6 ເດືອນ ເມືອງສິງເສຍຫາຍ 10,4 ຕື້ກີບ ຈາກໄພທຳມະຊາດ

  ຕາມການໃຫ້ສໍາພາດຂອງທ່ານນາງ ຫຼ້າມອນ ອ່ອນແສງສີ ກໍາມະການພັກເມືອງຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງສິງ ແຂວງຫຼວງນໍ້າທາ ໃຫ້ຮູ້ໃນວັນທີ 22 ມິຖຸນາ 2020 ວ່າ: 6 ເດືອນຕົ້ນປີ 2020 ເມືອງສິງ ໄດ້ຮັບຜົນກະທົບໄພພິບັດຈາກທໍາມະຊາດເປັນຕົ້ນຝົນຕົກໜັກ, ລົມພາຍຸພັດແຮງ, ໝາກເຫັບຕົກເຮັດໃຫ້ເຮືອນຊານ ແລະທີ່ຢູ່ອາໄສຂອງປະຊາຊົນ, ເສັ້ນທາງ, ລະບົບໄຟຟ້າ, ໂຮງຮຽນ, ໂຮງງານຂອງຫົວໜ່ວຍທຸລະກິດ, ຫ້າງຮ້ານຕ່າງໆໄດ້ຮັບຜົນກະທົບເສຍຫາຍເຖິງ 2 ຄັ້ງ, ມີຈໍານວນ 8 ບ້ານ, 39 ຄອບຄົວ ໄດ້ຮັບຜົນກະທົບມູນຄ່າເສຍຫາຍ 168 ລ້ານກວ່າກີບ, ເນື້ອທີ່ໄຮ່-ນາ ເສຍຫາຍ16.836 ເຮັກຕາ, ຜົນຜະລິດເສຍຫາຍ 2,28 ລ້ານໂຕນ, ມີ 31 ບ້ານ, ມີ 199 ຄອບຄົວ, ຄິດໄລ່ມູນຄ່າເສຍຫາຍ 10,2 ຕື້ກີບ, ລວມມູນຄ່າເສຍຫາຍທັງໝົດ 10,4 ຕື້ກີບ.

  ຜົນກະທົບດັ່ງກ່າວທາງເມືອງສິງໄດ້ຮັບການຊ່ວຍເຫຼືອປະເພດເຂົ້າສານໜຽວຈາກລັດຖະບານຈໍານວນ 5,8 ໂຕນ ແລະໄດ້ນໍາໄປແຈກຍາຍໃຫ້ປະຊາຊົນຜູ້ທີ່ປະສົບໄພນໍ້າຖ້ວມໄຮ່-ນາໃນປີ 2018 ຈໍານວນ 23 ບ້ານ,133 ຄອບຄົວ ແລະທາງຄະນະນໍາເມືອງສິງຍັງໄດ້ເອົາໃຈໃສ່ສືບຕໍ່ຊີ້ນໍາ ແລະໃຫ້ການຊ່ວຍເຫຼືອແກ້ໄຂບັນເທົາທຸກໃຫ້ປະຊາຊົນທີ່ປະສົບໄພ, ຄອບຄົວທຸກຍາກຢູ່ພາຍໃນເມືອງສິງຕື່ມອີກ.

___________

ຂ່າວ: ມຸນຕີ

แชร์