບປີ້ເອກະສານ ແລະອຸປະກອນຮັບໃຊ້ພາຍໃນຫ້ອງການຈຳນວນ 7 ຊຸດ ມອບໃຫ້ກັບຫ້ອງການພາຍໃນ7 ເມືອງ ເພື່ອນໍາໄປໃຊ້ເຂົ້າໃນການປະຕິບັດວຽກງານຂອງຕົນໃຫ້ມີຄວາມທັນສະໄໝ, ວ່ອງໄວ ແລະທັນກັບສະພາບການ.

_____________

ຂ່າວ: ຄານມະນີ ຮຽນດໍຈັນ

แชร์