ຮອງນາຍົກ ລົງຕິດຕາມຄວາມຄືບໜ້າໂຄງການກໍ່ສ້າງທາງລົດໄຟລາວ-ຈີນ ທີ່ຫຼວງພະບາງ

  ພາຍຫຼັງສຳເລັດກອງປະຊຸມຄົບຄະນະຊີ້ນຳໂຄງການກໍ່ສ້າງທາງລົດໄຟ ລາວ-ຈີນ ຄັ້ງທີ 8 ທີ່ຈັດຂຶ້ນໃນວັນທີ 22 ມິຖຸນາຜ່ານມາທີ່ຫ້ອງປະຊຸມຫ້ອງວ່າການປົກຄອງແຂວງ,ຕອນເຊົ້າຂອງວັນທີ 23 ມິຖຸນາ 2020 ນີ້ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ,ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ, ທ່ານ ຄໍາຂັນຈັນ ທະວີສຸກ ເຈົ້າແຂວງຫຼວງພະບາງ, ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົງ, ຮອງຫົວໜ້າຄະນະຊີ້ນໍາກໍ່ສ້າງທາງລົດໄຟ ລາວ-ຈີນ, ພ້ອມດ້ວຍຄະນະຊີ້ນໍາຂັ້ນແຂວງ, ກະຊວງ, ບັນດາກົມຄຸ້ມຄອງການກໍ່ສ້າງທາງລົດໄຟ, ລັດວິສາຫະກິດທາງລົດໄຟແຫ່ງຊາດລາວໄດ້ເດີນທາງໄປເບິ່ງຄວາມຄືບໜ້າການກໍ່ສ້າງທາງລົດໄຟລາວ-ຈີນທີ່ບ້ານພອນ ໄຊນະຄອນຫຼວງພະບາງ ແລະໄດ້ຮັບຟັງການລາຍງານຄວາມຄືບໜ້າຂອງໜ້າວຽກໂດຍລວມຂອງການກໍ່ສ້າງຈາກທາງພາກສະໜາມຜູ້ຮັບເໝົາກໍ່ສ້າງ.

  ສໍາລັບຜົນສໍາເລັດກອງປະຊຸມຄົບຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ ທີ່ຈັດຂຶ້ນໃນວັນທີ 22 ມິຖຸນາ ຜ່ານມານີ້ໂດຍການເປັນປະທານຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ໄດ້ຮັບຟັງການລາຍງານຈາກ ທ່ານ ບຸນຈັນ ສິນທະວົງ ລັດຖະມົນຕີກະ ຊວງໂຍທາທິການ ແລະຂົນສົ່ງຊຶ່ງໄດ້ສະເໜີໃຫ້ຮູ້ກ່ຽວກັບການຈັດຕັ້ງປະຕິບັດບົດບັນທຶກກອງປະຊຸມຄະນະຊີ້ໂຄງການກໍ່ສ້າງທາງລົດໄຟ ລາວ-ຈີນ ຄັ້ງທີ 7 ໃນຄັ້ງວັນທີ 24 ຕຸລາ 2019 ຜ່ານມາ ແລະລາຍງານກ່ຽວກັບຄວາມຄືບໜ້າໂຄງການກໍ່ສ້າງເສັ້ນທາງລົດໄຟລາວ-ຈີນ ຊຶ່ງມາຮອດວັນທີ 31 ພຶດສະພາ 2020 ປະຕິບັດໄດ້ 89,43% ຂອງວຽກງານກໍ່ສ້າງພື້ນຖານໂຄງລາງທາງລົດໄຟທຽບໃສ່ແຜນເພີ່ມຂຶ້ນ 0,23% ໃນນີ້ວຽກງານຊີເຈາະອຸໂມງທັງໝົດ 75 ອຸໂມງ ເຈາະທະລຸແລ້ວ 65 ອຸໂມງ, ລົງມືກໍ່ສ້າງຂົວໃນຈຳນວນທັງໝົດ 164 ແຫ່ງ ແລະສ້າງເສົາຂົວສຳເລັດ 1.959 ເສົາ ເທົ່າ ກັບ 98,10%, ສໍາເລັດການວາງຂົວ 746 ຊ່ວງເສົາກວມເອົາ 36,60% ແລະວຽກງານວາງລາງ ສໍາເລັດ 49,7 ກິໂລແມັດ ຂອງຄວາມຍາວທັງໝົດ 409 ກິໂລແມັດ, ປະຈຸບັນພວມເລັງໃສ່ ກໍ່ສ້າງສະຖານີໃຫຍ່ຢູ່ບັນດາແຂວງທີ່ມີທາງລົດໄຟຜ່ານ,ນອກນີ້ຍັງໄດ້ເບີກຈ່າຍຄ່າຊົດເຊີຍຕາມແຜນບຸລິມະສິດຂອງໂຄງການໄດ້ເບີກຈ່າຍທັງໝົດຈຳນວນ 829,56 ຕື້ກີບໃຫ້ບັນດາແຂວງ ແລະ ນະຄອນ ຫຼວງວຽງຈັນ ໃນນີ້ໄດ້ນໍາໃຊ້ບ້ວງເງິນຂອງບໍລິສັດລົດໄຟລາວ-ຈີນ 416,83 ຕື້ກີບແລະບວງງົບປະມານຂອງລັດຖະບານມູນຄ່າ 412,73 ຕື້ກີບ ແລະໄດ້ໂອນໃຫ້ບັນ ດາແຂວງ,ນະຄອນຫຼວງສໍາເລັດເປັນທີ່ຮຽບຮ້ອຍ, ນອກນີ້ກອງປະຊຸມຍັງໄດ້ປຶກສາຫາລື ແລະຜ່ານກ່ຽວກັບຮູບແບບລົດໄຟອີເອັມຢູ ( EMU ) ພ້ອມທັງປະກອບຄຳຄິດຄຳເຫັນໃສ່ແຜນການໃນຕໍ່ໜ້າຢ່າງສົມເຫດສົມຜົນສອດຄ່ອງກັບສະພາບຕົວຈິງ.

  ເພື່ອເຮັດໃຫ້ກອງປະຊຸມມີຄວາມໝາຍສຳຄັນ ແລະນໍາໄປຈັດຕັ້ງປະຕິບັດໃຫ້ມີຜົນສຳເລັດ ທ່ານ ບຸນທອງ ຈິດມະນີ ໄດ້ມີຄຳເຫັນຊີ້ນຳໂດຍເນັ້ນໃຫ້ຄະນະຮັບຜິດຊອບຊີ້ນໍາໂຄງການກໍ່ສ້າງທາງລົດໄຟລາວ-ຈີນ ນັບແຕ່ຂັ້ນສູນກາງຈົນຮອດທ້ອງຖິ່ນສືບຕໍ່ປະຕິບັດໜ້າທີ່ທີໄດ້ມອບໝາຍໃຫ້ມີຜົນສຳເລັດແນໃສ່ຮັບປະກັນເຮັດໃຫ້ການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ບັນລຸຜົນສຳເລັດຕາມແຜນການທີ່ວາງໄວ້.

____________

ຂ່າວ: ສີສຸວັນ

แชร์