ຫັດຖະກຳຈັກສານ ສ້າງລາຍຮັບໃຫ້ປະຊາຊົນບ້ານແບ່ງດ່ານ

  ກຸ່ມຫັດຖະກຳຈັກສານຫວາຍບ້ານແບ່ງດ່ານ, ເມືອງລະຄອນເພັງ, ແຂວງສາລະວັນສາ ມາດສ້າງອາຊີບ, ສ້າງລາຍຮັບໃຫ້ປະຊາຊົນພາຍໃນບ້ານແບ່ງດ່ານຫຼາຍກວ່າ 1 ລ້ານກີບຕໍ່ຄົນຕໍ່ເດືອນ, ຈາກການຜະລິດ ແລະຂາຍຜະລິດຕະພັນຂັນ, ພາເຂົ້າ, ຕິບເຂົ້າ, ຕະຕ່າ ແລະອື່ນໆ ທີ່ເຮັດດ້ວຍຫວາຍ ແລະໄມ້ປ່ອງປະຈຸບັນກຸ່ມຫັດຖະກຳດັ່ງກ່າວ, ມີສະມາຊິກທັງໝົດ 30 ກວ່າຄອບຄົວ.
   ທ່ານ ໄຊຊະນະ ສີສະຫວັດ ຮອງເຈົ້າເມືອງລະຄອນເພັງ ແຂວງສາລະວັນ ລາຍງານໃຫ້ຮູ້ເມື່ອບໍ່ດົນມານີ້ວ່າ: ກຸ່ມຫັດຖະກຳຈັກສານຫວາຍບ້ານແບ່ງດ່ານໄດ້ລິເລີ່ມ ສ້າງຕັ້ງຂຶ້ນໃນປີ 1979 ໃນເບື້ອງຕົ້ນ, ໄດ້ມີເຖົ້າແກ່ຈໍານວນໜຶ່ງໄດ້ໄປເຫັນເຄື່ອງຫັດຖະກຳຢູ່ບ່ອນອື່ນແລ້ວມີຄວາມສົນໃຈຄິດວ່າໃນບ້ານມີວັດຖຸດິບຫຼາຍໂດຍສະເພາະ ຫວາຍ ແລະໄມ້ປ່ອງຫຼັງຈາກນັ້ນ, ກໍໄດ້ພ້ອມກັນຜະລິດອອກຈຳໜ່າຍສູ່ຕະຫຼາດ ແລະເຫັນວ່າໄດ້ຮັບການຕອບສະໜອງເປັນຢ່າງດີບໍ່ວ່າຈະເປັນທັງພາຍໃນແຂວງ ແລະຕ່າງແຂວງກໍໃຫ້ຄວາມນິຍົມ, ແຕ່ເຮັດແບບກະແຈກກະຈາຍບໍ່ໄດ້ເປັນກຸ່ມເປັນກ້ອນ,ມາຮອດປີ 1996 ອົງການປົກຄອງເມືອງຈຶ່ງຊຸກຍູ້ສ້າງຕັ້ງກຸ່ມດັ່ງກ່າວຂຶ້ນຢ່າງເປັນທາງການ,ສ່ວນຫວາຍທີ່ນໍາໃຊ້ເຂົ້າໃນການຜະລິດແມ່ນມີພາຍໃນບ້ານໂດຍອົງການປົກຄອງເມືອງໄດ້ມອບໃຫ້ຂະແໜງກ່ຽວຂ້ອງຂອງເມືອງຊ່ວຍຊອກຫາຕະຫຼາດ ແລະ ຝຶກອົບຮົມທັກສະສີມືໃຫ້ສະມາຊິກຂອງກຸ່ມໃຫ້ດີຂຶ້ນກ່ວາເກົ່າ, ສ່ວນຕະຫລາດຈໍາໜ່າຍຫຼັກແມ່ນພາຍໃນແຂວງສາລະວັນ ແລະສົ່ງຂາຍຢູ່ນະຄອນຫຼວງວຽງຈັນ ແລະ ແຂວງຈຳປາສັກຕື່ມອີກ.
   ສະນັ້ນ, ເພື່ອໃຫ້ກຸ່ມຫັດຖະກໍານີ້ມີຄວາມຍືນຍົງໃນຕໍ່ໜ້າອົງການປົກຄອງເມືອງຈະຊຸກຍູ້ໃຫ້ເກີດມີສວນກ້າ ແລະບ່ອນປູກຫວາຍຂອງກຸ່ມສະເພາະເພື່ອຮັບປະກັນໃຫ້ມີວັດຖຸດິບເຂົ້າໃນການຜະລິດພຽງພໍກັບຄວາມຕ້ອງການ, ພ້ອມນີ້ຈະນໍາເອົາປະຊາຊົນຈາກຫລາຍບ້ານມາຖອດຖອນບົດຮຽນນໍາແນໃສ່ສ້າງກຸ່ມຫັດຖະກໍາຈັກສານໃຫ້ໄດ້ອີກຫຼາຍກຸ່ມພາຍໃນເມືອງໃນຕໍ່ໜ້າ.

แชร์