ຄູນຊັບຜູ້ສົ່ງເສີມ ແລະເກັບຊື້ມັນຕົ້ນຈາກຊາວກະສິກອນ ເຮັດໃຫ້ປະຊາຊົນມີຢູ່ມີກິນ

   ບໍລິສັດ ຄູນຊັບຂາອອກ-ຂາເຂົ້າ ສາຂາແຂວງຈໍາປາສັກ ແມ່ນບໍລິສັດທີ່ນໍາໜ້າໃນການສົ່ງເສີມປະຊາຊົນປູກ ແລະເປັນຕະຫຼາດທີ່ຮອງຮັບທີ່ແນ່ນອນໃຫ້ແກ່ຊາວກະສິ ກອນຜູ້ປູກມັນຕົ້ນໃນແຂວງຈໍາປາສັກ ແລະແຂວງສາລະວັນເຮັດໃຫ້ຊະພາບການເປັນຢູ່ຂອງປະຊາຊົນມີຢູ່ມີກີນ ແລະພີກປິ້ນແຜນດິນຄໍານໍ້າຊຸ່ມເຕັມໄປດ້ວຍພຶດຍຸດທະ ສາດມັນຕົ້ນປົດປ່ອຍຄວາມຍາກຈົນ.

   ທ່ານ ສັນໄຊ ກິດຮັກສາ ປະທານບໍລິສັດຄູນຊັບຂາອອກ-ຂາເຂົ້າ ຈໍາກັດຜູ້ດຽວ ໃຫ້ຮູ້ວ່າ: ບໍລິສັດໄດ້ດໍາເນີນກິດຈະການສົ່ງເສີມປະຊາຊົນປູກມັນຕົ້ນ ແລະເມື່ອຜົນຜະ ລິດອອກມາທາງບໍລິສັດໄດ້ຮັບເກັບຊື້ຄືນທັງໝົດ, ຊຶ່ງກິດຈະການດັ່ງກ່າວໄດ້ເລີ່ມດໍາເນີນມາແຕ່ປີ 2013 ມີ ສໍານັກງານໃຫຍ່ຕັ້ງຢູ່ບ້ານໂນນອຸດົມເມືອງບາຈຽງຈະເລີນສຸກ ແຂວງຈໍາປາສັກ, ຊຶ່ງຊາວກະສິກອນທີ່ທາງບໍລິສັດສົ່ງເສີມໃຫ້ປູກມັນຕົ້ນສ່ວນໃຫຍ່ແມ່ນຢູ່ເຂດເມືອງບາຈຽງຈະເລີນສຸກ, ເມືອງສຸຂຸມາແຂວງຈໍາປາສັກ ແລະເມືອງເລົ່າງາມແຂວງສາລະວັນ, ສໍາລັບການສົ່ງເສີມດ້ານການປູກທາງບໍລິສັດແມ່ນໄດ້ຕອບສະໜອງແນວພັນໃຫ້ກັບຊາວກະສີກອນຢ່າງພຽງພໍໂດຍບໍ່ໄດ້ເສຍຄ່າ, ພ້ອມດຽວ ກັນນີ້ກໍ່ມີວິຊາການໃຫ້ການຊ່ວຍເຫຼືອແນະນໍາຊາວກະສີກອນຜູ້ທີ່ຕ້ອງການຮຽນຮູ້ກ່ຽວກັບເຕັກນິກການປູກ, ການບົວລະບັດຮັກສາມັນ, ການປັບປຸງດິນ, ການໃສ່ຝຸ່ນທີ່ເໝາະສົມເພື່ອຮັບປະກັນຄຸນນະພາບຂອງຜົນຜະລິດໃຫ້ສູງ.

