ເມືອງຮຸນ ເກັບກູ້ຜົນຜະລິດໄດ້ 60 ພັນກວ່າໂຕນ

  ໃນປີ 2018 ຜ່ານມາເມືອງຮຸນ ແຂວງອຸດົມໄຊ ສາມາດເກັບກູ້ຜົນຜະລິດພືດເປັນສິນຄ້າ ທັງພືດລະດູຝົນ ແລະລະດູແລ້ງໄດ້ຕາມແຜນການທີ່ກໍານົດໄວ້.

  ອີງຕາມບົດສະຫຼຸບການຈັດຕັ້ງປະຕິບັດແຜນພັດທະນາກະສິກໍາ ແລະປ່າໄມ້ປະຈໍາປີ 2018 ແລະທິດທາງແຜນການປີ 2019 ເຫັນວ່າ: ເມືອງຮຸນ ແຂວງອຸດົມໄຊ ໄດ້ເຄື່ອນໄຫວຈັດຕັ້ງປະຕິບັດວຽກງານກະສິກຳໂດຍສະເພາະແມ່ນການປູກພືດເປັນສິນຄ້າຢ່າງເອົາຈິງເອົາຈັງສົມທົບກັບທ່າແຮງທາງດ້ານຊັບພະຍາ ກອນທຳມະຊາດ ແລະມູນເຊື້ອອັນດຸໝັ່ນໃນການຜະລິດຂອງປະຊາຊົນບັນດາເຜົ່າພາຍໃນເມືອງຮຸນເຮັດໃຫ້ການຜະລິດ ກະສິກໍາເປັນສິນຄ້າມີທ່າຂະຫຍາຍ ຕົວຢ່າງຕໍ່ເນື່ອງຊຶ່ງເປັນໜໍ່ແໜງໃຫ້ແກ່ການຜະລິດເປັນກຸ່ມ, ອັນພົ້ນເດັ່ນແມ່ນການປູກສາລີອາຫານສັດ, ຖົ່ວເຫຼືອງ ແລະພືດຜັກຕ່າງໆໂດຍນໍາໃຊ້ແນວພັນປັບປຸງທີ່ຄຸນນະພາບ ແລະໃຫ້ຜົນຜະລິດສູງ, ນໍາໃຊ້ເຕັກນິກເຂົ້າໃນການຜະລິດຊຶ່ງໃນ 1 ປີຜ່ານມາທົ່ວເມືອງມີເນື້ອທີ່ຜະລິດກະສິກໍາເປັນສິນຄ້າທັງໝົດ 14.247 ເຮັກຕາ ແລະ ສາມາດເກັບກູ້ຜົນຜະລິດໄດ້ທັງໝົດ 62,73 ພັນໂຕນ, ໃນນັ້ນພືດລະດູຝົນມີເນື້ອທີ່ທັງໝົດ 11.730 ເຮັກຕາ ໄດ້ຮັບຜົນຜະ ລິດ 46.154 ໂຕນ, ທຽບໃສ່ແຜນປີປະຕິບັດໄດ້ 100% ສາລີແຂງ, ເນື້ອທີ່ປູກ 11.162 ເຮັກຕາ, ຜະລິດໄດ້ 44,715 ໂຕນ, ທຽບໃສແຜນປີປະຕິບັດໄດ້ 80,12%, ໝາກເດື່ອຍ 255 ເຮັກຕາ, ຜົນຜະລິດ 510 ໂຕນ. ເພີ່ມຂຶ້ນ 175 ເຮັກຕາ, ພືດຜັກກິນໝາກ, ໃບຕ່າງໆລວມ 73.6 ເຮັກຕາ, ຜົນຜະລິດໄດ້ 499,8 ໂຕນ, ພືດຕະກຸນຖົ່ວ 65 ເຮັກຕາ, ຜະລິດໄດ້ 211 ໂຕນ.

     ສ່ວນພືດລະດູແລ້ງມີເນື້ອທີ່ປູກທັງໝົດ 2.517 ເຮັກຕາ ສາມາດເກັບກູ້ຜົນຜະລິດໄດ້ທັງໝົດ 16.577 ໂຕນ, ໃນນັ້ນສາລີແຂງ: 1.992 ເຮັກຕາ, ຜະລິດໄດ້ 7.968 ໂຕນ ທຽບໃສ່ແຜນປີປະຕິບັດໄດ້ 99,6% ຖົ່ວເຫຼືອງ 320 ເຮັກຕາ, ຜະລິດໄດ້ 480 ໂຕນ, ປະຕິບັດໄດ້ 87,67%, ພືດຜັກກິນໝ າກ, ຫົວ ແລະໃບມີ ເນື້ອທີ່ປູກ 224 ເຮັກຕາ, ຜົນຜະ ລິດ 4.352 ໂຕນ, ທຽບໃສແຜນ ປີປະຕິບັດໄດ້ 100%. ນອກຈາກ ນີ້ຍັງມີບັນດານັກລົງທຶນຊາວຈີນທີ່ເຂົ້າມາລົງທຶນກ່ຽວກັບການປູກພືດຢູ່ໃນເມືອງຮຸນຕື່ມອີກໂດຍສະເພາະແມ່ນໝາກເຜັດ, ໝາກເຂືອ, ໝາກໂມ ແລະອື່ນໆລວມເນື້ອທີ່ເກືອບ 400 ເຮັກຕາ.

  ແນວໃດກໍດີໃນປີ 2019 ນີ້ ທາງຫ້ອງການກະສິກຳ ແລະປ່າໄມ້ເມືອງຍັງໄດ້ວາງແຜນສືບຕໍ່ໃນການຊຸກຍູ້ປະຊາຊົນໃຫ້ປູກພືດເພື່ອເປັນສິນຄ້າໃຫ້ນັບມື້ນັບໄດ້ຮັບຜົນຜະລິດສູງຂຶ້ນກວ່າເກົ່າພ້ອມທັງຈະສະໜອງ ແລະອໍານວຍຄວາມສະດວກໃຫ້ແກ່ປະຊາຊົນໃນທຸກດ້ານ.

แชร์