  ທ່ານ ສັນໄຊ ກິດຮັກສາ ໃຫ້ຮູ້ຕື່ມວ່າ: ມັນຕົ້ນທີ່ຊາວກະສິກອນປູກຕ້ອງໃຊ້ເວລາ 7-8 ເດືອນ ຈຶ່ງສາມາດໃຫ້ຜົນຜະລິດກໍຄືສາມາດຫຼົກເອົາຫົວມັນແລ້ວນໍາມາຂາຍທີ່ລານມັນຂອງບໍລິສັດໃນລາຄາເກັບຊື້ຕາມກົນໄກຕະຫຼາດໃນແຕ່ລະໄລຍະເປັນຕົ້ນມັນດີບລາຄາ 500-600 ຕໍ່ກິໂລ, ມັນແຫ້ງລາຄາ 1.400-1.500 ກີບຕໍ່ກິໂລ, ຊຶ່ງຄາດວ່າໝົດປີ 2020 ທາງບໍລິສັດຈະເກັບຊື້ມັນໃຫ້ໄດ້ 15-17 ແສນໂຕນ,ມັນທີ່ປູກຢູ່ໃນເຂດດັ່ງກ່າວທຽບໃສ່ບາງບ່ອນແມ່ນມີຄຸນນະພາບດີກວ່າ, ເປີເຊັນແປ້ງໃນຫົວມັນສູງເນື່ອງຈາກຄວາມອຸດົມສົມບູນຂອງດິນຈິ່ງເປັນທີ່ຕ້ອງການຂອງຕະຫຼາດພາຍໃນ ແລະຕ່າງປະເທດເຊັ່ນ: ຈີນ, ໄທ, ຫວຽດນາມ, ຊຶ່ງໃນຊຸມປີຜ່ານມາການສົ່ງ ອອກມັນຂອງບໍລິສັດກວມເອົາ 30% ເປັນຢ່າງໜ້ອຍຈໍານວນມັນທັງໝົດທີ່ສົ່ງອອກຈາກແຂວງຈໍາປາສັກໄປສູ່ບັນດາປະເທດຕ່າງໆຄື: ປີ 2019 ສົ່ງອອກມັນຫົວຈໍານວນ 20 ລ້ານກວ່າກີໂລ, ມັນແຫ້ງ 188 ລ້ານກວ່າກິໂລ, ສໍາລັບຮອດເດືອນເມສາ 2020 ທາງບໍລິສັດ ສາມາດສົ່ງມັນແຫ້ງອອກໄດ້ 13 ລ້ານກວ່າກິໂລ ແລະ ໃນຊຸມປີຕໍ່ໜ້າຈະພັດທະນາສ້າງລາງມັນໃຫ້ມີຄວາມກວ້າງໃຫຍ່ເພື່ອຮອງຮັບການຕາກມັນແຫ້ງເປັນຈໍານວນຫຼາຍເພື່ອສົ່ງອອກພ້ອມດຽວກັນນີ້ທາງບໍລິສັດຍັງມີຄວາມຕ້ອງການເກັບຊື້ມັນຕົ້ນໃຫ້ໄດ້ 200.000 ໂຕນ.

  ທ່ານ ສັນໄຊ ກິດຮັກສາ ກ່າວໃຫ້ຮູ້ຕື່ມອີກວ່າ: ໃນອະນາຄົດເພື່ອເຮັດໃຫ້ກິດຈະການທຸລະກິດມີຄວາມເຂັ້ມແຂງຢຶນຢົງຂໍຮຽກຮ້ອງຊາວກະສິກອນເປັນເຈົ້າການ ຮັກສາສະມັດຕະພາບຂອງດິນ, ຊອກວິທີປາບສັດຕູພຶດ, ໂດຍສະເພາະແມ່ນເຊື້ອພະຍາດໃບດ່າງທີ່ມີຜົນຮ້າຍຕໍ່ການເຕີບໂຕຂອງມັນ, ພ້ອມດຽວກັນນີ້ຍັງໄດ້ຢໍ້າວ່າບໍລິສັດຂອງຕົນໄດ້ດໍາເນີນທຸລະກິດຖືກຕ້ອງຕາມລະບຽບການ, ສາມາດສ້າງວຽກເຮັດງານທໍາໃຫ້ປະຊາຊົນ, ສົ່ງເສີມໃຫ້ຊິວີດການເປັນຢູ່ຂອງຊາວກະສິກອນມີຢູ່ມີກິນ,ປະກອບສ່ວນຊ່ວຍເຫຼືອສັງຄົມໃນການພັດທະນາດ້ານຕ່າງໆ.

_____________

ຂ່າວ: ໂພທິຣາຊ

 

แชร์